Beysenbi, 22 Tamız 2019
Jıl qorıtındısı 3111 5 pikir 30 Jeltoqsan, 2017 sağat 23:20

Internet-konferenciya: Ämirjan Qosanov (jalğası)

Resmi küntizbe boyınşa bwl jıl da ayaqtaluğa az qaldı. 2017 jılda qazaq qoğamında auız toltırıp aytarlıqtay oqiğalar köp boldı.  Halıqaralıq därejede atqarılğan is-şaralardan bölek, älemdik mediyada Qazaqstan men qazaq qoğamındağı eleñ etkizer oqiğalar trendtik taqırıptar qatırında twrdı. Aqordanıñ aynalasındağı aq jağalılar jıldı qorıtındıladı.

Degenmen, qazaq qoğamınıñ ötip bara jatqan jılğa qatıstı öz oyı, pikiri bar. Sonımen,  ötip bara jatqan jıldıñ bastı oqiğalarına qatıstı qoğamnıñ pikiri qanday?

Osı jäne özge de saualdarğa internet-konferenciyamızdıñ qonağı, "Abai.kz" aqparattıq portalınıñ twraqtı spikeri, sayasatker Ämirjan Qosanov mırza jıldı qorıtındılay otırıp, jauap berudi bastap ketken bolatın.

Bügin internet-konferenciyamızdıñ jalğasın jariyaladıq. Internet-konferenciyağa saual joldau ayaqtaldı. Endi tek spiker Ämirjan mırzanıñ bergen jauaptarına qatıstı öz oy-pikirleriñizdi bildiruleriñizge boladı.


Maqswt 2017-12-21 14:07:07

Äbeke, eger siz osı betalısıñızdan qaytıp, biliktiñ sözin söylep, halıqqa qarsı jaqqa şıqsañız - qanday därejege köteriler edim dep oylaysız? Onday mümkindik boldı ma?

-Osı uaqıt işinde ärtürli küşter är kezde bilikke şaqırğan kezderi boldı. Onıñ qaysıbirin ayta beresiñ?

Halıqqa qarsı söylep, kar'era jasau degenniñ özi qılmıs pen qiyanat emes pe?!  Men bilikke baru üşin bügingi bilik özgeru kerek şığar!

Meniñşe, bizde «adam ömirinde bir närsege qol jetkizui üşin mindetti türde ne ministr ne äkim boluı kerek» degen mansapşıl oy bar. Tipti balağa bata bergende de osı tilekti aytıp jatadı emes pe?! Dünieniñ bar qızığı men mümkindigi tek şeneuniktik şekpende emes qoy! Kerisinşe, balağa bata bergende: «Wltıñnıñ, halqıñnıñ adal wlı bol, qay mamandıq tañdasañ da, sonıñ geniyi bol!» dep tilek aytuımız kerek!

Daulet 2017-12-21 16:41:37

Marqwm Temirtastıñ "Ordalı jılan" kitabın qalay bağalaysız?

-Şınımdı aytsam, oqımappın. Keşirersiz.

Serik 2017-12-21 16:51:32

Surak: siz aralasip jurgen opposisyalik partyalar nege ulittik maselelerdi koteruden kashadi? Baskasha aytkanda, ultshildiktan nege kashadi?

-Men aralasıp jürgen oppoziciyalıq partiyalar bwrın bar edi. Qazir joq. Jalpı alğanda, kezinde «oppoziciyalıq partiyalar wltşıl emes» degen söz bolğanı ras. Biraq, 2006 jılı JSDP s'ezin ötkizgende biz «Qazaq wltın jañğırtu» degen arnayı bağdarlama qabıldağanbız. Onı jazuğa özim tikeley atsalısqanmın.

Qazir bolsa, jağday tipti basqaşa: wlttıq renessans ideyası qoğamdı ğana emes, bilik basındağıların da oylantıp jatqan siyaqtı. Ol da oñ tendenciya.

