Düysenbi, 25 Mausım 2018
Dabıl 1030 14 pikir 9 Aqpan, 2018 sağat 18:03

Nazarbaev Sağıntaevtıñ bayandamasın "samokritika" joq dep sınadı

Bügin QR Prezidenti Nwrswltan Nazarbaevtıñ qatısuımen keñeytilgen Ükimet otırısı ötti. Prem'er-ministr Baqıtjan Sağıntaev Qazaqstannıñ 2017 jılğı äleumettik-ekonomikalıq damu bağıttarı turalı bayandama jasap, Joldaudıñ qalay orındalıp jatqanı jayında mälimetter berdi. Prezident Baqıtjan Sağıntaevtan «soñğı Joldaudı orındau boyınşa ne istediñder?» - dep swradı.

«Soñğı Joldau nätijesi boyınşa Ükimette jalpı wlttıq bağdarlama qabıldandı. Sala-sala boyınşa körsetilgen 10 mindetke säykes är ministrlikke tapsırmalar berildi. Indikatorlar qoyıldı. Jıldıñ soñına deyin tapsırmalar orındalatın boladı», - dep jauap berdi Baqıtjan Sağıntaev.

Memleket basşısı prem'er-ministrdiñ bayandamasına «jaqsı bayandadıñ, biraq samokritika joq» dep bağa berdi.

Keybir äkimder «Ruhani jañğırudı» bwrmalap jatır

QR Prezidenti Nwrswltan Nazarbaev «Ruhani jañğıru» bağdarlamasınıñ qalay orındalıp jatqanın aytıp, birqatar öñirdi sınğa aldı.

«Birqatar öñir «Ruhani jañğıruğa» qatıstı jwmıstarımen tıñğılıqtı aynalısuda. Halıqtıñ köpşiligi bağdarlamanı jaqsı qabıldağanın bilemiz. Al keybir äkimdikter kündelikti özderiniñ jwmıstarın «Ruhani jañğıru» ayasında atqarıp jatırmız dep jariyalaydı. Mısalı, jıl sayınğı merekelik jarıstardı, festival'derdi, sporttıq şaralardı «Ruhani jañğıruğa» jatqıza saladı», - dep toqtaldı Prezident.

Osı orayda Memleket basşısı bağdarlamağa qatıstı bwnday mälimdemeler taza bwrmalau ekenin äri «Ruhani jañğırudıñ» märtebesine nwqsan keltiretinin atap ötti.

«Tükke twrmaytın nısandardı, bayağı qwlap qalğan qabirlerdi, mazarlardı alıp keledi de «mınau sakral'di orın» dep aytadı. Teledidardan kördim. Ol Oñtüstik Qazaqstan oblısında ğoy deymin. Qarataudıñ basında bayağıdan beri ağıp jatqan sarqıramanı birneşe adam barıp kelip, tüsirip «Mınau Qazaqstannıñ sakral'di uçastogi» deydi. Biz olarğa oblıstan birnärse tap dep otırğan joqpız ğoy. Joq bolsa joq, bar närseni aytıp otırmız. Sondıqtan öz mümkindikterin iske asırmay otırğan oblıstar bar. Mısalı, SQO, Mañğıstau, Pavlodar oblıstarı. Qoğamdıq sananı jañğırtu degen bir jılmen ğana şektelmeytin mäsele. Köp jıl jwmıs isteydi. Jaña täsildi talap etetin jwmıs. Bir jılda şeşip tastaymız dep maqsat qoyıp otırğan joqpız. Solay ğoy?»

Elbası degenmen öziniñ mümkindikterin iske asırmay otırğan oblıstar bar ekenin qadap ayttı. Bwl twrğıda Soltüstik Qazaqstan, Mañğıstau, Pavlodar oblıstarında jwmıstardıñ belsendi jürgizilui kerektigin tapsırdı.

Jeñis Qasımbek qayda qarap otır?

