Seysenbi, 18 Aqpan 2020
Qoğam 5051 0 pikir 27 Aqpan, 2017 sağat 01:42

QADIRALINANIÑ PREZIDENT QOL QOYĞAN ZAÑDI BWRMALAUĞA HAQISI BAR MA, MIRZAHMETOV MIRZA?!

QR Prem'er-Ministriniñ orınbasarı,

 QR Auıl şaruaşılığı ministri

A.I. Mırzahmetovke

Qwrmetti Asqar Isabekwlı!

Biz QHR-dan ilgerindi-keyindi köşip kelip, Aqmola oblısı, Qorğaljın audanı, Keñbidayıq auılına qonıstandıq. Jiırma otbasımız. Bärimiz twraqtı tirkeuge twrıp, bärimiz «Oralman» märtebesin aldıq. Mine, bir jıldan beri öz künimizdi özimiz körip, tirlik etip kelemiz. Auıl twrğındarı jılı jüz, ıstıq qwşaqpen qarsı aldı. Aldağı jerde artta qalğan tuıs-tuğan, qwda-jegjattarımız da at basın osı auılğa bwrsaq dep, köştiñ tüyesin qomdap otır. Jaz şıqsa, olar da oraladı.

Qwdayğa şükir, köñil-küyimiz jaqsı, ruhımız sergek. Eñbek etken adamğa bar mümkindik jasalğanın telearnalardan estip, quanıp jatırmız. Biz auılda eseyip, öz betimen jan bağudıñ mol täjiribesin igergen jandarmız. Tek, şaruaşılıq qwruğa, malmen aynalısuğa qajetti şarttar äzirlense, qalğanın öz küşimizben damıtıp äketemiz. Bizge qol baylau bolıp twrğan – JER ğana!

Elbasımızğa mıñ qaytara rahmet, şetten keletin qandastarımızdıñ bükil jağdayın Zañmen şeşip qoyıptı. Sonıñ eñ mañızdı, asa qajettisi de osı JER mäselesi edi.

Qazaqstan Respublikasınıñ Jer kodeksiniñ 46-babında ol mäsele de öz şeşimin tauıptı – «Oralmandarğa şarua nemese fermer qojalığın jäne tauarlı auıl şaruaşılığı öndirisin jürgizu üşin jer uçaskelerin beru auıl şaruaşılığı maqsatındağı jerden, arnayı jer qorınıñ, immigraciyalıq jer qorınıñ jerinen jäne bosalqı jerden uaqıtşa jer paydalanu qwqığımen jüzege asırıladı» - dep aşıq jazılıptı. Eñ keremeti, osı 46-baptıñ 4) tarmağı boyınşa,  «Oralmandarğa beriletin jer uçaskelerine osı Kodekstiñ 48-babınıñ normaları qoldanılmaydı» eken. Qısqası, "Oralman" atanğan bizge Jer telimderiniñ paydalanu qwqığı eşbir konkurssız, aukcionsız beriledi eken. Mine, Qazaqstannıñ qandastarına jasağan qamqorlığı dep osını ayt. Äytpese,  Zañ men Zakonnan habarı joq alıstan kelgen biz bayqws abdırap qalar edik qoy...

Osı Jer kodeksiniñ 46-babında körsetilgen igilikterdi negizge alıp, biz 2016 jıldıñ 17 qaraşasında Aqmola oblısı, Qorğaljın audanınıñ äkimdigine JER swrap, ötiniş jazğanbız. 2016 jılıdıñ 18 qaraşasında  audandıq Jer qatınastarı böliminen «Keñbidayıq auıldıq okruginde jer telimi bos emestigin habarlaymız, bos bolğan jağdayda sizderge jer telimi beriledi» - degen jauap hat aldıq.

Aqmola oblısı - Qazaqstan Respublikası Ükimetiniñ Oralmandardı qonıstandıru üşin arnayı ayqındağan jeti öñirdiñ bireui. Biz sol üşin de osı oblısqa qonıstanğanbız.

Ükimetke telmirmey, tınımsız jwmıs isteumen ömiri ötip kele jatqan  bizder üşin qol qusırıp bos otıru – azap! Arğı bette jürip tırnaştap jiğan tiın-tebenimizge azın-aulaq mal da satıp aldıq. Endi sonı damıtıp, şaruaşılıq qwrıp, tirşilik etu üşin ärine, JER kerek. Sol üşin biz «Nwr Otan» partiyasına hat jazıp edik, partiya ol ötinişimizdi Aqmola oblısınıñ äkimdigine jiberipti. 2017 jıldıñ 10 qañtarında «Aqmola obılısı jer qatınastar basqarması» melekettik mekemesi bizge jauap hat qaytardı.

 Aqmola oblıstıq Jer qatınastarı basqarmasınıñ basşısı Almagül Qadıralina

Mına hattı oqıp, miımız aynaldı. Aqmola oblıstıq Jer qatınastarı basqarmasınıñ basşısı Almagül Qadıralina bizge bos jer tauıp berudiñ ornına, «Oralman» degen wğımdı tüsindirip, QR Jer kodekisinde tayğa basqan tañbaday anıq jazılğan zañ baptarın bwrmalap körsetipti. «QR Jer kodekisiniñ 48-babınıñ 1-tarmaqşasında qarastırılğan jağdaylardı qospağanda» dep Ükimet arnayı bergen «Oralman» degen märtebemizdi laqtırıp tastap, bizdi Qazaqstan Respublikasınıñ azamattarımen teñestiruge tırısadı. Zañmen körsetilgen JER telimderin paydalanu qwqığımızdan ayıruğa barın saladı. Qısqası, «Jer bermeymiz» degen oyın aşıq aytpağanımen, emeksitip körsetedi.

Ne üşin QR Jer kodkisiniñ 48-babınıñ 1-tarmaqşasında qarastırılğan jağdaylardı qospaydı ol?! Prezidenttiñ qolı qoyılğan Zañdı bwrmalauğa Almagül Qadıralina hanımnıñ qanday haqısı bar?!! Bildey bir oblıstıñ Jer qatınastarı basqarmasınıñ basşısı Jer turalı zañdı bilmey me, älde şetten kelgen qandastarına qırın qaray ma?!!

Qwrmetti Asqar Isabekwlı!

 Şette jürgen qazaqtıñ Qazaqstanğa keluge degen ıntası öte küşti. Qazaqtıñ bağına tuğan Elbasımız köşip kelem degen qazaqqa bar mümkindikti Zañ jüzinde jasap qoydı. Biıl köşip kelgen qazaqtıñ Zañ jüzinde belgilengen jeñildikteri biıl şeşilmese, kelesi jılı oralğan el köbeygende mäsele kürdelenip ketpey me?! Zañ köleminen asıp, biz de artıq närse talap etpeymiz. Atqaruşı bilik mwnday kürdeli tüyinderi Zañdı bwrmalamay, öz uağında şeşip otıruı kerek qoy.

Sizden osı isti Öz qarauıñızğa alıp, bizdiñ jäne biz sekildi oralman qandastarıñızdıñ Jer alu mäselesin öz deñgeyinde şeşiluine ıqpal etuiñizdi swraymın.

Qwrmetpen,

Qorğaljan audanı,

Keñbidayıq jäne

Arıqtı auıldarına köşip kelgen

Oralmandar atınan

Qaynar Kemelbekwlı

Abai.kz

 

0 pikir