Mark 2017-12-21 18:25:05

Qazaq oyandı. Biraq «men qazaqpın» deytin, eldi beybit türde biriktiretin, ädildikke şaqıratın twlğa qayda? Älde olar twlğa retinde közge tüsuge qorqama? Öz ömirlerine qauiptene me, Ämirjan mırza?

-Basqalarda qauip jağı da bar şığar. Mende onday qauip joq. Mendegi qauip mınaday: erteñ bilikke qarsı bir resmi wyım qwrsañ, onıñ müşelerin bilik quğın-sürginge saladı. Olardı qorğauğa wyımdıq äri qarjılıq jağınan mıqtı dayındıq kerek. Sınğa öziñ şıdarsıñ, biraq seniñ seriktesteriñdi qinap jatsa şe? Ol üşin öte-möte wyımdasqan, barlıq jağınan qauqarlı wyım kerek!

Wlttıq-demokratiyalıq qozğalıs qwrayıq dep talay qaltalığa ayttım. Qorqadı. Şetelde osınday, bilikke täuelsiz bastama qolğa alğanda, kraudfanding degen mehanizmdi qoldanadı. YAğni äleumettik jeli arqılı ündeu tastap, bir şotqa azamattardan qarjı jinaydı. Söytip, barlıq wyımdastıruşılıq şaralardı qolğa aladı. Bälkim, bizge de endi sonday täsildi qoldanu kerek şığar. Biraq oğan qara nan men qara suğa qarap otırğan köpşiliktiñ jağdayı säykes emes qoy. Sol jağı tağı bar. Al naqtı bir oligarhtan qarjı tüsse, sonıñ sözin söylep ketu qaupi bar.

Biraq bir närse anıq: qoğamda hılıqtıñ oyın jetkize alatın, qazirgi bilikke layıqtı balama bola alatın qoğamdıq-sayasi küşke swranıs bar. Qazir sonday bir wyım qwru turalı seriktestermen birge oylanıp jürmiz.

Töken 2017-12-21 20:51:53

Bayqauımşa, sizdiñ wstanımıñız BAQ betinde biliktiñ kemşin twstarın aytıp, sıni maqalar jazu. Biraq, bilik kimniñ auzınan şıqsa da, sınğa, pildi ağaş oqpen atqanday selt etpeydi.Oyıñızda «sanalı ğwmırım, jel diirmenmen ayqasqan Don Kihottay bekerge ötip baradı» degen qınjılu joq pa?

-Sonda sanalı ğwmır tek qana mansap pen baylıq turalı armanğa tirelu kerek pe?

Adamda principter degen boladı. Men jastayımnan ädiletsizdikke qarsımın. Sonı aytamın dep bilikke de jağıp jürgen joqpın. Sol wstanımnan ayrılmaymın. Qalğanınıñ bäri – dalbasa!

Eñ bastısı – mitingterde aytıp, gazetterde jazıp jürgen sözderimdi köpşilik qoldaydı. Sol – meniñ eñ bastı qazınam!

Qasqırbay 2017-12-21 23:45:35

Ämirjan mırza, bilik auısqan jağdayda, 30 jıl boyı bilikte bolğandardıñ dünie mülkine audit, tekseris jürgizilip, halıqtıñ baylığın jekemenşigi retinde paydalanğandardan el qazınasına wrlanğan aqşa, kölik, villalar men samoletter, yahtalar, bankter, ğimarattar, tağı basqa qarajattardı qaytarıp alu mümkin be, Siz qalay oylaysız, ol kez qaşan tuadı jäne şamamen ol qanşa qarajat boluı mümkin?

-Ärine, ekonomika men sayasatta «kapitaldıñ äuelgi qorlanuı» degen ekiwday wğım bar. Köbinese ol zañsız türde jüzege asadı.

