Särsenbi, 17 Şilde 2019
989 7 pikir 13 Mausım, 2019 sağat 16:37

Jalpıwlttıq koaliciya Prezident aytqan jaña bağıttarğa qoldau bildirdi

Demokratiyalıq küşterdiñ «Qazaqstan-2050» jalpıwlttıq koaliciyası Qazaqstan Prezidenti Qasım-Jomart Toqaev anıqtap bergen el damuınıñ naqtı bağıttarı men aldımızğa qoyğan jaña mindetterine qoldau bildirdi.

Koaliciya otırısında «Nur Otan» partiyası Törağasınıñ Birinşi orınbasarı Mäulen Äşimbaev wlıqtau räsiminde Memleket basşısı atap körsetken bilik pen qoğamnıñ aldında twrğan eñ negizgi maqsattarğa toqtalıp ötti.

– Qazaqstan Prezidenti Qasım-Jomart Kemelwlı Toqaev halıqtıñ tabısın arttıru, sıbaylas jemqorlıqtı joyu, sot jäne qwqıq qorğau jüyesin reformalau, jaña jwmıs orındarın aşu, twrğın üy mäselesin şeşu, ädiletti äleumettik sayasat, öñirlerdi damıtudıñ jaña bağdarı, «Ruhani jañğıru» bağdarlamasın jalğastıru, jauaptı sırtqı sayasat, jastarğa jan-jaqtı qoldau körsetu siyaqtı el damuınıñ naqtı bağıttarın atap körsetti. Olardıñ jüzege asırıluı halıqtıñ äl-auqatın arttırıp, ekonomikalıq jäne sayasi jüyemizdiñ damuına tıñ serpin beredi, – dedi ol.

Mäulen Äşimbaev Koaliciyanıñ alğaş qwrılğan künnen bastap jalpıwlttıq dialogqa qatıstı bastamalardı qoldap kele jatqanın jäne atalğan alañnıñ qazirdiñ özinde tiimdi dialog pen türli sayasi küşterdiñ özara qarım-qatınasınıñ modeline aynalıp ülgergenin ayttı.

– Milliondağan qazaqstandıqtardıñ pikiri men közqarasın bildiretin Demokratiyalıq küşterdiñ Jalpıwlttıq Koaliciyası osınday mañızdı kezeñde Elbası sayasatınıñ sabaqtastığın qamtamasız etip, Prezidentimizdiñ eldiñ aldına qoyıp otırğan maqsattarğa qol jetkizuine öziniñ somdı ülesin qosu üşin jwmıs isteydi, – dedi Mäulen Äşimbaev.

Otırısqa eldegi jetekşi partiyalardıñ basşıları, Parlament deputattarı, Qazaqstan halqı Assambleyasınıñ, käsibi jäne qoğamdıq birlestikterdiñ ökilderi qatısıp, pikir bildirdi.

İs-şara soñında barşa qazaqstandıqtardı ıntımaqqa, birlikke, qoğamdıq-sayasi küşterdi saylaudan keyingi kezeñde elimizdiñ strategiyalıq maqsattarı jolında biriguge, Qazaqstan Prezidentiniñ el damuınıñ özekti mäselelerine qatıstı bilik pen azamattıq qoğam arasında twraqtı jäne konstruktivti dialog qwru bastamasın qoldauğa şaqırğan Ündeu qabıldandı.

Abai.kz

7 pikir