Jwma, 29 Mamır 2020
COVID-19 QAZAQSTANDA. Jwqtırğandar — 9576. Jazılğandar — 4900. Qaytıs bolğandar — 37
ŞOLU 3796 2 pikir 22 Tamız, 2017 sağat 10:20

Şolu: Prezident ne dedi? Biz ne tüydik?

Apta işinde Prezident Nazarbaevtıñ aqparat qwraldarına swhbat berip, el sayasatındağı eñ mañızdı degen mäselelerge öz pikirin bildirdi. Solardıñ keybirine şolu jasaymız. Prezident ne dedi? Biz ne tüydik?

Latın älipbii tek qazaqqa ğana qatıstı mäsele...

Äueli, Elbası "Habar" arnasına bergen swhbatında latın älipbiine köşu processi qazaqqa ğana qatıstı ekenin aşıq ayttı.

"Latın ärpine köşkende, biz orıs tilinen qaşıp keteyin degen joqpız. Osınday alıp-qaşpa sözderdi keybir sayasatkerler aytadı. Äsirese orıs tilinde. Älipbi tek qana qazaqtıñ tiline qatıstı mäsele. Ğılım menen tehnikanıñ közi bolıp otırğan, köp audarılğan orıs tiline, barlığın ajıratpasaq, meniñşe biz bayımaymız, kedeylenemiz. Bwl jatqan ülken mäsele. Ülken jwmıs atqarılıp jatır. Jaqında men bir-eki mätinin qaraytın bolamın. Osımen şwğıldanıp jürgen ğalımdardı, tilmaştardıñ barlığın jinap, solarmen otırıp, qarap bir jobağa toqtaytın bolamız", - dedi Prezident Nazarbaev.

Wqqanımız - bir memleketke eki älipbi boladı. Söytip, Säbettiñ sanadan arıla almay kele jatqan memlekettik menedjment kirilicanı latın älipbiimen qatar alıp jüruge ıqılas tanıttı. Qazaqstanda 3 millionğa juıq orıs diasporası twratının eskersek, kirilicağa qwlıqtılar bar. Degenmen, memlekettik statistika Qazaqstan halqınıñ 80 payızı qazaq tilin erkin meñgergendigin ayttı.

Sottar säbettik sanadan arılmağan

Säbettik sana demekşi, Prezident Nazarbaevtıñ özi de ayttı mwnı. Elbası küni keşegi swhbatında Sottardıñ säbettik sanadan arılmağanın ayttı.

"Birinşiden, sottardıñ özin qayta tärbieleu kerek. Olar äli säbettik sanadan arılmağan. Germaniya, Britaniya, Franciya, postkeñestik elderdiñ täjirbielerin qayta qarap şığu qajet. Solardıñ işinde eñ ozıq, eñ tiimdisin tañdaymız", - dedi Prezident.

Qazaq qoğamında ädil sotqa degen senimniñ kürt tömendep ketkeni belgili. Qara qıldı qaq jaradı degen sottar "saudanıñ" soyılın soğıp ketkeni de ötirik emes. Nätijesinde, bilik pen halıq arası alşaqtay tüsti. Äsirese, Joğarğı bilikke tikeley täueldi Sot - söz bostandığı, adam qwqıqtarı degen mäseleni ekinşi planğa ısırıp, ayağında bwyrıqtı orındauşığa aynaldı. Bwl antidemokratiyalıqtıñ bir körinisi edi.

Prezidentitñ özi "wr da jıq" sottardı tärbieleytinin, sot jüyesine reforma kerektigin ayttı.

"Ekonomnıy" Esimov Elbasınan maqtau estidi

Aytpaqşı, EKSPO-2017 ötkizip jatqan el Prezidenti Esimovti maqtadı.

Astana EKSPO-2017 WQ AQ basşısı Ahmetjan Esimov "ekonomdap" jürip Elbasınan maqtau estidi.

"Biz qwrğan kompaniya — "Astana EKSPO-2017" — alğaşında şığın 800 milliard teñge köleminde boladı dep josparlağan. Qoldanılğan şaralar nätijesinde şığın kölemi eki esege — şamamen 400 milliard teñgege qısqardı. Mwnıñ bäri Ahmetjan Esimov jetekşilik etetin EKSPO-2017 wyımdastıruşılarınıñ eñbegi. Olar jaqsı jwmıs istedi", - dedi Nazarbaev.

Aytpaqşı, Esimov mırza 2015 jılı EKSPO qwrılısınan 78 milliard teñge ünemdep, Elbasınıñ alğısın alğan edi.  Sodan 2017 jılı EKSPO körmesiniñ aşıluına az qaldı degende, Esimov mırza qwrılıs jäne dayarlıq jwmıstarınıñ ayaqtalğanın aytıp, BAQ-qa swhbat berdi. Onda wzın-ırğası 300 milliard teñge ünemdegenin ayttı.

«Biz ülken jwmıstı ayaqtadıq. Tipti, merdiger kompaniyalarmen arada kelispeuşilikter de boldı. Ärine, olar köbirek alğısı keldi ğoy. Degenmen biz öz mindetimizdi abıroymen orındap şıqtıq. Sonıñ nätijesinde biz qwrılıstıñ äuelgi belgilengen somasınan 300 milliard teñge ünemdedik», - deydi EKSPO-2017 basşısı Ahmetjan Esimov.

Şarşamaptı. Eşqayda demaluğa barmaydı

Elordada EKSPO ötkizip jatqan Elbası äli tıñ körinedi. Eşqayda demaluğa barmaytının, barğısı kelmeytinin jetkizdi.

"Men Jer betindegi köptegen ädemi jerlerdi kördim.  Biraq öskeleñ wrpaqqa jäne zamandastarıma aytqım keledi - men qazir eşqayda demaluğa barğım kelmeydi. Burabay sekildi ğajap mekendi men osı uaqıtqa deyin kezdestirmedim.  Däl osınday tabiğat Şığıs Qazaqstanda bar. Ertis özeniniñ seksen payızı qazaqstandıq sudan qwralğan. Alatau baurayı öz aldına bölek äñgime. Qısta şañğı teuip, tauda seruendeuge boladı", - deydi Prezident.

Prezidenttiñ Sot jüyesin reformalau turalı aytqanı qoğamdıq talqılaudı qajet etetin taqırıp. Al latın älipbiine tek qazaqtardı köşiru eldegi etnostıq birlikti qaq jaruı äbden ıqtimal qwbılıs ekenin de ayta ketken jön. Äzirge osı boldı.

Nwrzat Toğjan

Abai.kz

2 pikir