Sondıqtan da jaña bilik kelgen twsta qazirgi oligarhtar öz baylığın qalay jasadı, zañ bwzuşılıq boldı ma, bolmadı ma – sol jağın anıqtaytın täuelsiz sot jüyesi boluı tiis.

Eger de ol baylıq aşıq ta bäsekeles narıq zañdarı boyınşa qwralsa, nesi ayıp? Al adam jemqorlıq pen basqa qılmıstıq äreket arqılı bayısa, ol, sözsiz, öz jazasın aluı tiis!

Mırza 2017-12-22 00:00:47

Ämirjan mırza, bizdiñ el bireulerdiñ jekemenşik memleketi me, qalay oylaysız? Sebebi, «bilikte meniñ öz pikirim joq» dep halıqtı şoşıtıp, türli oyğa salıp jürgender bar. Sonda qazaq memleketi keybireulerdiñ oyınşığı ma?

Bizdiñ bilik basında jürgenderiñ işinde ne eki sözdiñ basın qwray almaytındar, ne qolınan is kelmeytinder, «ağası ne kökesiniñ» ne paranıñ arqasında kar'era jasap kele jatqandar barşılıq. Sondıqtan biliktiñ öz işinde örkenietti bäsekelik orta qalıptastıru kerek. YAğni neğwrlım qabiletti äri eñbekqor kadrlar ösuine mümkindik jasau kerek. Atışulı «komandalıq» principti joyu qajet! Ol princip - nağız traybalizm men jüzşildiktiñ ayqın körinisi, sıbaylas jemqorlıqtı qalıptastıratın naqtı mehanizm!

Qalıptasqan jağdaydı özgertudiñ bir qwralı - jergilikti äkimderdi halıq bop saylau. Deputattar da solay saylanuı tiis. Sonda olar halıqpen sanasa bastaydı.

Jañaözen 2017-12-22 00:09:16

Jañaözende öz halqın jazıqsız öltirgender, olarğa bwyrıq bergender qaşan türmege otıradı, Ämirjan mırza? Maks pen Talğattı bostandıqqa şığaru mümkin be? Ol üşin ne isteu kerek, şetelden kömek swrau kerek pe? Olar bizdiñ eldiñ jağdayın bilmeytin şığar...

-Jañaözen tragediyası äli de öz bağasın alğan joq. Meniñşe, bilik basında osı qılmısqa qatıstı twlğalar otırğan twsta onday bağa alu da mümkin emes. Biraq, bäribir aqiqat aşıladı! Kimniñ atuğa bwyrıq bergeni de elge mälim boladı!

Sayasi sebeptermen türmede jazıqsız otırğan azamattardı da bostandıqqa şığaru kerek. Ol üşin qoğamnıñ belsendiligi joğarı boluı şart, äytpese, el üşin küresken ayaulı azamattardı sottap jatqanda, köbimiz bwğıp qalamız. Bilik sonı bilip, körip otır. Jäne de ädiletti, atqaruşı bilikke eş täuelsiz sot jüyesin qwruımız kerek. Ol üşin sud'yalardı da halıq özi saylap aluı kerek!

