Beysenbi, 12 Jeltoqsan 2019
Anıq 3861 6 pikir 23 Säuir, 2019 sağat 16:05

Toqaev Elbasımen birge eldiñ sırtqı sayasatın qalıptastırğan twlğa 

Bügin «Nur Otan» partiyasınıñ kezekten tıs XIX s'ezinde partiya atınan Qazaqstan Respublikasınıñ Prezidenttigine kandidat retinde Qasım-Jomart Toqaevtıñ wsınılğanı belgili. Osığan oray Qazaqstan Respublikası Parlamenti Senatınıñ Halıqaralıq qatınastar, qorğanıs jäne qauipsizdik komitetiniñ törağası Mwhtar Abrarwlı Qwl-Mwhammedten Prezidenttikke ümitker turalı pikirin swrağan edik.

– Memleket basqaru oñay emes, al bilik tizginin öz qolıñmen basqa adamnıñ qolına beru odan da qiın. Bügin Elbasımız bwl şeşimge öziniñ 3 jıl boyına köp oylanıp, jüz tolğanıp barıp kelgendigin ayttı. Elbası tañdağan Qasım-Jomart Kemelwlı Toqaevtıñ esimi barşa qazaqstandıqtarğa ğana emes, bükil älemge keñinen tanımal.

Elimiz täuelsizdik alğanda Qazaqstandı köp eşkim bilmeytin edi. Dünie jüziniñ birde-bir elinde, elşiligi, tipti elşisi joq eldi qaydan bilsin? Qasım-Jomart Toqaev osınday qiın kezeñde Elbasımızben birge elimizdiñ sırtqı sayasatın qalıptastıruğa zor üles qostı.

Ekinşiden, ol el ekonomikası tığırıqqa tirelgen kürdeli jıldarda respublika Ükimetin ülken aqılmen, parasatpen basqardı. Men mwnı sol Ükimettiñ müşesi retinde öz közimmen körgen adammın. Keyde onıñ sabırlı, salmaqtı minezin «jwmsaqtıq» dep qabıldaytındar da bar. Biraq Qasım-Jomart Kemelwlınıñ boyında kez kelgen şekten şıqqan adamdı tez arada «ornına qoyatın» qaysar minez de jetip artıladı.

Üşinşiden, ol eki ret qatarınan Parlament Senatın basqardı. Men senator retinde onıñ bwl orında da ülken-kişige birdey sıpayı minez, sırbaz qalpımen otandıq parlamentarizmdi damıtuğa qalay üles qosqanına kuä boldım.

Ol jer jüzine tarıday şaşılğan barşa qazaqtıñ arasınan älemdegi eñ bedeldi halıqaralıq wyım – Birikken Wlttar Wyımınıñ Bas hatşısınıñ orınbasarı qızmetin de abıroymen atqarğan tañdaulı twlğa.

Qwdayğa şükir, qazaqta nebir narqasqa azamattar bar ğoy, biraq Elbasınıñ solardıñ işinen Toqaevtı wsınuınıñ bastı sebebi – onıñ joğarıda aytılğan qasietterinen tuındağan dep bilemin. Sol sebepti barşa ağayındı däl osınday tarihi kezeñde wltımızdıñ bereke-birligin tanıtıp, aldağı saylauda Qasım-Jomart Kemelwlınıñ kandidaturasın qoldauğa şaqıramın, – dedi Mwhtar Qwl-Mwhammed.

Abai.kz

6 pikir