Beysenbi, 12 Jeltoqsan 2019
Dat 4381 19 pikir 8 Şilde, 2019 sağat 13:44

Zeynetkerler emes, jastar deputat bolsın...

Ötken aptanıñ soñında Parlament Palatalarınıñ birlesken otırısı ötip, altınşı saylanğan QR Parlamentiniñ törtinşi sessiyası ayaqtaldı. Deputattar demalısqa ketti. Şının aytu kerek, bwl jolı da bizdiñ deputattar tıñ tirşilik tındırğan joq. Bwrınğıday qalğıp-mülgip otırıp, tağı bir jıldı ötkerip tastadı.

«Jwrttıñ Ibırayı-Ibıray, bizdiñ Ibıray-swmıray» degendey özge eldiñ deputattarı parlament edenin tepkilep otırıp, öz wsınıstarın aytıp, halıqtıñ sözin bilikke jetkizip jatadı. Zañ tarmaqtarın talqılağanda bir-biriniñ bet-jüzine qaramay, ädildiktiñ aq tuı üşin küresedi. Al bizdiñ parlament palatasında qanşan da öli tınıştıq. Joğarıda "bir jıldı qalğıp-mülgip otırıp ötkizdi" degendi de osı üşin aytıp otırmız. Bizdiñ elde özgeşe oylap, öz pikirin ayta alatın deputat bar ma eken osı?! Bäriniki sol «Köp aytsa köndi, jwrt aytsa boldı...». Kez-kelgen talqılauğa qarsılıq tanıtpaydı, "qosılam" dep qol köterip otıra beredi.

Bwl siz ben bizdiñ oyımız. Al bizdiñ zeynetker deputattar özderin "halıq qaharmanı" sanaydı. Olardıñ oyınşa, eldiñ tiregi de, jüregi de özderi. Bwl sözimizdiñ däleli 5 şilde ötken sessiyanıñ qorıtındı otırsında mäjilis spikeri Nwrlan Nığmatulin bastap, bir jıl boyı tındırğan isterine tañday qağa tamsandı. Olardıñ aytuınşa, Parlamenttiñ törtinşi sessiyası öte mañızdı jäne tarihi kezeñde asa qajetti zañdardı qabıldağan.

«Qay qoğamda bolsa da, qay uaqıtta bolsa da zañnıñ ornı ärqaşan da erekşe. Sebebi, zañ bar jerde ädildik, bostandıq jäne tınıştıq bar. Osı jolda Parlament elimiz üşin, halqımız üşin köptegen qajetti zañdardı qabıldadı. Onda Elbası Nwrswltan Äbişwlı Nazarbaevtıñ törtinşi sessiyanıñ aşıluında bergen tapsırmaları men Qazaqstan halqına Joldauı basşılıqqa alındı», - degen Nwrlan Nığmatulin dästür boyınşa atqarılğan jwmıstarğa esep berdi.

«Sessiya barısında qos palatanıñ 5 birlesken otırısı, Mäjilistiñ  41 jäne Senattıñ 26 jalpı otırısı ötti. Onda 319 mañızdı mäsele qaraldı. Jalpı, törtinşi sessiya bastalğan kezden 83 zañ jobası qabıldandı. Onıñ işinde 82 qwjatqa Memleket basşısı qol qoyıp, olar öz küşine endi», - dedi mäjilis törağası.

«Mañızdı zañ jobalarınıñ qatarında Qazaqstan Respublikası Prezidenti Qasım-Jomart Toqaev Astana qalasınıñ atauın Nwr-Swltan dep özgertu jöninde bastamasına oray, deputattar «Qazaqstan Respublikasınıñ Konstituciyasına özgerister engizu turalı» Zañdı qabıldadı.

Sonımen birge, Elbasınıñ bastamasımen qasietti Türkistan oblısı jäne Şımkent qalasınıñ aldağı damu josparı Konstituciyalıq zañmen bekitildi», - dep jazdı mäjilistiñ baspasöz qızmeti.

