سەنبى, 23 اقپان 2019
وسى عوي ەندى... 1199 13 پىكىر 20 جەلتوقسان, 2018 ساعات 09:31

قوستاناي جاڭا جىلدىق شىرشانى ماسكەۋدەن ساتىپ العان

قوستانايدا جىل سايىن مىندەتتى تۇردە قايتالاناتىن، ونىڭ ەش ۋاقىتتا مۇرتى بۇزىلمايتىن «وزىندىك ءداستۇرى» بار. ول ەلىمىزدە جەلتوقسان ايى باستالىسىمەن، تۇڭعىش پرەزيدەنت كۇنى اتالىپ وتىسىمەن-اق جاڭا جىلعا دايىندىق ىلە-شالا باستالىپ كەتەدى. مىنە، بيىل دا سولاي بولدى.

وزىمىزدە ەشتەڭە وسپەيتىندەي-اق جاڭا جىلدىڭ اناۋ-مىناۋ ەمەس الىپ شىرشاسىن رەسەيدىڭ ماسكەۋ قالاسىنىڭ جانىنداعى ورماننان اتاسىنىڭ قۇنىن بەرىپ ساتىپ الدى. سودان بەينە بىرەۋ ەرەكشە اسىقتىرعانداي ونى قالانىڭ ءدال ورتاسىنا اكەلىپ ورناتىپ تا قويدى. ونىسىمەن تۇرماي وسى مەرەكەنى تويلاۋعا باقانداي 22 ميلليون تەڭگە بولىنەتىنىن دە جۇرتشىلىققا جاريا ەتىپ، ايدى اسپانعا ءبىر-اق شىعاردى. ونىسىمەن قويماي جاڭا جىل ەسىك اشقاندا اسپانعا اتقىلايتىن وت شاشۋعا 2 ميلليوننا استام تەڭگە جۇمسالاتىن مىرزالىعىن دا جاسىرمادى. «مۇرنىڭ باردا ءبىر پىسقىر» دەگەن وسى بولار.

مىنەكەي، جاڭا جىل قارساڭىندا ەلىمىزدىڭ باستى مەرەكەسى - تاۋەلسىزدىك مەيرامىنىڭ بار ەكەنىن ءبىزدىڭ شەنەۋنىكتەر مۇلدەم ەستەن شىعارىپ العان سىڭايلى. «ءاي دەيتىن اجە، قوي دەيتىن قوجا» بولماعان سوڭ، ويلارىنا كەلگەنىن ىستەپ باقتى، ەڭ سوراقىسى وسى دۇربەلەڭگە بىزدەگى قۇقىق قورعاۋ ورگاندارىنىڭ دا قوسىلىپ كەتكەنى بولدى. وزگەسى-وزگە ءبىزدىڭ وبلىستىق پوليتسيا دەپارتامەنتىنىڭ باسشىلارىنىڭ نە ويلاعانىن كىم ءبىلسىن، ولار عيماراتتىڭ ۇشار باسىنا «2019» دەگەن جازۋ جازىپ،  ماڭدايشاسىنا جاڭا جىلمەن قۇتتىقتايتىن پلاكاتتى ءىلىپ تاستاپ، ءماز بولىپ ءجۇردى. ءبىز مۇنى تاۋەلسىزدىك مەرەكەسىنەن ءبىراز ۋاقىت بۇرىن كورىپ، جاعامىزدى ۇستادىق. ال ءبىزدىڭ باستى مەرەكەمىزبەن قۇتتىقتاۋعا جەر دە، پلاكات تا تاپتاپتى. سوندا بۇل مەملەكەتتىك مەكەمە، ەلىمىزدىڭ بيۋدجەتىنەن قارجىلىندىرىلاتىن ۇيىمنىڭ سول مەملەكەتتىڭ مەرەكەسىن مەنسىنبەگەنى مە؟ الدە ونى اتاپ ءوتۋدى قاجەت ەمەس دەپ ەسەپتەگەنى مە؟

وبلىستىق پوليتسيا دەپارتامەنتىنىڭ عيماراتى

«قۋىرداقتىڭ كوكەسىن تۇيە سويعاندا كورەسىڭ» دەگەندەي سوراقىلىقتىڭ كوكەسىن وسىنداعى وبلىستىق پروكۋراتۋرا عيماراتىنان كەزدەستىردىك. مۇندا دا تاۋەلسىزدىك مەرەكەسىنەن گورى جاڭا جىلدى ماڭىزدىراق كورەتىنىن بايقادىق. سوندا دەيمىز-اۋ، زاڭنىڭ قاتاڭ ساقتالۋىن قاداعالايتىن ورگاننىڭ ءوزى مەملەكەتتىك قانا ەمەس، جالعىز عانا ۇلتتىق مەرەكەمىزگە مۇرنىن ءشۇيىرىپ قارايتىن بولسا، وزگەلەرگە نە جورىق؟

وبلىستىق پروكۋراتۋرا وسىلاي بەزەندىرىلگەن

مىنە، تاۋەلسىزدىك مەرەكەسىنەن ءبىراز ۋاقىت بۇرىن قالامىزدى ارالاعاندا بىزدەگى قۇقىق قورعاۋ ورگاندارىنىڭ مەرەكەلەرىمىزگە دەگەن كوزقاراسى وسىنداي ەكەنىن بايقادىق. ءتىل ۇشىمىزعا قازەكەمنىڭ «سەنگەن سەركەم سەن بولساڭ» دەگەن قاناتتى ءسوزى ورالا بەردى.

جايبەرگەن بولاتوۆ، قوستاناي

Abai.kz

13 پىكىر