سارسەنبى, 20 ناۋرىز 2019
965 0 پىكىر 11 قاڭتار, 2019 ساعات 13:20

قازاقستاندا ۇبت 15–20 قاڭتار ارالىعىندا اقىلى نەگىزدە وتكىزىلەدى

قازاقستاندا ۇلتتىق بىرىڭعاي تەستىلەۋ جىلىنا 4 رەت — قاڭتار، ناۋرىز، ماۋسىم، تامىز ايلارىندا وتكىزىلەتىن بولادى. تەستىلەۋ اقىلى نەگىزدە وتەدى، قۇنى — 2242 تەڭگە. ءبىلىم جانە عىلىم مينيسترلىگىنىڭ اقپاراتىنا سايكەس، 2019 جىلى ۇبت فورماتى وزگەرىسسىز قالماق. 

قاڭتار، ناۋرىز، تامىز ايلارىندا وتەتىن تەستىلەۋگە قاتىسۋ ارقىلى وقۋعا ءتۇسۋشى جوو-نىڭ اقىلى بولىمىنە قۇجات تاپسىرا الادى. قاڭتاردا شەكتى بالىن جيناعان تەستكە قاتىسۋشى ۇبت سەرتيفيكاتىمەن جوو-عا تەك كوممەرتسيالىق نەگىزدە وقۋعا تۇسە الادى: شەكتى بالىن جيناسا بولعانى. سونىمەن قاتار، ۇبت-نى قاڭتاردا تاپسىرعاندار نەگىزگى ۇبت-نى ماۋسىم ايىندا دا تاپسىرا الادى جانە مەملەكەتتىك ءبىلىم بەرۋ گرانتتارىن بەرۋ كونكۋرسىنا قاتىسا الادى.

«مەملەكەتتىك ءبىلىم بەرۋ گرانتتارىن تاعايىنداۋ بويىنشا وتەتىن كونكۋرسقا قاتىسۋ ءۇشىن مىندەتتى تۇردە 2019 جىلعى ماۋسىم-شىلدە ايلارىندا وتەتىن ۇلتتىق بىرىڭعاي تەستىلەۋگە قاتىسۋ قاجەت. تەستىلەۋگە قاتىسۋعا ءوتىنىم بەرۋ ءۇشىن تۇرعىلىقتى تىركەلگەن جەرى بويىنشا ۇلتتىق تەستىلەۋ ورتالىعىنىڭ ۇبت وتكىزۋ پۋنكتەرىنە جۇگىنۋ قاجەت»، — دەلىنگەن قر بعم ماتەريالدارىندا. 

2019 جىلعى ۇبت فورماتى ەش وزگەرىسسىز قالاتىنىن اتاپ وتكەن ءجون. وقۋعا ءتۇسۋشى ءداستۇرلى تۇردە 3 مىندەتتى ءپان (قازاقستان تاريحى، ماتەماتيكالىق ساۋاتتىلىق، وقۋ ساۋاتتىلىعى) جانە 2 بەيىندىك ءپان بويىنشا تەستىلەۋدەن وتەدى.

قاڭتار، ناۋرىز ايلارىندا وتەتىن تەستىلەۋدى تالاپكەر ۇبت وتكىزىلەتىن وزىنە ىڭعايلى كەز-كەلگەن پۋنكتىدە تاپسىرا الادى. تەك تەستىلەۋگە قاتىسۋ ءۇشىن ۇبت وتكىزۋ پۋنكتىنە كورسەتىلگەن مەرزىمدە ءوتىنىش بەرۋ قاجەت.

ەسكە سالا كەتەيىك، 2018 جىلدان باستاپ ءار تۇلەككە ۇبت سەرتيفيكاتىمەن بىرگە، ءبىلىم بەرۋ باعدارلامالارىنىڭ ءتىزىمى، بولىنگەن گرانتتاردىڭ سانى، سونداي-اق، وتكەن جىلعى گرانتتار كونكۋرسىنىڭ ناتيجەلەرى جازىلعان اقپاراتتىق پاراقشا بەرىلەدى. اتالعان اقپاراتتىق پاراقشا تۇلەككە ءوزىنىڭ بولاشاق ماماندىعىن تاڭداۋ كەزىندە كومەك بولادى.

جوعارى وقۋ ورىندارىنىڭ اكادەميالىق جانە باسقارۋ دەربەستىگىن كەڭەيتۋ ماقساتىندا بىرقاتار وزگەرىستەر ەنگىزىلدى. 2019 جىلدان باستاپ مامانداردى دايارلاۋ باعىتتارىنىڭ جاڭا كلاسسيفيكاتورى ەنگىزىلىپ وتىر. بۇگىنگى كۇنگە دەيىن ەلىمىزدىڭ جوعارى وقۋ ورىندارىندا ماماندىقتاردىڭ ءتىزىمى ناقتى كورسەتىلگەن كلاسسيفيكاتور پايدالانىلعان بولاتىن. ەندىگى كەزەكتە مامانداردى دايارلاۋ باعىتى كورسەتىلەتىن بولادى. سايكەسىنشە، ەلىمىزدىڭ جوعارى وقۋ ورىندارى دەربەس ءبىلىم بەرۋ باعدارلامالارىن ازىرلەيدى.