«Aydağanı bes eşki, ısqırığı jer jaradı» degen söz osındayda aytıladı. Sessiya boyı asa mañızdı tarihi mäselelerdi talqılap, öte qajetti zañdar qabıldadıq dep maqtanğanımen, dälel retinde auız toltırıp aytarlığı osı ğana bolıptı. Atalğan jobalardı qabıldauda deputattar eşqanday röl atqarğan joq. Prezident wsındı. Al deputattar eş talqılausız "tört ayaqtap" (mäjilis deputatınıñ sözi) qoldadı.

«Qabıldanğan ärbir zañ, eñ aldımen, Elbasımız Nwrswltan Äbişwlı Nazarbaevtıñ strategiyalıq jäne äleumettik bastamaların orındauğa bağıttaldı», - dedi mäjilis törağası. Alayda bwl da esep beru üşin aytılıp otırğan söz. Äytpese, 2018 jılı 5 qazandağı Elbası Joldauında mindettelgen «Pedagog märtebesi turalı» zañ äli qabıldanğan joq. Spikerdiñ aytuınşa, bwl mäsele kelesi sessiyada qaralatın zañdar qatarında eken.

Sonımen, bir jıldıq jwmıstarına nükte qoyğan deputattar demalısqa ketti. Endi küz aynala kelesi, besinşi sessiyanıñ jwmısı bastaladı. Ol sessiyada da halıq qalaulıları qazirgi bağıtınan taymay, ilinip-salınıp jwmıs istey beretinine bäs tiguge bolar edi...

Alayda, el arasında altınşı şaqırılımnıñ ayaqtalğanı turalı söz köp. Köp adamnıñ pikirinşe, biıl qalayda jaña mäjilis saylauı ötedi. Onday bolğanda qazirgi deputattar jılı kreslosımen qoştasıp, ornın özgelerge bosatadı.

Mäjilistegi qazirgi 107 deputattıñ işinde zeynet jasınan asıp ketkender az emes. Anıqtap aytqanda, 33 deputat zeynetkerlik jasqa tolğan. Olardıñ arasında 81 jastağı Vladislav Kosarev, 74 jastağı Quanış Swltanov, 72 jastağı Twrğın Sızdıqov sındı aqsaqaldar men 68 jastağı Güljan Qaraqwsova, 64 jastağı Ekaterina Nikitinskaya qatarlı äjeler de bar.

Al negizgi zañ şığaruşı organnan orın taba alğan jastardıñ sanı sausaqpen sanarlıq qana. 40 jasqa tolmağan deputattardıñ sanı onğa da jetpeydi. Osığan qarap, mäjilisti nağız "zeynetkerler ordası" degen pikir jii aytıladı.

Sonımen qatar, mäjiliste Qazaqstan halıqtıq kommunistik partiyasınıñ atınan birneşe deputat otır. Qızıl kommunister basqarğan qızıl imperiyadan täuelsizdik alıp, mäñgilik el boludı maqsat etken Qazaqstan Respublikasınıñ zañ şığaruşı organında kommunistik partiyanıñ otırğanına köz jwma beruge endi bolmaydı.

Kommunistik partiyanıñ qanday partiya ekeni, qazaq halqına qanday näubet äkelgenin közi aşıq jwrttıñ bäri de biledi. Älemniñ köptegen elderinde tıyım salınğan bwl partiya elimizde erkin jwmıs istep, Parlamentte otır. Keñes odağınıñ kommunistik partiyası men Qazaqstannıñ kommunistik partiyası aytar auızğa bölek bolğanımen, tübin qusañ tım jaqın. Bwğan dälel, ädette bar-joğı bilinbeytin bizdiñ kommunister Keñes odağınıñ iisi şığatın şaralarda belsendilik tanıtıp, bastamaşı bolıp jüredi.

Qazaqstan sekildi kommunistik jüyeden asa auır qısas körgen, wlttıq genocidke wşırağan elde kommunistik partiyanıñ boluı, äri biliktiñ qoldauına ie ekeni barıp twrğan qatelik. