Beysenbi, 16 Tamız 2018
Qazaqtıñ tili 1390 7 pikir 20 Säuir, 2018 sağat 10:41

Ministr Süleymenov qazaqşasın tüzep kelipti

Naqtı swraqqa naqtı jauap bere almay Senat Törağası Qasım-Jomart Toqaevtan sın estigennen keyin Wlttıq ekonomika ministri Timur Süleymenovtiñ senatorlardıñ aldına alğaşqı kelui. Esteriñizde bolsa sol jolı «Ministr müdirip qaldı» degen sın maqala berilip, ministrdiñ dayındıqsız kelui qoğam işinde biraz reniş tuğızğan. Aqiqatı kerek, bwl jolı ministr Senatqa dayındalıp kelipti. Qazaqşası da jäp-jaqsı...

Degenmen, bwl jolı da ministr senatorlardıñ sın sadağınan qwtıla almadı. Senattıñ Ekonomikalıq sayasat, innovaciyalıq damu jäne käsipkerlik komitetiniñ törağası A.Beysenbaev «Zañ jobasındağı özgertulerdi reyting körsetkişine jäne käsipkerlikke qatıstı dep ayta almaymız. Zañ jobasında käsipkerlikke mülde qatısı joq salalıq özgertuler de orın alğan. Mısalı, erekşe qorğalatın tabiği aumaqtarda, orman qorın qorğauda, januarlar düniesin qorğauda qanday käsipkerlik boluı mümkin? Ol jerde tek zañ bwzatın brakon'erler boluı mümkin jäne aumaqtağı memlekettik baqılau men qadağalaudı jürgizetin qızmetkerler boluı kerek» , - dep naqtı mısalğa jügine otırıp, kemşilikti aşıp körsetti.

A.Beysenbaevtıñ aytuınşa, zañ jobaların dayındau barısında, jauaptı ökiletti organmen qatar, basqa da salalıq ministrlikterdiñ  birge jwmıs atqaruı öte mañızdı bolsa, ökinişke qaray, zañ jobasımen jwmıs barısında keybir ministrlik ökilderiniñ özderine qatıstı özgeristerdi bilmeytindigi anıqtalğan jäne onı qabıldanğannan keyingi saldarı da zerttelmegen.

Senatorlar aldağı uaqıtta Ükimet reyting körsetkişin jaqsartuğa arnalğan jwmıstardı jüyeli türde jürgizip, zañdarğa reytingke tikeley qatıstı özgertuler engizui qajettigine köñil audardı.

Senator Edil Mamıtbekov aytqan derekter boyınşa, elimizde 20 kodeks qoldanısta, onıñ 19-ına özgerister men tolıqtırular engizildi, sonday-aq 296 arnaulı zañnıñ 266-sına özgeris engizildi. «Bizdiñ oyımızşa, erejelerdiñ köptigi men zañnamağa wdayı özgerister engizu ekonomikanıñ tiimdi damuına kedergi boladı», - degen sın ayttı deputat.

2018 jılğa deyingi esep boyınşa Qazaqstan 190 el arasında 36-şı orınğa ie boldı. Jaqsı nätije siyaqtı körinedi. Sonımen qatar, Qazaqstan mınaday körsetkişter boyınşa: «Salıq» 50-şi, «Qwrılısqa rwqsat alu» 52-şi, «Elektr jelilerin qosu» 70-şi, «Nesie alu» 77-şi, «Halıqaralıq sauda» 123 orındı ielenip, artta qalıp keledi.

Senator Dulat Qwsdauletov zañnamağa özgerister engizu men baqılau-qadağalau mindetin qısqartu şaraları eş ketken eñbekke baladı. Senator bwl şaralar uaqıtşa äser etetini turalı pikirin aytıp, Ükimetti biznespen jwmıs strategiyasın qayta qarauğa jäne odan da tiimdi jwmıs ädisterin izdestiruge şaqırdı.

Degenmen, ministr senatorlardıñ sınına tötep berdi. Söytip, eskertuler men wsınıstardıñ bäri özekti ekeni aytılıp, zañ jobasın äzirleuşiler olardı aldağı uaqıtta Ükimette äzirlenip jatqan jäne Mäjilistiñ qarauına wsınılğan basqa zañ jabalarında, basqa normalıq-qwqıqtıq aktilerdi äzirleu barısında eskeruge kelisti.

Ministr senatorlardıñ sın sadağına ilikkenimen, bwl jolı Senattan köñildirek şıqtı. Keypinde bir senimdilik bar. Däl osı betinen taymasa, birer jılda esep-qisaptı qazaqşa suşa sapıratın  türi bayqaladı. Köz timesin. Öz tilin ögeysinip jürgenderdi osılay Toqaevşa silkip-silkip qoyğannıñ ziyanı joq siyaqtı ğoy.

Ädilbek Qaba

Abai.kz

7 pikir