Bir Qazaq 2017-12-22 00:13:17

Assalamuağalikum Ämirjan Sağidrahmanwlı ! Qanday memleket bolmasın, onıñ halqı bar. Sol üşin memleket aldına qanday bolmasın, maqsat qoyadı. Halıq bolmasa, memleket te joq. Memleket halıq üşin tikeley qızmet atqaradı. Bizge keletin bolsaq, tolıqqandı olay emes siyaqtı. Iə şükirşilik etemiz. Aspanımız aşıq, tınıştıq zaman. Şükir. Halqımız tınıştıqtıñ qadirin biledi. Degenmen halıqtı oylaytın, şınımen janı aşitın bilik joq. Qımbatşılıq keñirdegiñnen qılqındırıp, twnşıqtırıp bara jatır. Joğarı şarıqtamasa, tömendeytin türi joq. BAQ ökilderi tarapınan aytatın şındıq joq. Olar üşin bəri keremet. Jas otbası qwrğandarğa jasalatın jeñildik joq desekte boladı. Halıqtıñ aqşasınıñ arqasında bankterimiz qwtırıp twr sol aqşanı sol halqımızdıñ özine eselep, payızın qosıp twrıp öz aqşasın özine töletedi. Onı bilikte, BAQ-ta aytpaydı. Qanday memlekettik salamız bolmasın salğırttıq köp. İsteletin jəne istelmegen şaruamız elimizde öte köp. Bolaşağımız qanday boladı? Alañdaytın nərse öte-möte köp. Qazaq halqı tınıştıqtı birinşi orındarğa qoyadı. Siz elimizde köptegen şeşilmegen məselelerdi, bolaşaqta qalay şeşimin tabuımız qajet dep oylaysız?

-Siz qoğamda orın alğan köp problemalardı aytıp otırsız. Mwnıñ bäri aşı şındıq. Biraq bilik onı moyındağısı kelmeydi. Resmi BAQ jüyesi arqılı «qoy üstinde boztorğay jwmırtqalağan» zamanda ömir sürip jatırmız» dep nasihat örbitedi. Alayda oğan özderi de, halıq ta senbeydi! Sondıqtan el işinde «Habarda» körsetetin elde ömir sürgim keledi» degen qanattı sözder tarap ketken.

Qoğamda problema köp. Olardı şeşudiñ jolı barşılıq. Eñ bastı jol mınau: 1995 jıl şeneunikterge öz qolımen berip qoyğan bilikti halıq özine qaytarıp beru kerek! Ol üşin ädil saylau arqılı prezident, deputattardı jäne äkimderdi saylap aluımız kerek. Bir merzimge saylansın, eger de qoldarınan eşnärse kelmese, kelesi saylauda halıq olardı ornına alıp tastaytınday sayasi dästür qalıptastıru kerek. Sonda biliktiñ özi de özgeredi, jemqorlıq azayadı, äleumettik ädilettik ornaydı. Basqa jol joq!

Ottaubay 2017-12-22 00:36:05

Bayqauımşa, sizdiñ wstanımıñız BAQ betinde biliktiñ kemşin twstarın aytıp, sıni maqalar jazu. Selt etpeytin bolsa Atambaevtıñ äygili ayıptaularınan keyin şekaranı jauıp, şekaradan ötetin jazıqsız adamdardı kün wzaq ayaqtarınan tik twrğızıp qoyıp, nege adam ölimine deyin äkep soqtırğanşa azaptadı? "Sıni maqalarğa selt etpeytinder" nege Ämirjannıñ esiginiñ aldına «beton» qwyıp ketip jekswrın tirlik jasap jür?

-Ärkim öz mümkindigine qaraydı. Kezinde RNPK, JSDP, sosın JSDP «Azat» partiyalarınıñ basşılarınıñ biri bop jürgende, ärine, men qazirgiden göri belsendi boldım. El araladıq, jinalıstar ötkizdik, narazılıq akciyaların, sonıñ işinde, mitingiler wyımdastırdıq. Sol üşin arakidik sottalıp, abaqtığa jabılıp jürdik.

Qazir bolsa, mende onday sayasi wyım joq. Sondıqtan da meniki köbinese ağartuşılıq qızmet. Qwday qolıma qalam wstattı. Sondıqtan osı talantımdı halqımnıñ, elimniñ müddesine paydalanıp jürmin. Apta sayın «Dat» jäne «Jas alaş» gazetterinde twraqtı kolonka jürgizip otırmın. Elde, älemde bolıp jatqan oqiğalarğa ün qosuğa tırısıp kelemin.

