جەكسەنبى, 25 تامىز 2019
ەكونوميكا 1307 0 پىكىر 16 مامىر, 2019 ساعات 11:14

الماتى سوتى ەكس-بانكير ەرتاەۆتى قاماۋ مەرزىمىن تاعى ءبىر ايعا ۇزارتتى

الماتى قالالىق تەرگەۋ سوتى رەسەيدەن ەكستراديتسيالانعان ەكس-بانكير جومارت ەرتاەۆتى قاماۋ مەرزىمىن تاعى ءبىر ايعا سوزدى. بۇل تۋرالى الماتى قالالىق سوتىنىڭ ءباسپاسوز قىزمەتى حابارلادى.

ءباسپاسوز قىزمەتىنىڭ جازۋىنشا، مۇنداي ءوتىنىشتى قالالىق تەرگەۋ ورگاندارى تۇسىرگەن. مۇنان سوڭ سوت ەرتاەۆتى 15 ماۋسىمعا دەيىن قاماۋدا ۇستاۋ تۋرالى شەشىم قابىلداعان. بۇعان دەيىن الماتى مامانداندىرىلعان اۋدانارالىق اكىمشىلىك سوتى ەرتاەۆتى قاماۋدا ۇستاۋعا نەگىز بارىن ايتقان. 15 ناۋرىزدا باستالعان قاماۋ تۇرىندەگى بۇلتارتپاۋ شاراسى 15 مامىردا اياقتالۋى كەرەك ەدى.

رەسەيدە تۇراتىن 46 جاستاعى جومارت ەرتاەۆتى بىلتىر مامىردا رەسەي قاۋىپسىزدىك ورگاندارىنىڭ قىزمەتكەرلەرى ۇستاعان.

قازاقستان بيلىگى جومارت ەرتاەۆتى "قازاقستاندىق Bank RBK-نىڭ ديرەكتورلار كەڭەسى توراعاسىنىڭ كەڭەسشىسى بولعان كەزىندە بانكتەن جالعان فيرمانىڭ اتىنا 80 ميلليون دوللاردان استام زايم الىپ بەرۋگە جانە ونى قايتارماۋعا كومەكتەسكەن" دەپ كۇدىكتەنەدى.

ء"ىس بويىنشا تەرگەۋدىڭ اياقتالعانىن" ايتقان پروكۋراتۋرا حابارلاۋىنشا، ەرتاەۆپەن بىرگە بۇل ىسكە 54 ازامات قارجى جىمقىرۋعا كۇدىكتى رەتىندە تارتىلعان. ونىڭ 41-ءى – بانكتىڭ توپ-مەنەدجەرى مەن قىزمەتكەرى.

بىلتىر مامىردا رەسەيلىك باق جومارت ەرتاەۆتىڭ ادۆوكاتى ارقىلى جولداعان ۇندەۋىن جاريالاعان. ۇندەۋدە ەرتاەۆ Bank RBK-دا ەشقاشان جۇمىس ىستەمەگەنىن، بۇل بانكتىڭ شتاتىندا جانە اكتسيونەرلەرى قۇرامىندا بولماعانىن ايتادى. رەسەيلىك "كوممەرسانت" گازەتى جومارت ەرتاەۆتىڭ سوتتا رەسەيدەن ساياسي باسپانا جانە ازاماتتىق بەرۋدى مالىمدەگەنىن حابارلاعان. ول ءوزىن قۋدالاۋدىڭ ساياسي استارى بار دەپ بىلەتىنىن ايتقان.

قاڭتاردىڭ باسىندا رەسەي اقپارات قۇرالدارى ماسكەۋ قالالىق سوتى جومارت ەرتاەۆتى قازاقستانعا ەكستراديتسيالاۋ تۋرالى شەشىم شىعارعانىن حابارلاعان.

بۇعان دەيىن جومارت ەرتاەۆ قازاقستاندا بانك زاڭىن بۇزعان دەگەن ايىپپەن قىلمىستىق جاۋاپقا تارتىلعان. 2009 جىلى قازاقستان قارجى پوليتسياسى اليانس بانكتىڭ اكتسيونەرلەرى مەن مەنەدجەرلەرىنە ءبىر ميلليارد دوللاردان كوپ اقشانى ۇرلاعان دەگەن ايىپ تاققان. سول كەزدە ۇستالىپ، تۇتقىندالعان جومارت ەرتاەۆ توعىز اي قاماۋدا وتىرعان. كەيىن وعان تاعىلعان ايىپ "بۋحگالتەرلىك جانە قارجى ەسەبى تۋرالى زاڭدى بۇزۋ" جانە "بانك قارجىسىن زاڭسىز پايدالانۋ" دەگەن باپتارعا اۋىستىرىلعان.

سوت ەرتاەۆقا ايىپپۇل سالىپ، بوستاندىققا شىعارعاننان كەيىن ول قازاقستانداعى ەكىنشى دەڭگەيلى باسقا بانكتەردە جۇمىس ىستەگەن. ال 2014 جىلدىڭ سوڭىندا جومارت ەرتاەۆ "الما تۆ" كومپانياسى باسشىلىعىنا تاعايىندالعان بولاتىن.

Abai.kz

0 پىكىر