Jeksenbi, 15 Qırküyek 2019
Ekonomika 1369 0 pikir 16 Mamır, 2019 sağat 11:14

Almatı sotı eks-bankir Ertaevtı qamau merzimin tağı bir ayğa wzarttı

Almatı qalalıq tergeu sotı Reseyden ekstradiciyalanğan eks-bankir Jomart Ertaevtı qamau merzimin tağı bir ayğa sozdı. Bwl turalı Almatı qalalıq sotınıñ baspasöz qızmeti habarladı.

Baspasöz qızmetiniñ jazuınşa, mwnday ötinişti qalalıq tergeu organdarı tüsirgen. Mwnan soñ sot Ertaevtı 15 mausımğa deyin qamauda wstau turalı şeşim qabıldağan. Bwğan deyin Almatı mamandandırılğan audanaralıq äkimşilik sotı Ertaevtı qamauda wstauğa negiz barın aytqan. 15 naurızda bastalğan qamau türindegi bwltartpau şarası 15 mamırda ayaqtaluı kerek edi.

Reseyde twratın 46 jastağı Jomart Ertaevtı bıltır mamırda Resey qauipsizdik organdarınıñ qızmetkerleri wstağan.

Qazaqstan biligi Jomart Ertaevtı "qazaqstandıq Bank RBK-nıñ direktorlar keñesi törağasınıñ keñesşisi bolğan kezinde bankten jalğan firmanıñ atına 80 million dollardan astam zaym alıp beruge jäne onı qaytarmauğa kömektesken" dep küdiktenedi.

"İs boyınşa tergeudiñ ayaqtalğanın" aytqan prokuratura habarlauınşa, Ertaevpen birge bwl iske 54 azamat qarjı jımqıruğa küdikti retinde tartılğan. Onıñ 41-i – banktiñ top-menedjeri men qızmetkeri.

Bıltır mamırda reseylik BAQ Jomart Ertaevtıñ advokatı arqılı joldağan ündeuin jariyalağan. Ündeude Ertaev Bank RBK-da eşqaşan jwmıs istemegenin, bwl banktiñ ştatında jäne akcionerleri qwramında bolmağanın aytadı. Reseylik "Kommersant'" gazeti Jomart Ertaevtıñ sotta Reseyden sayasi baspana jäne azamattıq berudi mälimdegenin habarlağan. Ol özin qudalaudıñ sayasi astarı bar dep biletinin aytqan.

Qañtardıñ basında Resey aqparat qwraldarı Mäskeu qalalıq sotı Jomart Ertaevtı Qazaqstanğa ekstradiciyalau turalı şeşim şığarğanın habarlağan.

Bwğan deyin Jomart Ertaev Qazaqstanda bank zañın bwzğan degen ayıppen qılmıstıq jauapqa tartılğan. 2009 jılı Qazaqstan qarjı policiyası Al'yans Banktiñ akcionerleri men menedjerlerine bir milliard dollardan köp aqşanı wrlağan degen ayıp taqqan. Sol kezde wstalıp, twtqındalğan Jomart Ertaev toğız ay qamauda otırğan. Keyin oğan tağılğan ayıp "buhgalterlik jäne qarjı esebi turalı zañdı bwzu" jäne "bank qarjısın zañsız paydalanu" degen baptarğa auıstırılğan.

Sot Ertaevqa ayıppwl salıp, bostandıqqa şığarğannan keyin ol Qazaqstandağı ekinşi deñgeyli basqa bankterde jwmıs istegen. Al 2014 jıldıñ soñında Jomart Ertaev "Alma TV" kompaniyası basşılığına tağayındalğan bolatın.

Abai.kz

0 pikir