Al eger de köpşilik qoldap, wyım qwrıp jatsaq, ärine, meniñ de sayasi belsendiligim arta tüspek. Jäne de ol naqtı isterge wlasarı sözsiz. Osığan bir qosarım: bilik şındıq sözdiñ qanşalıqtı ıqpaldı ekenin sezedi, biledi. Sondıqtan da täuelsiz BAQ-tar jabılıp jatır. Täuelsiz pikir ieleri qudalanuda.

Qazir äleumettik jelilerdiñ roli men mümkindikteri kürt artıp ketti. Meniñ ol jelilerdegi qoldauşılarım köp. Biraq odan da köp bolğanın qalar edim. Siz de sol qatarğa qosılıñız. Mäselen, meniñ Facebook-tegi paraqşama jazılıñız, meniñ barlıq jazğan düniemdi sol jerde taba alasız!

Mıltıqpay 2017-12-22 08:41:03

Ämirjan mırza, nege qazaq biligi Qarağandınıñ şahterları bas kötergende auızdarın aşpadı? Sebebi olardıñ arasında orıs wltınıñ azamattarı bolğasın qorıqqandarınan. Resey ondayğa jol bermeytinin bilip, öz azamattarın qorğaytının bilgendikten be, qalay oylaysız? Sonda qazaqtardı öz elinde jazıqsız öltiruge bola ma, qorğaytın sot pen zañ joq pa? Bwl halıqtı mazalap jürgen mäsele. Aşıq jauap bere alasız ba, aşıq jauap beruge qorıqsañız, astarlap tüsindirip beriñizşi.

-Nege aşıq aytpasqa? Aytu kerek! Resmi Kreml'diñ bizdiñ bilikke ıqpalı bar ekenin men joğarıda aytqanmın  (sol jerden oqıp alarsız). Oğan qosarım mınau:

Meniñşe, Jañaözen qırğınınıñ tağı bir astarı boldı. Bilik aldında saylau twrdı. Oppoziciya bir partiya bop birikti. Sondıqtan bizdiñ JSDP «Azattıñ» qauqarı mıqtı edi. Sol üşin bilikke osınday arandatu arqılı «gaykanı» qataytıp tastau kerek boldı dep oylaymın. Äytpese, özim äriptesterimmen birge alañda jeti ay boyına twrğan sol mwnayşılarğa birneşe ret bardım. Olar kelissözge dayın ekenin, tärtip bwzu oylarında joq ekenin aşıq aytıp jattı. Biraq, aqırı osınday qandı qırğınğa wlastı. Sol kezdegi videolarda beybit adamdarğa oq jaudırğan policiya bar da, qolına qaru wstağan mwnayşılar joq! Mine, gäp qayda jatır!

Al Qarağandıdağı jağdaydıñ tüpki sebebi Jañaözen mwnayşılarınıñ talaptarına wqsasa da, bäri beybit türde şeşildi. Siz aytqanday wlttıq faktor boluı da mümkin. Ol jağın da eskeruimiz kerek. Biraq, Jañaözennen keyin bilik işindegiler de oylana bastağan siyaqtı.

Biraq, bir jerdegi tüyin öz şeşimin tapqanımen, bükil Qazaqstan boyınşa layıqtı jalaqı töleu men eñbek adamınıñ qwqın qorğau sekildi irgeli mäseleler äli de sol, şeşilmegen qalpında. Sondıqtan bükil Qazaqstan boyınşa ereuil mäselesi tüpkilikti şeşildi dep men ayta almaymın!

Sorlı qazaq 2017-12-22 10:48:00

Qazaq halqı bärin biledi. Kim qalay bayıp jatqanın, qanday qulıq pen ötirik jasalıp jatqanın... Halıqtıñ qarajatı toyımsız bankterge qwyılıp jatqanın, wrılar men qılmıskerlerdiñ küşeyip alğanın... Osı tizimdi şeksiz jalğastıra beruge boladı. Ämirjan mırza, qalay oylaysız, qanağatsızdıq pen toyımsızdıq, jalañ wrandar men jağımpazdıq, auıspaytın bilik pen halıq tañdamaytın halıq qalauları, tağı da osı siyaqtı qazaq qoğamında orın alğan jağdaylar qaşan joyıladı? Sol kün kelerine, sol kün tuarına senesiz be? Osı jağdaylardı tüzeu, dwrıstau kimniñ qolında? Älde bwl qazaqtıñ mañdayına jazılğan mäñgilik sorı ma?