وسىعان وراي، مەملەكەتتىك ءبىلىم بەرۋ گرانتتارى ءبىلىم بەرۋ باعدارلامالارىنىڭ توپتارى بويىنشا تاعايىندالاتىن بولادى. ماسەلەن، «ماتەماتيكا ءپانى مۇعالىمدەرىن دايارلاۋ» توبىنا «ماتەماتيكا»، قوسارلانعان «ماتەماتيكا-فيزيكا»، «ماتەماتيكا-ينفورماتيكا» ماماندىقتارى كىرەدى. ال، «اقپاراتتىق تەحنولوگيالار» توبىنا — «ينفورماتيكا»، «اقپاراتتىق جۇيەلەر» جانە ت.ب. ياعني، ءبىلىم بەرۋ گرانتتارىنىڭ تاعايىندالۋى بۇرىنعىداي ماماندىقتار بويىنشا ەمەس، ءبىلىم بەرۋ باعدارلامالارىنىڭ توپتارى بويىنشا جۇزەگە اسىرىلاتىن بولادى. گرانت ۇتىپ العان سوڭ وقۋعا ءتۇسۋشى (تالاپكەر) جوو-عا تاڭداعان ءبىلىم بەرۋ باعدارلاماسى بويىنشا تىركەلىپ، جوو-عا قۇجاتتارىن تاپسىرۋ كەزىندە تاڭداپ العان ماماندىعى بويىنشا ءبىلىم الاتىن بولادى.

ەلباسى «100 ناقتى قادام» ۇلت جوسپارىندا نازارباەۆ ۋنيۆەرسيتەتىنىڭ تاجىريبەسىن ەسكەرە وتىرىپ، جوو-لاردىڭ اكادەميالىق جانە باسقارۋشىلىق دەربەستىگىن كەزەڭ-كەزەڭىمەن كەڭەيتۋدى قامتاماسىز ەتۋدى تاپسىردى. اكادەميالىق ەركىندىك — ءبىلىم بەرۋ ساپاسىن ارتتىرۋ باعدارلامالارىنىڭ مازمۇنىن دەربەس انىقتاۋ بويىنشا جوو-لارعا وكىلەتتىك بەرۋ. بۇل بىلىكتى كادرلار مەن جاڭا ماماندىقتارعا دەگەن سۇرانىس ۋاقىت وتكەن سايىن ارتىپ كەلە جاتقان جاڭا ەكونوميكاعا كوشۋ جاعدايىندا اسا ماڭىزدى.

ۇلتتىق بىرىڭعاي تەستىلەۋ — قازاقستان رەسپۋبليكاسىندا قولدانىلاتىن مەكتەپ بىتىرۋشىلەردىڭ ءبىلىمىن باعالاۋ جۇيەسى. ۇبت-نىڭ ناتيجەسى قابىلداۋ ەمتيحانى رەتىندە كوللەدجدەردە، جوو-لاردا ەسەپتەلىنەدى. سونداي-اق، ۇبت-نىڭ بالدارى «بولاشاق» پرەزيدەنتتىك ستيپەندياسىن الۋعا جارامدى.

ۇبت العاش رەت 1999 جىلى ەنگىزىلدى. 2017 جىلعا دەيىن ۇبت ءۇش فۋنكتسيانى اتقاردى: 11 جىلدىق وقۋدى اياقتاۋ قورىتىندىسى رەتىندەگى ءبىتىرۋ ەمتيحانى، جوعارى وقۋ ورىندارىنا ءتۇسۋ ەمتيحانى جانە تۇلەكتەرگە مەملەكەتتىك گرانتتاردى تاعايىنداۋ مەحانيزمى. ەندى قورىتىندى اتتەستاتتاۋ نەمەسە ءبىتىرۋ ەمتيحاندارى مەكتەپتەردە وتكىزىلەدى، ال ۇبت – جوعارى وقۋ ورنىنا ءتۇسۋ جانە مەملەكەتتىك گرانتتاردى تاعايىنداۋ ەمتيحانى بولىپ قالىپ وتىر.

ۇبت ءبىر كەزەڭنەن تۇرادى جانە 140 بالدىق مەجەمەن باعالانادى. وقۋشىلار ءبىر كۇندە ءۇش مىندەتتى پاننەن (قازاقستان تاريحى، ماتەماتيكالىق ساۋاتتىلىق، وقۋ ساۋاتتىلىعى) — ارقايسىسىندا 20 تاپسىرمادان جانە ەكى بەيىندى پاننەن — ارقايسىسىندا 30 تاپسىرمادان تەست تاپسىرادى.

2019 جىلى ۇبت 16-شى رەت وتكىزىلەدى. وسى جىلدار ىشىندە ۇبت-عا 1,5 ملن استام مەكتەپ ءبىتىرۋشى قاتىسقان. بۇل بارلىق مەكتەپ بىتىرۋشىلەردىڭ 80%-ىن قۇرايدى.

Abai.kz

0 پىكىر