Särsenbi, 20 Naurız 2019
966 0 pikir 11 Qañtar, 2019 sağat 13:20

Qazaqstanda WBT 15–20 qañtar aralığında aqılı negizde ötkiziledi

Qazaqstanda wlttıq birıñğay testileu jılına 4 ret — qañtar, naurız, mausım, tamız aylarında ötkiziletin boladı. Testileu aqılı negizde ötedi, qwnı — 2242 teñge. Bilim jäne ğılım ministrliginiñ aqparatına säykes, 2019 jılı WBT formatı özgerissiz qalmaq. 

Qañtar, naurız, tamız aylarında ötetin testileuge qatısu arqılı oquğa tüsuşi JOO-nıñ aqılı bölimine qwjat tapsıra aladı. Qañtarda şekti balın jinağan testke qatısuşı WBT sertifikatımen JOO-ğa tek kommerciyalıq negizde oquğa tüse aladı: şekti balın jinasa bolğanı. Sonımen qatar, WBT-nı qañtarda tapsırğandar negizgi WBT-nı mausım ayında da tapsıra aladı jäne memlekettik bilim beru granttarın beru konkursına qatısa aladı.

«Memlekettik bilim beru granttarın tağayındau boyınşa ötetin konkursqa qatısu üşin mindetti türde 2019 jılğı mausım-şilde aylarında ötetin Wlttıq birıñğay testileuge qatısu qajet. Testileuge qatısuğa ötinim beru üşin twrğılıqtı tirkelgen jeri boyınşa wlttıq testileu ortalığınıñ WBT ötkizu punkterine jüginu qajet», — delingen QR BĞM materialdarında. 

2019 jılğı WBT formatı eş özgerissiz qalatının atap ötken jön. Oquğa tüsuşi dästürli türde 3 mindetti pän (Qazaqstan tarihı, matematikalıq sauattılıq, oqu sauattılığı) jäne 2 beyindik pän boyınşa testileuden ötedi.

Qañtar, naurız aylarında ötetin testileudi talapker WBT ötkiziletin özine ıñğaylı kez-kelgen punktide tapsıra aladı. Tek testileuge qatısu üşin WBT ötkizu punktine körsetilgen merzimde ötiniş beru qajet.

Eske sala keteyik, 2018 jıldan bastap är tülekke WBT sertifikatımen birge, bilim beru bağdarlamalarınıñ tizimi, bölingen granttardıñ sanı, sonday-aq, ötken jılğı granttar konkursınıñ nätijeleri jazılğan aqparattıq paraqşa beriledi. Atalğan aqparattıq paraqşa tülekke öziniñ bolaşaq mamandığın tañdau kezinde kömek boladı.

Joğarı oqu orındarınıñ akademiyalıq jäne basqaru derbestigin keñeytu maqsatında birqatar özgerister engizildi. 2019 jıldan bastap mamandardı dayarlau bağıttarınıñ jaña klassifikatorı engizilip otır. Bügingi künge deyin elimizdiñ joğarı oqu orındarında mamandıqtardıñ tizimi naqtı körsetilgen klassifikator paydalanılğan bolatın. Endigi kezekte mamandardı dayarlau bağıtı körsetiletin boladı. Säykesinşe, elimizdiñ joğarı oqu orındarı derbes bilim beru bağdarlamaların äzirleydi.

Osığan oray, memlekettik bilim beru granttarı bilim beru bağdarlamalarınıñ toptarı boyınşa tağayındalatın boladı. Mäselen, «Matematika päni mwğalimderin dayarlau» tobına «Matematika», qosarlanğan «Matematika-Fizika», «Matematika-Informatika» mamandıqtarı kiredi. Al, «Aqparattıq tehnologiyalar» tobına — «Informatika», «Aqparattıq jüyeler» jäne t.b. YAğni, bilim beru granttarınıñ tağayındaluı bwrınğıday mamandıqtar boyınşa emes, bilim beru bağdarlamalarınıñ toptarı boyınşa jüzege asırılatın boladı. Grant wtıp alğan soñ oquğa tüsuşi (talapker) JOO-ğa tañdağan bilim beru bağdarlaması boyınşa tirkelip, JOO-ğa qwjattarın tapsıru kezinde tañdap alğan mamandığı boyınşa bilim alatın boladı.

Elbası «100 naqtı qadam» wlt josparında Nazarbaev Universitetiniñ täjiribesin eskere otırıp, JOO-lardıñ akademiyalıq jäne basqaruşılıq derbestigin kezeñ-kezeñimen keñeytudi qamtamasız etudi tapsırdı. Akademiyalıq erkindik — bilim beru sapasın arttıru bağdarlamalarınıñ mazmwnın derbes anıqtau boyınşa JOO-larğa ökilettik beru. Bwl bilikti kadrlar men jaña mamandıqtarğa degen swranıs uaqıt ötken sayın artıp kele jatqan jaña ekonomikağa köşu jağdayında asa mañızdı.

Wlttıq birıñğay testileu — Qazaqstan Respublikasında qoldanılatın mektep bitiruşilerdiñ bilimin bağalau jüyesi. WBT-nıñ nätijesi qabıldau emtihanı retinde kolledjderde, JOO-larda eseptelinedi. Sonday-aq, WBT-nıñ baldarı «Bolaşaq» prezidenttik stipendiyasın aluğa jaramdı.

WBT alğaş ret 1999 jılı engizildi. 2017 jılğa deyin WBT üş funkciyanı atqardı: 11 jıldıq oqudı ayaqtau qorıtındısı retindegi bitiru emtihanı, joğarı oqu orındarına tüsu emtihanı jäne tülekterge memlekettik granttardı tağayındau mehanizmi. Endi qorıtındı attestattau nemese bitiru emtihandarı mektepterde ötkiziledi, al WBT – joğarı oqu ornına tüsu jäne memlekettik granttardı tağayındau emtihanı bolıp qalıp otır.

WBT bir kezeñnen twradı jäne 140 baldıq mejemen bağalanadı. Oquşılar bir künde üş mindetti pännen (Qazaqstan tarihı, matematikalıq sauattılıq, oqu sauattılığı) — ärqaysısında 20 tapsırmadan jäne eki beyindi pännen — ärqaysısında 30 tapsırmadan test tapsıradı.

2019 jılı WBT 16-şı ret ötkiziledi. Osı jıldar işinde WBT-ğa 1,5 mln astam mektep bitiruşi qatısqan. Bwl barlıq mektep bitiruşilerdiñ 80%-ın qwraydı.

Abai.kz

0 pikir