Düysenbi, 1 Mausım 2020
COVID-19 QAZAQSTANDA. Jwqtırğandar — 10858. Jazılğandar — 5404. Qaytıs bolğandar — 41
«Soqır» Femida 4142 5 pikir 2 Şilde, 2018 sağat 12:25

Jat qolındağı balalarımdı "tartıp äperuiñizdi" swraymın, Bektwrğanov mırza!

Atırau oblıstıq sotınıñ törağası

Marğwlan Jwbanışwlı Bektwrğanov

mırzağa

 

AŞIQ HAT

Qwrmetti, Marğwlan Jwbanışwlı!

Men Medet Kerimbaywlı Nadirov 6 aydan beri öz balalarımdı qamqorlığıma ala almay Almatı men Atıraudıñ arasında sabılıp jürmin.

QR-nıñ "Neke (erli-zayıptılıq) jäne otbası turalı" Zañnıñ 75 babına säykes äreket etip, Jıloy audandıq sotına şağımdanğan edim. Biraq, zañ men jağımda bola twra is sozbaqtalıp ketti. Tipti, qazir jat qolındağı balalarımdıñ ömir qauipsizdigine alañdap jürmin. Meniñ alañdauıma negiz bolatın sebepter de joq emes.

Qoş! Tüsinikti bolu üşin basınan bastayıq.

Men Gauhar Serikqızı Düysenbaevamen 2006 jıldıñ qırküyeginiñ 6-jwldızında zañdı nekege twrıp, otbası qwrdım. Eki balalı bolğannan keyin 2010 jılı Jıloy audandıq sotınıñ şeşimimen ajırasıp kettik.

2017 jıldıñ 27 jeltoqsanında äyelim Gauhar Düysenbaeva ömirden ozdı.

Sodan keyin balalarımnıñ bolaşaq tağdırına alañdap, QR Zañdarınıñ negizinde öz qamqorlığıma almaq bolıp, izdene bastadım.

Qazir kämlettik jasqa tolmağan qızım men wlımdı nağaşı äjesi Gülbahram Raqımqızı Düysenbaeva zañğa qayşı bolsa da, mağan qaytarmay, tipti meniñ äkelik qwqığımdı şektep, oyına kelgenin isteude. Enem özi vahtalıq jwmıs jasaydı. Ol kisi aylap jwmısqa ketkende balalarım özderine müldem tuıstıq qatınası joq adamdardıñ qolında qaladı. Örimdey qızımnıñ tağdırın jat adamdardıñ tas talqan etpesine kim kepildik beredi? Onıñ üstine wlımnıñ, öz qanımnıñ kim köringenniñ esiginiñ aldında jürgenin qalamaymın.

Men aldımen balalarımdı alğım keletinin aytıp, Gülbahram Raqımqızı Düysenbaevağa auızşa wsınıs jasadım. Biraq, jauapker nağaşı äjesi tübegeyli qarsı bolıp, balalarımmen kezdesuime tiım saldı. Mektepten keyin botaqandarımdı menimen kezdestirmeu üşin üyden şığarmay, qamap wstadı.

Qazir öz balalarımdı özime qarsı qoyıp, türli äreket jasap, tipti telefonmen söylesuimizge tiım salıp otır. Men balalarımnıñ amandığın bile almay, uayımdap jürmin.

Osı uaqıtqa deyin Almatıdan Atırauğa birneşe ret barıp, balalarımmen jolığa almay qayttım. Kelinşegim bar kezde bizde mwnday problema bolğan emes. Qalağan uaqıtımda bala-şağammen kezdesip, olardı demalıs sayın üyime äketetinmin. Jat bolıp ketpesin dep, öz tuıstarın aralatatınmın.

Balalarım jazğı demalıstı asığa kütetin. Olar demalısqa şığa salısımen Atırau - Almatı poyızına minetinbiz de, tuğan jerlerine tartıp otıratınbız. 

2010 jılı nekemiz bwzılğanımen 2013 jılı äkelik mindetimdi orındap, balam beske tolğanda mwsılmandıq jolmen sündetke otırğızıp, toy jasadım. 

Balalarımnıñ ötinişimen Astanağa arnayı barıp, qıdırğan edik. Täuelsiz eldiñ wlandarı qazir kimniñ üyinde köz türtki bolıp jürgenin oylasam, jüregim auıradı.