Memleket basşısı Nwrswltan Nazarbaev «QazAvtoJol» wlttıq kompaniyasınıñ jwmısın da sınğa aldı.

«Qwqıq qorğau organdarı «QazAvtoJoldıñ» barlıq  basşılığın qamauğa aldı. İşinde aymaqtıq filialdardıñ jetekşileri de bar. Ärine, bwl jaqsılıqtıñ nışanı emes. Osınıñ özi qarjını tiimdi igeru jäne jol sapası boyınşa ülken kemşilikterdiñ bar ekenin körsetip otır. Jeñis Qasımbek (Investiciyalar jäne damu ministri - red.) sonda qayda qaradı? Ne boldı? «QazAvtoJoldıñ» bäri wrı bolıp şıqtı ma?», - dep swradı N.Nazarbaev Ükimettiñ keñeytilgen otırısında.

Ministr Jeñis Qasımbek «QazAvtoJol» wlttıq kompaniyası boyınşa sıbaylas jemqorlıqqa qatıstı qılmıstıq isterdiñ qozğalğanın jetkizdi. Osı orayda, Prezident normativterdi özgertu qajettiligine toqtaldı.

«Jwmıstı orındağanda biz normativke qaraymız. Qazirgi normativ eskirdi. Joldıñ sapasına basa nazar audaru qajet. Äytpese, normativpen saladı, normativpen aqşa aladı. Memlekette aqşa köbeyse, täbetteri de aşıladı. Ministrlik ne üşin kerek? Memlekettik qarjınıñ jwmsaluın qadağalauı qajet. Bwl - seniñ (Jeñis Qasımbektiñ - red) jwmısıñdağı kemşilik», - dedi N.Nazarbaev.

Ayta keteyik, soñğı üş jılda avtomobil' joldarın qwrılısına byudjetten 630 mlrd teñge bölingen.

Ükimettiñ keñeytilgen mäjilisinde Nwrswltan Nazarbaev Qarjı ministrine memlekettik qarızdı azaytudı tapsırdı.

Qarjı qayda qwyılıp jatır? Byudjetke me, älde Wlttıq qorğa ma?  

Memleket basşısı jiın barısında Prem'er-Ministrdiñ orınbasarı Erbolat Dosaev pen Qarjı ministri Baqıt Swltanovqa atalğan bağıttağı jwmıstardı baqılauğa aludı jüktedi.

"Memlekettik qarızdı bir deñgeyde wstau kerek. Wlğaytpay, kerisinşe qalay kemitudi oylastırıp otıru kerek. Är türli jağdaylar boladı, sondıqtan keñ boluğa tiispiz. Qajet kezde qarız alatın mümkinşilik boluı qajet. Keyingi kezde biz qwrılısqa, joldarğa, üy saluğa köbirek alıp jiberdik",  — degen prezident prem'er-ministrdiñ orınbasarı Erbolat Dosaevqa qarjını baqılauğa aludı tasırdı.

Otırısta qarjı ministri Baqıt Swltanov jekeşelendiru barısın bayandadı. Ötken jılı 289 ob'ektiniñ 190-ı 108 milliard teñgege satılğan.

"Qarjını byudjetke me, älde Wlttıq qorğa jiberip jatırsızdar ma?", — dep swradı Nazarbaev.

"Wlttıq qorğa 7,4 milliard teñge saldıq. Biılğı jılı eki aydıñ işinde 7,3 milliard teñge jiberiletin boladı. Bwl bıltır jeltoqsanda satılğan ob'ektilerden tüsken qarajat", — dep jauap bergen ministrge memleket basşısı mwnıñ dwrıstığın ayttı.

Esteriñizge sala keteyik, bügin Qazaqstan Prezidenti Nwrswltan Nazarbaevtıñ törağalımen el Ükimetiniñ keñeytilgen mäjilisi ötti.   Otırıs barısında Ükimet basşısınıñ, birqatar ministrlerdiñ, oblıs äkimderiniñ bayandamaları tıñdaldı.

Abai.kz

14 pikir