-Özimiz öz tağıdırımızdı öz qolımızğa almay, eşnärse özgermeydi! Sondıqtan qoğamnıñ belsendiligi artu kerek. Bir sözben aytqanda, divannan twru kerek! Elde bolıp jatqan jemqorlıq pen ädiletsizdik, jağımpazdıq pen astamşıldıq faktileri är azamat tarapınan sınaluı tiis. Ol sın ortaq wyım arqılı bir arnağa toğısıp jatsa, qwba qwp!

Özgerister, sözsiz, boladı! Men soğan senemin! Senbesem, bayağıda-aq oppoziciyadan ketip, basqa tirlikke köşer edim ğoy.

Aman Janıs 2017-12-22 18:01:19

4.Ukraina, Liviya sındı memleketterde orın alğan tolqular men köterilisterge sırtqı küşterdiñ sebep bolğandığı belgili. Halıqtı qwrğaq uädelermen aldap, köşege şığarıp, qanğa böktirgen şeteldik misionerler men Mwhtar Äblyazovtıñ qazirgi ündeulerinde ayırmaşılıq bar ma? Halıqtıñ äleumettik ahualın kötergisi keletin adamnıñ revolyuciya jolın tañdağandığı qanşalıqtı küdik tuğızadı?

-Mäseleniñ eki jağı bar. Birinşiden, bilik özi evolyuciyalıq joldı qoldamasa, erte me, keş pe, revolyuciyağa tap boladı. Qazir el işindegi narazılıq kün sayın eselep, geometriyalıq progressiyamen artuda. Qazan bwrqırap, qaynap jatqalı qaşan! Eşqanday da sırttağı küştersiz-aq halıq bir künde rejimniñ bıt-şıtın şığarıp, kül talqan ete saladı. Tipti oğan oppoziciyalıq partiyalar men kösemderdiñ keregi joq bop qaladı!

Bayqasañız, büginde biliktiñ jaqtası, advokatı bop jürgen, oppoziciyağa eş qatısı joq azamattar eldegi jağdayğa, äsirese, jan-jaqtı jalmap jatqan jemqorlıqqa degen qarsılığın aşıqtan-aşıq bildirude! Onıñ işinde şağın biznes ökilderi de bar.

Ekinşiden, öz basım, Otanımızğa sırttan ıqpal eter kez kelgen kwşke qarsımın. Qazaqtıñ tağıdırın qazaqtan basqa eşkim şeşpeui tiis!

Äblyazov turalı osı jerde jauap berdim, sodan oqıp alarsız. Oğan bir qosarım, kez kelgen sayasatker öz jolın özi tañdaydı. Äblyazovtiki de – özi tañdağan jol. Biraq, eldiñ tolıqqandı qoldauına ie bolu üşin ol öziniñ sotında özine tağılğan ärbir ayıp boyınşa naqtı jauap berui kerek. Jäne de el işinde jürgen oppoziciyanı qaralaudı doğaru tiis. Öytip, abıroy men qoldau tappaydı.

Tron 2017-12-22 22:01:33

Odaqtıñ uaqıtında ideologiyağa köp köñil bölindi. Jazuşı, aqın bolu zor märtebe edi.Tvorçestvalıq intellegenciyanıñ qarındarı toq, köñilderi kök edi.Batıs elderinde basqaşa boldı. Memlekettiñ aqın, jazuşıda şaruası joq. Ne jazam deseñ öziñ bilesiñ. Aqşanı qalay tapsañ da, öz şaruañız.  Siz osı eki joldıñ qaysısı dwrıs deysiz? Bir jağınan wlttıq ideologiyanı damıtu kerek. Halıqtıñ sanasına siñiru kerek. Ekinşi jağınan ökimetten aqşa alıp otırsañ, oğan qarsı birdeñe ayta alasıñ ba?..

