Düysenbi, 16 Qırküyek 2019
«Soqır» Femida 5249 13 pikir 9 Mausım, 2017 sağat 18:56

«Boqauız» äkim äli jwmısta jür...

2016 jıldıñ 30 qırküyegi küni Elbasımız Nwrswltan Nazarbaev jurnalisterge bergen swhbatında "Öz qaramağındağılarğa mädenietti qarım-qatınas jasay almaytın basşılardı wnatpaytının aytqan edi.

«Atıñ  şıqpasa, jer örte» deydi qazekem. Almatı oblısı Wyğır audanınıñ äkiminiñ atağı soñğı eki ayda bütin Respublikağa äygilendi. Jaqsılıq jasap, jwrt auzına ilikse, qanekey? Boqauız tilimen, bılapıt sözimen düyim jwrttıñ jağasın wstattı. Osılayşa el de, Elbası da wnatpaytın qılıq körsetti.

Älqissa, üstimizdegi jıldıñ 18 säuirinde abai.kz saytında «auzınan aq it kirip, kök it şığıp jatqan» audiojazba jariyalandı. Almatı oblısınıñ äkimi Amandıq Batalovqa qarata jazılğan maqalada dauıs oblıstağı audan äkimderiniñ biri ekendigi aytılğan. Köp wzamay-aq dauıstıñ Wyğır audanınıñ äkimi Alimjan Tohtasunovqa tiesili ekendigin köpşilik añğarıp ta ülgerdi. Biraq äldekimderdiñ aralasuı sayttağı materialdıñ wzaq twrmauına ıqpal etti. Dese de ertesi, yağni 19 säuir küni «Qala men dala» gazetiniñ http://www.dalanews.kz saytında atalmış audiojazba tağı da jarıq kördi. Mwnda dauıs Wyğır audanınıñ äkimine tiesili ekendigi anıq körsetildi. Artınşa-aq http://qamshy.kz saytında da «Qızmetkerin ayausız boqtağan adam Wyğır audanınıñ äkimi me?» attı taqırıpta sın maqala jarq etti. Mwnan soñ https://kaz.365info.kz saytı da bwl dünieni köşirip bastı. Osılayşa aynalası eki kün işinde şeneuniktiñ jwmıs kezinde qaramağındağılardı balağattap jatqanı jazılğan jazba äleumettik jelige tarap, qızu pikirtalastıñ astında qaldı. Däl osı uaqıtta Wyğır audanınıñ äkimi Alimjan Imtahunwlı Tohtasunov densaulığı sır berip, auruhanada jatır degen aqparat estidik. Biraq 1 mamır merekesinde audan ortalığında ötken is-şarada Alimjan Tohtasunov halıq aldına şığıp, el-jwrttı qwttıqtap, eşbir ılıñ bolmağanday keyipte jürdi.

Keyinnen, yağni 24 mamır küni Vremya gazetiniñ saytı biraz uaqıt bwrın äleumettik jelilerdiñ «köşbasşı» maqalası atanğan Tohtasunov turalı audiojazba qwzırlı orındardıñ tekserisinde rastalıp, äkimniñ öz erkimen jwmıstan ketkenin habarlağan. Däl osı sarındağı «Akim-materşinnik?!» attı maqala «Jeltaya gazeta» https://taldysary.kz/1057-akim-materschinnik.html saytında 25 mamır küni jarıq kördi.

Mwnan soñ 27 mamırda QazAqparat ta «Qızmetşilerine beyädep söylegen Wyğır audanınıñ äkimi jwmıstan ketkeli jatır» dep jar saldı. Onda  «Qazir Älimjan Tohtasunovtıñ arızı Prezident äkimşiliginiñ qarauında jatır. Bwl jöninde  Almatı oblısı boyınşa Memlekettik qızmet isteri jäne sıbaylas jemqorlıqqa qarsı is-qimıl departamentiniñ ökilderi mälim etti. Sonday-aq departamenttegiler beyädep sözge tolı audiojazbadağı dauıs Wyğır audanınıñ äkiminiki ekenin rastadı», – delingen. «Audiojazbadağı «boqauız» äkim bop şıqtı». Wyğır audanınıñ basşısı öz erkimen jwmıstan ketpek» degen süyinşi habar https://kaz.365info.kz saytında basıldı. Tipti Qazaqstan wlttıq telearnasında da (http://kaztrk.kz/news/qogam/akimder-adepsizdigi-ushin-zhumystan-quyldy-88376) «Öz qızmetkerlerimen döreki söylesken Wyğır audanı äkiminiñ sözderi äleumettik jelide tarap ketti. Köp keşikpey Älimjan Toqtasınov äkimdik qızmetten öz erkimen ketu turalı arız jazdı», – dep jalpaq jwrtqa jariya salındı.

Osı uaqıtqa deyin barlıq qol astındağı qızmetkerlerin, tipti qarğaday qazaq qızdarın, anasınday mügedek äyeldi boqtağanı turasında oblıs basşılarına birneşe märte arız tüsse de, Tohtasunovqa tıqır tayanğan emes. Qayta özin sol audannıñ qojayınınday sezinip esirip ketken bolatın.   Äkimniñ balağatına äbden toyıp, jigerleri qwm bola bastağan memlekettik qızmetkerler men audan twrğındarı äleumettik jelidegi älekten soñ kişi Tohtasunovqa bir şara qoldanılar degen ümitte edi. «Äkim jwmıstan öz erkimen ketti» degen aqparat tarağanda da köptiñ köñili ornına tüskendey boldı. Biraq bwl quanış wzaqqa sozılmadı. Osıdan eki apta bwrın Alimjan Tohtasunov öz jwmısına qaytıp kelip, bäz bayağışa qızmetin atqara bastadı. Tipti birer kün sabırmen söylep, salqınqandıq tanıtuğa tırısqanımen, birer künnen soñ äuenine qayta basıptı. Tağı da bayağı boqtıq, bılapıt. Dauısınıñ äkimdik ğimaratınıñ är bwrışına jetip jatqanın da sol mekemedegi qızmetkerler jağasın wstap aytıp jür. Öz qızmetkerlerin jerden alıp, jerge salıp, ata-tegin tüp-twqiyanımen boqtap, boqauız sözderin doğarmağan äkimniñ bwl qılığın qalay tüsinemiz? Sonda respublika kölemindegi bwqaralaq aqparat qwraldarınıñ sözi jalğan bolğanı ma? Älde jalğan aqparat berip, jügensizdikti joymay otırğan qwzırlı orındar kinäli me? Qalay desek te «otqa salsa janbaytın, suğa salsa batpaytın» Tohtasunovtıñ beyädep qılıqtarına köz jwma salu mümkin emes ekeni aydan anıq.

İliyas Aqbay

Abai.kz

13 pikir