Särsenbi, 1 Säuir 2020
Kübirtke 17401 60 pikir 12 Jeltoqsan, 2017 sağat 10:31

Şıñjañda 500 mıñnan astam qazaq twtqındaladı

Abai.kz aqparattıq portalınıñ uatsap äleumettik jelisindegi akkauntına "Şıñjañda 500 mıñnan astam qazaq twtqındaladı" attı material kelip tüsti. Ol materialda Qıtaydıñ Şıñjañ ölkesinde twratın 500 mıñnan astam qandasımız twtqındaluı mümkin ekeni aytılğan. Mwnday maqalalar eki maqsatta jazıladı. Birinşisi - arandatu, ekinşisi - aqiqattı aytu maqsatındağı nar täuekel. Materialdıñ sipatı ekinşi maqsatqa jaqın bolğandıqtan oqırman nazarına wsınğandı jön sanadıq. 

Qıtaydıñ Şıñjañ ölkesinde twratın 500 mıñnan astam qandasımız twtqındaluı mümkin. Bwl turalı körşi eldiñ Qwqıq qorğau saytı habarlağan.

Şıñjañ ölkesine qarastı Qaşqar, Hotan, İle, Sanjı sekildi eldimekenderdiñ qoğam qauipsizdik mekemesi juırda keñ auqımdı qatañ soqqı beru şarasın ötkizedi. Osı şara ayasında jüz mıñdağan qazaq-wyğır mwsılman azamattarın ekstremisttik ideyadan arıltu ortalığı jäne sayasi tärbieleu ortalığına 2 jılğa jiberu közdelgen. Qauipsizdik qızmetkerleri qazaq pen wyğır köp şoğırlanğan audandardıñ üylerine arnaulı tıñdau apparatın qoyıp, tekseru jürgizip jatır.

Apparat ornatu isin Qıtaydıñ tiisti organdarı üydiñ temperatura ölşeytin qwrılğısı retinde tüsindirgen. Qwrılğını Jılumen qamdau kompaniyasınıñ qızmetkerleri ornatqan. Twrğındardıñ aytuına qarağanda bwl apparat üydiñ temperaturasın ğana ölşemeydi, ol üydegi barlıq aytılğan jaylar jazılıp, tiisti jerge jetkizip otıradı. Qol telefonğa wqsas apparat negizinen otbası müşeleri köp otıratın qonaq bölmege ornalastırılıp jatır. Ärdayım qızıl janıp twratın qwrılğını 24 sağat boyı toqtan ajıratuğa tiım salınğan.

Osı audanda twratın wltı qıtay Li attı azamat jılu baqılaytın qwrılğını ornatılıp jatqanın estigenin, biraq eşkim arnayı tüsindiru jwmıstarın jürgizbegenin, onıñ üyine mwnday qwrılğı ornatılmağanın aytqan. Bwğan deyin Jılumen qamdau kompaniyasınıñ ökilderi arnayı üyge kelip, temperaturanı özderi ölşep ketetin bolıptı.

Beyresmi aqparat közderi Qıtaydıñ Ölkelik ükimeti jergilikti ükimetterge bwyrıq tüsirip, jabıq üyrenuge qatısatındardıñ tizimin tapsırudı talap etken. Üyrenuge qazaq pen wyğır halqınıñ ökilderi küştep tartıladı. Jalpı, 1-2 jıl auqımında 500 mıñnan astam qazaq "Otandı süyuge" tärbielenbek. Olar kezeñ-kezeñimen Ekstremistik ideyadan arıltu, Käsiptik önerge baulu, Dümşe moldalardı toptap tärbieleu dep atalatın ondağan ortalıqtarğa jiberiledi. ,

Mısırğa qonıs audarğan bir azamat qazir osı zorlıqqa şıdamay Qıtaydan köşip ketkisi keletinderdiñ sanı artqanın aytqan. Biraq, qauipsizdik mekemesi qızmetkerleri azamattardıñ tölqwjattarın mäjbürli türde jinap alğan. Tipti, keybir oblıstarda jinalıp alınğan qwjattardı iesine satıp berip jatqanı anıqtalğan. Qwjat qaytarıp alu nemese qamalğan tuıstarın bosatıp alu üşin qara halıqtan memlekettik qızmetkerler 70-100 mıñ yuuan aqşa talap etip otırğan körinedi.

Abai.kz

60 pikir