Jwma, 24 Qañtar 2020
Alasapıran 3662 0 pikir 24 Şilde, 2015 sağat 10:21

ALMATI: ESİMOVTİÑ VERTOLETİ


«Vertolet-vertolet – meni öziñmen ala ket! Vertolet-vertolet – meni öziñmen ala ket...»

Tükke tüsinbey qaldıq. Tükke tüsinbey qalğasın äldeqaydan şığıp jatqan ırsıl-gürsilge eleñ-eleñ etip, qwlağımızdı türdik. Beker-aq türgen ekenbiz, osı sätte wmar-jwmar qwşaqtasqan ekeu asfal'ttalmağan aulanıñ şañın bwrq etkizip, biz otırğan jerden nebäri bes-altı qadamday jerge domalap tüsti. Tarsıl da gürsildi köbeytip, jwmısı joq jwmıssız qazaqtar nardı oynap otırğanbız – mına tegin töbelesti körgende edireygen-edireygen küyi ornımızdan wşıp-wşıp twrdıq. Wşıp-wşıp twrdıq ta: «Ne boldı-äy!» destik auılda qoy qayırıp jürgendey äjeptäuir dauıs şığarıp. Biraq wmar-jwmar ekeu bizdi eleñ qılğan joq, ırs-ırs etip töbelesip jatır. Töbeles bolğanda da - qızıq töbeles endi. Töbelestiñ jatıp alıp toqpaqtasatın türi bolsa kerek, öytkeni öz basım bwğan deyin mwnday töbelesti körmegem. Tükke tüsinbesek te, erikken eki-üş qazaqqa mına töbeles şınımen-aq qızıq töbeles boldı, öytkeni bwl - ekrandağı «fonogramma» töbeles emes, kädimgi «jivoy» töbeles.

«Öy, äkeñdi... noyıs neme!» dep twp-tura auıldağıday boqtağan taqırbas qazaq ornınan twrıp bara jatqan äskeri kiimdi qop-qoñır qazaqtı atıp twrğan bette artqı jağınan qapsıra qwşaqtadı da... aynala bere jerge jalp etkizdi. Jalp etkizdi de: «Boldı ğoy endi, öltiremisiñ Esimovti!» dep bizdi tağı tañdandırdı. «Oypırmay, mınau özi ne bop ketti? Esimovı nesi?»

Ardıñ-gürdiñ arasında jergilikti masştabtağı «wrıs dalasınıñ taktikasın» onşa-mwnşa tüsine almay twrğanımızda üsti-basınıñ şañın jüre qağıp, taqırbas qazaq bizdiñ janımızğa keldi. Keldi de – baqırayıp-baqırayıp twrğan bizderge mäseleniñ mänisin tüsindirdi. Söytsek – jağday bılay bolğan eken. Almatı qalasındağı Naurızbay audanınıñ aumağına tasqın su qaptauına baylanıstı adamdar arasında äbirjuşilik bastalmay ma, öytkeni şildeniñ şiliñgirinde mwnday boladı-au dep eşkim de oylamağan. Tötenşe jağdaylar men Qazgidromet degender de pälen-tügen dep eşteñe eskerte qoymağan. Osınday apaq-sapaqta audan aspanında Almatı äkimi Ahmetjan ESİMOV mırza payda bolmay ma – tikwşaqpen. Radiodan sambırlap habarlap ta jatqan – «Esimov Almatınıñ aspanında jür» dep. Tap osı sätte taqırbas qazaq pen onıñ «auğanda birge soğısqan polçanı» ekeui balkonda twrğan eken. Anadaydan gürildep tükwşaq dauısı estilgen bette-aq taqırbastıñ «polçanınıñ» mi istemey qalıptı. Taqırbastıñ aytuına qarağanda, Auğan jerindegi jan alısıp, jan berisken wrıstardıñ birinde mwnıñ «polçanın» tikwşaqtan tastalğan bomba öltirip qoya jazdağanğa wqsaydı. Äyteuir Alla qalap, aman qalıptı. Biraq sodan beri tikwşaq dauısın estise boldı – közi alayıp, qattı mazasızdanatın körinedi. Bwl jolı tipti «vertolet-vertolet – meni öziñmen ala ket!» dep ekinşi qabattıñ balkonınan Esimov mingen tikwşaqqa qaray sekirmek te bolğan eken, äyteuir abıroy bolğanda taqırbas şap berip wstap ülgeripti. Ekeuiniñ qwşaqtasqan küyi aulanıñ şañın bwrq etkizip, bizge jaqın mañğa qwlağanı da sodan eken. Kontuziyası bar, qısqasınan qayırğanda. Kületin de jağday emes. Al osı kezde... «Boları - bolıp, boyauı - siñip» qoyğannan keyin barıp ädettegidey «attandauın» bastaytın bizdiñ tötenşe jağdaylar jönindegi komitetimizdiñ qızmetkerlerine qarağanda Almatımızdıñ Esimovı «operativnıy» bolıp şıqtı – Alataudıñ baurayı alay-düley bolıp jatqan kezde AHMETJAN mırza «äp-bissimillä!» dep qalağa «tötenşe jağday tärtibin» engizdi de jiberdi. Dwrıs boldı negizi, bir jağınan alıp qarağanda. Al endi İşki ister ministriniñ orınbasarı Vladimir BOJKO mırza bolsa, tötenşe jağdaydıñ qızmetkerleri men qajetti tehnikaları jäne 4 tikwşağı küni-tüni kezekşilik jasau kestesine kiriskenin mälimdedi. Keşikse de, qarap otırmağanın osılay bildirdi bwl kisi.

Osı VLADIMIR mırzanıñ aytuınşa, Almatı qalasınıñ Naurızbay audanı aumağındağı Qarğalı, Qarağaylı, Dostıq jäne Aqjar kentteri men Jandosov jäne YAssaui köşeleriniñ qiılısındağı tasqın su astında qalğan twrğın üyler baqılauğa alınıp, ondağı 900-ge tarta twrğın qauipsiz aymaqqa köşirilgen.

Marat MADALIMOV.

Abai.kz

0 pikir