جەكسەنبى, 20 قازان 2019
انىق 3712 6 پىكىر 23 ءساۋىر, 2019 ساعات 16:05

توقاەۆ ەلباسىمەن بىرگە ەلدىڭ سىرتقى ساياساتىن قالىپتاستىرعان تۇلعا 

بۇگىن «Nur Otan» پارتياسىنىڭ كەزەكتەن تىس XIX سەزىندە پارتيا اتىنان قازاقستان رەسپۋبليكاسىنىڭ پرەزيدەنتتىگىنە كانديدات رەتىندە قاسىم-جومارت توقاەۆتىڭ ۇسىنىلعانى بەلگىلى. وسىعان وراي قازاقستان رەسپۋبليكاسى پارلامەنتى سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار ابرارۇلى قۇل-مۇحاممەدتەن پرەزيدەنتتىككە ۇمىتكەر تۋرالى پىكىرىن سۇراعان ەدىك.

– مەملەكەت باسقارۋ وڭاي ەمەس، ال بيلىك تىزگىنىن ءوز قولىڭمەن باسقا ادامنىڭ قولىنا بەرۋ ودان دا قيىن. بۇگىن ەلباسىمىز بۇل شەشىمگە ءوزىنىڭ 3 جىل بويىنا كوپ ويلانىپ، ءجۇز تولعانىپ بارىپ كەلگەندىگىن ايتتى. ەلباسى تاڭداعان قاسىم-جومارت كەمەلۇلى توقاەۆتىڭ ەسىمى بارشا قازاقستاندىقتارعا عانا ەمەس، بۇكىل الەمگە كەڭىنەن تانىمال.

ەلىمىز تاۋەلسىزدىك العاندا قازاقستاندى كوپ ەشكىم بىلمەيتىن ەدى. دۇنيە ءجۇزىنىڭ بىردە-ءبىر ەلىندە، ەلشىلىگى، ءتىپتى ەلشىسى جوق ەلدى قايدان ءبىلسىن؟ قاسىم-جومارت توقاەۆ وسىنداي قيىن كەزەڭدە ەلباسىمىزبەن بىرگە ەلىمىزدىڭ سىرتقى ساياساتىن قالىپتاستىرۋعا زور ۇلەس قوستى.

ەكىنشىدەن، ول ەل ەكونوميكاسى تىعىرىققا تىرەلگەن كۇردەلى جىلداردا رەسپۋبليكا ۇكىمەتىن ۇلكەن اقىلمەن، پاراساتپەن باسقاردى. مەن مۇنى سول ۇكىمەتتىڭ مۇشەسى رەتىندە ءوز كوزىممەن كورگەن اداممىن. كەيدە ونىڭ سابىرلى، سالماقتى مىنەزىن «جۇمساقتىق» دەپ قابىلدايتىندار دا بار. بىراق قاسىم-جومارت كەمەلۇلىنىڭ بويىندا كەز كەلگەن شەكتەن شىققان ادامدى تەز ارادا «ورنىنا قوياتىن» قايسار مىنەز دە جەتىپ ارتىلادى.

ۇشىنشىدەن، ول ەكى رەت قاتارىنان پارلامەنت سەناتىن باسقاردى. مەن سەناتور رەتىندە ونىڭ بۇل ورىندا دا ۇلكەن-كىشىگە بىردەي سىپايى مىنەز، سىرباز قالپىمەن وتاندىق پارلامەنتاريزمدى دامىتۋعا قالاي ۇلەس قوسقانىنا كۋا بولدىم.

ول جەر جۇزىنە تارىداي شاشىلعان بارشا قازاقتىڭ اراسىنان الەمدەگى ەڭ بەدەلدى حالىقارالىق ۇيىم – بىرىككەن ۇلتتار ۇيىمىنىڭ باس حاتشىسىنىڭ ورىنباسارى قىزمەتىن دە ابىرويمەن اتقارعان تاڭداۋلى تۇلعا.

قۇدايعا شۇكىر، قازاقتا نەبىر نارقاسقا ازاماتتار بار عوي، بىراق ەلباسىنىڭ سولاردىڭ ىشىنەن توقاەۆتى ۇسىنۋىنىڭ باستى سەبەبى – ونىڭ جوعارىدا ايتىلعان قاسيەتتەرىنەن تۋىنداعان دەپ بىلەمىن. سول سەبەپتى بارشا اعايىندى ءدال وسىنداي تاريحي كەزەڭدە ۇلتىمىزدىڭ بەرەكە-بىرلىگىن تانىتىپ، الداعى سايلاۋدا قاسىم-جومارت كەمەلۇلىنىڭ كانديداتۋراسىن قولداۋعا شاقىرامىن، – دەدى مۇحتار قۇل-مۇحاممەد.

Abai.kz

6 پىكىر