Jeksenbi, 17 Aqpan 2019
Osı ğoy endi... 1182 13 pikir 20 Jeltoqsan, 2018 sağat 09:31

Qostanay jaña jıldıq şırşanı Mäskeuden satıp alğan

Qostanayda jıl sayın mindetti türde qaytalanatın, onıñ eş uaqıtta mwrtı bwzılmaytın «özindik dästüri» bar. Ol elimizde jeltoqsan ayı bastalısımen, Twñğış Prezident küni atalıp ötisimen-aq Jaña jılğa dayındıq ile-şala bastalıp ketedi. Mine, biıl da solay boldı.

Özimizde eşteñe öspeytindey-aq Jaña jıldıñ anau-mınau emes alıp şırşasın Reseydiñ Mäskeu qalasınıñ janındağı ormannan atasınıñ qwnın berip satıp aldı. Sodan beyne bireu erekşe asıqtırğanday onı qalanıñ däl ortasına äkelip ornatıp ta qoydı. Onısımen twrmay osı merekeni toylauğa baqanday 22 million teñge bölinetinin de jwrtşılıqqa jariya etip, aydı aspanğa bir-aq şığardı. Onısımen qoymay Jaña jıl esik aşqanda aspanğa atqılaytın ot şaşuğa 2 millionna astam teñge jwmsalatın mırzalığın da jasırmadı. «Mwrnıñ barda bir pısqır» degen osı bolar.

Minekey, jaña jıl qarsañında elimizdiñ bastı merekesi - Täuelsizdik meyramınıñ bar ekenin bizdiñ şeneunikter müldem esten şığarıp alğan sıñaylı. «Äy deytin äje, qoy deytin qoja» bolmağan soñ, oylarına kelgenin istep baqtı, eñ soraqısı osı dürbeleñge bizdegi qwqıq qorğau organdarınıñ da qosılıp ketkeni boldı. Özgesi-özge bizdiñ oblıstıq policiya departamentiniñ basşılarınıñ ne oylağanın kim bilsin, olar ğimarattıñ wşar basına «2019» degen jazu jazıp,  mañdayşasına Jaña jılmen qwttıqtaytın plakattı ilip tastap, mäz bolıp jürdi. Biz mwnı Täuelsizdik merekesinen biraz uaqıt bwrın körip, jağamızdı wstadıq. Al bizdiñ bastı merekemizben qwttıqtauğa jer de, plakat ta taptaptı. Sonda bwl memlekettik mekeme, elimizdiñ byudjetinen qarjılındırılatın wyımnıñ sol memlekettiñ merekesin mensinbegeni me? Älde onı atap ötudi qajet emes dep eseptegeni me?

Oblıstıq policiya departamentiniñ ğimaratı

«Quırdaqtıñ kökesin tüye soyğanda köresiñ» degendey soraqılıqtıñ kökesin osındağı oblıstıq prokuratura ğimaratınan kezdestirdik. Mwnda da täuelsizdik merekesinen göri Jaña jıldı mañızdıraq köretinin bayqadıq. Sonda deymiz-au, zañnıñ qatañ saqtaluın qadağalaytın organnıñ özi memlekettik qana emes, jalğız ğana wlttıq merekemizge mwrnın şüyirip qaraytın bolsa, özgelerge ne jorıq?

Oblıstıq prokuratura osılay bezendirilgen

Mine, Täuelsizdik merekesinen biraz uaqıt bwrın qalamızdı aralağanda bizdegi qwqıq qorğau organdarınıñ merekelerimizge degen közqarası osınday ekenin bayqadıq. Til wşımızğa qazekemniñ «Sengen serkem sen bolsañ» degen qanattı sözi orala berdi.

Jaybergen Bolatov, Qostanay

Abai.kz

13 pikir