-Siz ädebietti qarjılandıru sekildi mäseleni aytıp otırsız. Bwl twrğıda meniñ jeke wstanımım mınaday: memleket äleumettik mañızı bar ädebietti byudjetten qoldauı tiis, oğan balalar, salalıq, bilim men ğılımi jäne basqa taqırıptağı, kommerciyalıq emes şığarmalar jatadı. Meniñşe, talanttı jastardıñ alğaşqı kitaptarın da memleket qoldağanı abzal.

Biraq ömir boyı memlekettik qarjığa ğana täueldi bolu dwrıs emes. Şınayı talanttı oqırman özi izdep tauıp alıp, öz qaltasınan qarjılandıruı tiis! Onday talant iesine demeuşelir de kömek körsetedi, sonıñ arqasında payda tabadı.

Onıñ üstine qazir kitaptıñ elektrondıq nwsqaları, äleumettik jelidegi aluan türli formaları damıp keledi. Ädebiet odan da qalıp qoymauı tiis!

Türikpennen tartıp alğan qıstaudan 2017-12-23 01:25:08

1.Bwğattalğan 22 mlrd astarında ne jatır? 2. Kriptovalyutağa közqarasıñız.

-Bwğattalğan 22 milliard dollardıñ astarında moldavan käsipkeriniñ Qazaqstan narığına kelip, biznes jasauına qoldau körsetken bizdiñ şendilerdiñ aşközdigi men jemqorlığı jatuı mümkin. Sol jağın mıqtap tekserip alu kerek! Jäne de bwl skandal halıqtıñ ortaq qazınası – Wlttıq qordıñ qayda, qay bankterde jäne qanday şarttarğa säykes saqtalıp otır degen saualdı da aldımızğa jayıp salıp otır!

Kriptovalyutağa senimim joq. Qarjılıq avantyurağa wqsaytın siyaqtı. Haipsizdik jağı da tım osal, ötykeni onda barlıq operaciya komp'yuter arqılı jürgiziledi, al qazirgi zamannıñ hakerleri qanday ekenin künde BAQ-tan oqıp, körip jatırmız ğoy! Milliardtar qoldı bop jatır. Onıñ üstine Venesuela sekildi ekonomikalıq qwrdımğa batudıñ aldında twrğan totalitarlıq memleket onıñ wlttıq jüyesin qwruınıñ özi de biraz närseden sır bermey me?

Meyrambay 2017-12-23 15:12:48

Ayta ketetindey jaqsı jañalıqtar bar jıl boldı. Sırtqı sayasatta kelisimgerşilik missiyanı jaqsı atqardıq. Siriyadağı qırğınnıñ, gumanitarlıq katostrofanı bwğalıqtauğa Astana ülken küş saldı. Nätijesi joq emes. Janar-jağarmay "krizisi" men qımbatşılıq arttı. Qırğızstanmen teketres este qaldı...

-Qazaqstannıñ Siriyadağı jağdayğa ıqpalın tım asıra bağalamas edim. Iä, Astanada kelissöz jürgizuge alañ berildi, biraq negizgi şaruanı şeşip jatqan basqa, kepildik berip otırğan elder dep sanaymın.

Jalpı biz özimizdiñ sırtqı sayasi ambiciyasımızdı biraz tejeuimiz kerek siyaqtı. Ne älemdik dinderdiñ dialogın wyımdastıramız dep, qıruar qarjı şığarıp, ter tögip, äurelenemiz. Onday, ğalamdıq qaqtığıstardı şeşetin BWW siyaqtı wyım bar emes pe? Orınsız «sammitşildikten» aulaq bolğan jön dep sanaymın!

