Särsenbi, 16 Qañtar 2019
641 1 pikir 10 Qañtar, 2019 sağat 17:13

«Nwr Otan» jas önertapqıştardı marapattadı

Bügin «Nwr Otan» partiyası jas önertapqıştar arasındağı respublikalıq «NURINTECH» innovaciyalıq jobalar bayqauınıñ qorıtındısın jariyaladı.

Jas ğalımdardı jeñisterimen qwttıqtağan partiya Törağasınıñ Birinşi orınbasarı Mäulen Äşimbaev olardıñ ğılımi jwmıstarı layıqtı jalğasın tauıp, el damuına öz ülesin qosatınına senim bildirdi.

– Bayqau Elbası, «Nwr Otan» partiyasınıñ Törağası Nwrswltan Nazarbaevtıñ tikeley tapsırmasımen qolğa alınğan joba. Onıñ bastı maqsatı talanttı, bolaşağınan ümit küttiretin, ğılım men innovaciyada tıñ ideyalardı qolğa alıp, jwmıs istep jürgen jastarımızdı qoldau, olarğa öz bastamaların tabıstı jüzege asıruğa jağday tuğızu, – dedi Mäulen Äşimbaev.

Sonımen qatar ol marapattau saltanatınıñ «Astana Hub» İT-startaptar tehnoparkinde ötui de tegin emes ekenin ayttı.

– «NURINTECH» bayqauınıñ jeñimpazdarın marapattaudı osı alañda ötkizu arqılı jas novatorlarğa «Astana Hub» alañın körsetip, onıñ mümkindigimen tanıstırudı maqsat twttıq. Sondıqtan aldağı uaqıtta jastarımız öz jobaların osı alañda äri qaray damıtıp, keñeytip, keşendi türde iske asıradı dep senemiz, – degen Mäulen Äşimbaev jıl sayın bayqauğa qatısuşılardıñ qatarı ösip kele jatqanın jetkizdi.

Öz sözinde «Nwr Otan» partiyası Törağası Birinşi orınbasarı jastarğa öz küşterine senip, oyları men ideyaların jüzege asıru jolında tabandılıq tanıtıp, armanına jetu üşin ayanbay eñbek etu kerektigin de ayttı.

Biıl qatarınan üşinşi ret wyımdastırılğan bayqauda üş atalım boyınşa jeñimpazdar men jüldegerler anıqtaldı. Barlıq jeñimpazdar men jüldegerlerge qarjılay sıylıqtar tabıs etildi. Naqtı aytqanda, 1-orın alğan jas ğalımdarğa 1 million teñge sıyaqı tağayındalsa, 2-orın iegerlerine – 500 mıñ, 3-orın alğan önertapqıştarğa 250 mıñ teñgeden berildi. Bayqaudıñ jalpı jülde qorı 5 million teñgeni qwradı. Odan bölek, qostanaylıq 11-sınıp oquşısı Petr Şilov bayqaudıñ arnayı jüldesi – Halıqaralıq aqparattıq tehnologiyalar universitetiniñ grantın wtıp aldı.

Abai.kz

1 pikir