Düysenbi, 25 Mausım 2018
Din men tin 1349 1 pikir 9 Mausım, 2018 sağat 16:17

Darhan Käletaev: Keybir toptar Zañ jobasına baylanıstı jalğan mälimet taratıp jür

Ötken säuir ayında QR Din isteri jäne azamattıq qoğam ministri bolıp tağayındalğan Darhan Käletaev vedomstvonıñ qızmetine qatıstı mäselelerdi retteuge belsene kirisip ketti. Ol ötkende Parlamentte «Dini qızmet jäne dini birlestikter turalı» Zañğa tolıqtırular engizilgen jobanı Mäjilis deputattarınıñ aldında qorğap şıqtı. Bwl jobada “destruktivti dini ağım”, “dini radikalizm” wğımdarı bar.

“Bwl wğımdardı engizu sonımen birge destruktivti dini ağımdardıñ taraluı jäne olardıñ atributtarı men sırtqı belgilerine tıyım salu - qoğamğa böten ideologiyanıñ enuine toytarıs beruge mümkindik tudıradı” degen edi zañ jobasın deputattarğa tanıstırğan Din isteri jäne azamattıq qoğam ministri Darhan Kaletaev. Atalğan zañ jobasın jamağatqa tüsindiru äri aymaqtağı dini ahualdı saraptap, din ökilderimen swhbat qwru üşin ministr Aqtöbe oblısına bardı.

 

«Bet-älpetti jauıp jüru qazaq halqına jat»

Sapar ayasında ministr aldımen oblıs ortalığınan 220 şaqırım qaşıqtıqta ornalasqan Temir audanına qarastı Keñqiyaq, Şwbarşi auıldarına barıp, jergilikti twrğındarmen kezdesti. Onda Darhan Käletaev dini saladağı memlekettik sayasattıñ basımdıqtarın tüsindirip, halıqpen pikir almastı.

Kezdesu barısında ministr din salasındağı zañnamada bet-älpetti jabuğa tıyım saludıñ ne sebepti engizilip otırğanın ayttı.

«Bet-älpetti jabu qazaq halqına jat. Bwl tarihımızda da, mädenietimizde de bolmağan. Sondıqtan äyelderdiñ bet-älpetin jabuına zañdı türde tıyım salıp otırmız. Bwl twrğıda qoğamda dwrıs pikir bar, köpşilik qoldap otır», - dedi D. Käletaev.

 

Mektep talabımen säykespeytinder qaşıqtıqtan oqi aladı

Sonımen qatar, Din isteri jäne azamattıq qoğam ministri mektepte oramal tağu mäselesine oray öz pikirin bildirip, mekteptiñ talabın wstanu qajettigin basa ayttı.

Darhan Käletaevtıñ aytuınşa, osınday talappen qatar, onıñ al'ternativti jolı da bar. Onıñ biri – qaşıqtıqtan oqıtu tehnologiyaların paydalana otırıp üyde oqıtu. Ministr bwl mäsele boyınşa Bilim jäne ğılım ministrimen pikirlesip jatqanın jäne bwl bağıtta jwmıstardıñ jalğasıp jatqanın atadı.

Aqtöbe öñirine sapar barısında ministr Temir audanınıñ ortalığında audan aktivimen jäne ardagerlermen, teolog-imamdarmen, sonımen qatar, audandıq terrorizmge qarsı komissiya müşelerimen kezdesti.

 

Zañ jobası turalı jalğan mälimet taratıp jürgender bar

Din isteri jäne azamattıq qoğam ministri Alğa audanındağı Bestamaq auılında bolıp, Aqtöbe oblısındağı Qazaqstan mwsılmandarı dini basqarmasınıñ imamdarımen kezdesti. Ministr öz sözinde «Dini qızmet jäne dini birlestikter turalı» Zañğa tolıqtırular engizu qajettiligin uaqıttıñ özi körsetip otırğanın ayttı.

«Keybir toptardıñ osı zañnama jobasın «islam dininiñ müddelerine qayşı keledi, mwsılmandarğa qarsı bağıttalğan» degen jalğan mälimet taratıp jürgenin de jasıruğa bolmaydı. Bwl mälimetter mülde negizsiz», - dep mälidedi D. Käletaev. Osı rette, ministr imamdardı zañnama jobasına barınşa qoldau bildirip, atalğan zañ jobasınıñ paydasın, artıqşılıqtarın halıqqa tolıqtay tüsindiruge atsalısuğa şaqırdı.

Darhan Käletaev din salasında imamdarmen birlese atqaratın jwmıstıñ negizgi altı bağıtına toqtalıp ötti. Olar: teris dini ağımdardıñ qızmetine tosqauıl qoyu; destruktivti dini ağımdarmen jwmıs jürgizetin imamdar men teologtardıñ bilimi men biligin köteru; dini ekstremizm men radikalizm ideyaları taraluınıñ aldın aluğa qatıstı aqparattıq-tüsindiru jwmıstarına twrğındardı keñinen qamtu; jastardıñ boyında radikaldıq ideyalarğa qarsı nöldik immunitetti qalıptastıru; meşit imamdarınıñ uağızın «Uağız aytudıñ birıñğay tärtibinde» bekitilgen qağidat boyınşa jüzege asıru; «Meşitterdiñ işki tärtip erejesin» jetildiru.

Darhan Käletaev destruktivti dini ağımdarmen jwmıs jürgizetin imamdar men teologtardıñ bilimi men biligin köterude Dini Basqarmanıñ Aqtöbe oblısındağı uäkildigine jergilikti imamdar men teologtardıñ rezervin qalıptastırudı wsındı. Qalıptasqan rezerv boyınşa «Nwr-Mübarak» universitetine biliktilikti köteruge imamdar men teologtar jiberilip otıratın boladı.

QR Din isteri jäne azamattıq qoğam ministri Darhan Käletaev Aqtöbe oblısına jwmıs saparı ayasında Temir audanınıñ ortalığındağı «Dosjan işan» meşitiniñ jäne Alğa audanındağı «Aqtöbe medrese» kolledjiniñ qızmetterimen tanıstı.

Esteriñizge sala keteyik, «Dini qızmet jäne dini birlestikter turalı» Zañnıñ jobasında memlekettik qızmetkerlerdiñ dini äreketterine baylanıstı punkter bar. Atap aytqanda, zañ jobası boyınşa mına äreketterge tıyım salınğan: qızmettik mümkindikti dini birlestiktiñ müddesine paydalanbau, qaramağındağılardı dini qızmetke mäjbürlemeu jäne dini birlestik qwrmau nemese müşesi bolmau.

Bwdan bölek, zañ jobasında dini birlestikterdiñ qızmetin baqılau, jazalau mekemelerindegi sottaluşılardıñ dini äreketin retteu, şetelde dini bilim aluğa qatıstı mäseleler qamtılğan.

Joba qoğamdıq orındarda niqab kiyuge, qwlşılıq etu orındarınan bölek jerde neke qiyuğa tıyım saladı. Bwl talaptardı bwzğandarğa ayıppwl salınadı.

Abai.kz

1 pikir