Esbolat 2017-12-25 12:26:28

Sapası naşar temekiniñ bağası wşınıp baradı. 2018 jılı tağı qımbattadı degen boljam bar. Sonda temeki şegetin adamdar (zeynetkerler) ne isteydi? Al'ternativa boluı kerek qoy. Arzan tabak şığaru kerek, turbkamen tartatın. Qazaqstanda temeki monopoliyası kimderdiñ qolında ekeni belgisiz. Äytse de, aytayın degenim, sapası – nöl.  Sapası, öte-möte naşar. Köp adamnıñ pikiri – bwl. Keybir sigaretter tap-taza las sasıp jatır. Näjistiñ iisi şığadı. Osı faktini Şelek pen Ötegen batırdağı fabrikalarda jwmıs jasaytındarğa jetkiziñder. Al'ternativa boluı kerek. 21-ğasırda temekiniñ monopoliyası - dwrıs adamnıñ külkisin keltiretin jäyt. Biraq, bizde, äri de bola beredi ğoy. Tañ qalatın eşteñesi joq.

-Temeki sapasına baylanıstı oylarıñız qızıq eken. Onımen tiisti, sapanı baqılauşı organdar aynalısuı tiis! Men temeki tartpaymın, Siz de ol päleni tastañız.

Tima 2017-12-26 01:34:17

Mwhtar Äblyazovtıñ äleumettik jelilerde jariyalap jürgen äleumettik bağdarlamaları, eger ol bilikke kele qalsa is jüzinde orındaluı mümkin be, älde utopiya ma?

-Äblyazovtıñ qazirgi mälimdemelerin ekige böluge boladı. Bilikke qatıstı sının, bilik jüyesin tübegeyli özgertu turalı oylarınıñ denin qoldaymın. Onı biz de talaydan beri aytıp kelemiz.

Onıñ ekonomikalıq problemalarğa qatıstı oyları da orındı. Sonıñ işinde byudjet sayasatına, onı jinau men jwmsauğa qatıstı jaqsı wsınıstarı bar.

Biraq, şınımdı aytsam, keybir ekonomikalıq ideyalarında, äsirese, eñbek aqısın bir sätte köteru degen wsınıstarında populizm bayqalatını da ras. Sondıqtan da ol wsınıstardı da ekonomister jaqsılap bir saraptap aluı kerek dep oylaymın.

Ruslan 2017-12-26 13:06:28

Ämirjan ağa, aldağı prezident saylauına tüsuge dayınsız ba? Saylau turalı jaña zañ talaptarına säykes kelesiz be? Siz jeñseñiz, prem'er-ministr kim boluı mümkin? Sayasatker Serikjan Mämbetälinge degen közqarasıñız qanday?

-Men sayasi oppoziciyada 20 jılday boyına jürmin. Talay saylaularğa qatıstım. Ötken prezident saylauına da tüsu turalı qoğam tarapınan wsınıstar boldı.

Aldağı saylaudıñ erekşe mañızı bar: ol saylau Qazaqstannıñ tayau bolaşağı qanday bolmaq, sonı anıqtap beredi. Ne biz bilik jüyesin özgertip, demokratiyalıq jolğa tüsemiz, ne sol bayağı «nwrlı» jolmen tarihi äri örkeniettik tığırıqqa tirele beremiz.

Öz basım, jasım, täjiribe jäne ömirlik wstanımım boyınşa ol saylauğa tüsuge dayınmın.

Biraq (jäne bwl oyımdı men ılği da aytıp kelemin!) osınday şeşuşi sätte oppoziciya birlesip, biregey kandidat wsınuı kerek dep sanaymın. Bilik bir adam wsınıp, oppoziciya tağı da ırdu-dırdu bop, birneşe adam wsınsa, sözsiz, jeñilemiz. Sol jağın da wğınayıq!

(Jalğası bar)

Abai.kz

5 pikir