Esiktegi "Altın adam" mwrajayı. Men wrpağımnıñ el tarihın bilip öskenin qalaymın!

2018 jıldıñ 21 mausımında balalarıma tağı bardım. Olardı taba almağan soñ, şıdamım tausılıp, zañ qızmetkerlerine jüginuge tura keldi. Men 102-ge qoñırau şalıp, balalarımdı tauıp beruin talap etip edim, arada köp uaqıt ötpey-aq belgisiz adamdar balalardı dereu äkep berdi.

Olardı tamaqtandırıp, äñgimeleseyin degen nietpen kafege qaray jolğa şıqqanımız sol edi E765 CWM Vaz avtoköligi bizdi qısıp jol jiegine toqtattı da, qasımdağı joldasım ekeumizdi soqqığa jığıp, balalarımdı qaytıp tartıp alıp ketti (Qwday onıñ betin arı qılsın, eger de Sizdiñ nemereleriñizdi tanımaytın bireuler däl osılay küş körsetu arqılı tartıp äketse, qanday küyde bolar ediñiz).

Osılay Gülbahram Raqımqızı Düysenbaeva mağan älimjettik jasau jäne psihologiyalıq qısım körsetu arqılı QR azamatı retindegi qwqığımdı ayaqqa taptap otır.

Jıloy audandıq sotı da meniñ Zañ boyınşa talabımnan kinärat taba almağan soñ, aqırı "ötinişti dwrıs jazbağansıñ" dep alğaşqı isti dwrıs qarağan joq. Men arızımda "balalarımdı qaytarıp äperuiñizdi swraymın" dep jazğan edim. Al, sottıñ aytuına qarağanda "tartıp äperuiñizdi swraymın" dep talap etuge tiis ekenmin.

Osı bir söylemge bola 6 ay Almatı men Atıraudıñ arasında tabanım tozdı. Endi, qanday sıltau tabatındarın, ol sıltaumen qanşa ay jügiretinim jäne belgisiz. Men Atırau oblıstıq sotına şağımdandım. Endi osı şağımım dwrıs qaralıp, ädildikke jetemin degen oydamın.

QR Zañı men jağımda bola twra, däl osılay isti sozbaqtau kimge, ne üşin qajet bolıp twr? Osığan jauap beretin Atırau oblısında adam bar ma? Bükil Qazaqstan aumağında däl osınday mäsele sotsız-aq oñ şeşilip jatadı eken. Mağan kelgende nelikten is kürdelenip ketti? Mwnıñ astarında sıbaylas jemqorlıq jatqan joq pa?

Qwrmetti, Marğwlan Jwbanışwlı!

Men Sizden kämelettik jasqa tolmağan balalarımdı QR-nıñ "Neke (erli-zayıptılıq) jäne otbası turalı" Zañnıñ 75 babına säykes jat qolındağı balalarımdı "TARTIP ÄPERUİÑİZDİ" swraymın! Sizge bwlay ötiniş jazu sebebim, meniñ bwl jolğı dwrıs jazılğan talap arızımnan da kinärat şığuı mümkin. Tipti, sot kezinde meniñ jüykeme tietin türli äreketter orın alıp jatadı. Almatı men Atıraudıñ arasın eskermesten sotqa bir kün qalğanda şaqırtu jiberedi. Men sonda da bar mümkindigimdi paydalanıp, küresip kelemin. Säl sürinsem, qarsı tarap balalarımdı mäñgilikke tartıp aludan tayınbaytın sekildi. Sot barısı beyne-taspağa tügeldey jazılıp aluğa tiis. Nege ekenin bilmeymin keyde meniñ uäjdi sözderim bastalğanda video-jazba avtomattı türde toqtatılıp tastaladı. Osınıñ özinen-aq, meniñ bwl mäseleni aqparat qwraldarı men qoğam belsendilerin aralastırmay şeşe almaytınımdı añğardım. 

Sondıqtan da aldımen Sizge Aşıq hat jazıp otırmın. Meniñ şırılıma qwlaq asıp, QR Zañı is jüzinde orındaluın talap etseñiz eken.

Sälemnen Medet Kerimbaywlı

Abai.kz

5 pikir