Abai.kz اقپاراتتىق پورتالىنىڭ ۋاتساپ الەۋمەتتىك جەلىسىندەگى اككاۋنتىنا "شىڭجاڭدا 500 مىڭنان استام قازاق تۇتقىندالادى" اتتى ماتەريال كەلىپ ءتۇستى. ول ماتەريالدا قىتايدىڭ شىڭجاڭ ولكەسىندە تۇراتىن 500 مىڭنان استام قانداسىمىز تۇتقىندالۋى مۇمكىن ەكەنى ايتىلعان. مۇنداي ماقالالار ەكى ماقساتتا جازىلادى. ءبىرىنشىسى - ارانداتۋ، ەكىنشىسى - اقيقاتتى ايتۋ ماقساتىنداعى نار تاۋەكەل. ماتەريالدىڭ سيپاتى ەكىنشى ماقساتقا جاقىن بولعاندىقتان وقىرمان نازارىنا ۇسىنعاندى ءجون سانادىق. 

قىتايدىڭ شىڭجاڭ ولكەسىندە تۇراتىن 500 مىڭنان استام قانداسىمىز تۇتقىندالۋى مۇمكىن. بۇل تۋرالى كورشى ەلدىڭ قۇقىق قورعاۋ سايتى حابارلاعان.

شىڭجاڭ ولكەسىنە قاراستى قاشقار، حوتان، ىلە، سانجى سەكىلدى ەلدىمەكەندەردىڭ قوعام قاۋىپسىزدىك مەكەمەسى جۋىردا كەڭ اۋقىمدى قاتاڭ سوققى بەرۋ شاراسىن وتكىزەدى. وسى شارا اياسىندا ءجۇز مىڭداعان قازاق-ۇيعىر مۇسىلمان ازاماتتارىن ەكسترەميستتىك يدەيادان ارىلتۋ ورتالىعى جانە ساياسي تاربيەلەۋ ورتالىعىنا 2 جىلعا جىبەرۋ كوزدەلگەن. قاۋىپسىزدىك قىزمەتكەرلەرى قازاق پەن ۇيعىر كوپ شوعىرلانعان اۋدانداردىڭ ۇيلەرىنە ارناۋلى تىڭداۋ اپپاراتىن قويىپ، تەكسەرۋ جۇرگىزىپ جاتىر.

اپپارات ورناتۋ ءىسىن قىتايدىڭ ءتيىستى ورگاندارى ءۇيدىڭ تەمپەراتۋرا ولشەيتىن قۇرىلعىسى رەتىندە تۇسىندىرگەن. قۇرىلعىنى جىلۋمەن قامداۋ كومپانياسىنىڭ قىزمەتكەرلەرى ورناتقان. تۇرعىنداردىڭ ايتۋىنا قاراعاندا بۇل اپپارات ءۇيدىڭ تەمپەراتۋراسىن عانا ولشەمەيدى، ول ۇيدەگى بارلىق ايتىلعان جايلار جازىلىپ، ءتيىستى جەرگە جەتكىزىپ وتىرادى. قول تەلەفونعا ۇقساس اپپارات نەگىزىنەن وتباسى مۇشەلەرى كوپ وتىراتىن قوناق بولمەگە ورنالاستىرىلىپ جاتىر. ءاردايىم قىزىل جانىپ تۇراتىن قۇرىلعىنى 24 ساعات بويى توقتان اجىراتۋعا تيىم سالىنعان.

وسى اۋداندا تۇراتىن ۇلتى قىتاي لي اتتى ازامات جىلۋ باقىلايتىن قۇرىلعىنى ورناتىلىپ جاتقانىن ەستىگەنىن، بىراق ەشكىم ارنايى ءتۇسىندىرۋ جۇمىستارىن جۇرگىزبەگەنىن، ونىڭ ۇيىنە مۇنداي قۇرىلعى ورناتىلماعانىن ايتقان. بۇعان دەيىن جىلۋمەن قامداۋ كومپانياسىنىڭ وكىلدەرى ارنايى ۇيگە كەلىپ، تەمپەراتۋرانى وزدەرى ولشەپ كەتەتىن بولىپتى.

بەيرەسمي اقپارات كوزدەرى قىتايدىڭ ولكەلىك ۇكىمەتى جەرگىلىكتى ۇكىمەتتەرگە بۇيرىق ءتۇسىرىپ، جابىق ۇيرەنۋگە قاتىساتىنداردىڭ ءتىزىمىن تاپسىرۋدى تالاپ ەتكەن. ۇيرەنۋگە قازاق پەن ۇيعىر حالقىنىڭ وكىلدەرى كۇشتەپ تارتىلادى. جالپى، 1-2 جىل اۋقىمىندا 500 مىڭنان استام قازاق "وتاندى سۇيۋگە" تاربيەلەنبەك. ولار كەزەڭ-كەزەڭىمەن ەكسترەميستىك يدەيادان ارىلتۋ، كاسىپتىك ونەرگە باۋلۋ، دۇمشە مولدالاردى توپتاپ تاربيەلەۋ دەپ اتالاتىن ونداعان ورتالىقتارعا جىبەرىلەدى. ،

مىسىرعا قونىس اۋدارعان ءبىر ازامات قازىر وسى زورلىققا شىداماي قىتايدان كوشىپ كەتكىسى كەلەتىندەردىڭ سانى ارتقانىن ايتقان. بىراق، قاۋىپسىزدىك مەكەمەسى قىزمەتكەرلەرى ازاماتتاردىڭ تولقۇجاتتارىن ءماجبۇرلى تۇردە جيناپ العان. ءتىپتى، كەيبىر وبلىستاردا جينالىپ الىنعان قۇجاتتاردى يەسىنە ساتىپ بەرىپ جاتقانى انىقتالعان. قۇجات قايتارىپ الۋ نەمەسە قامالعان تۋىستارىن بوساتىپ الۋ ءۇشىن قارا حالىقتان مەملەكەتتىك قىزمەتكەرلەر 70-100 مىڭ يۋان اقشا تالاپ ەتىپ وتىرعان كورىنەدى.

Abai.kz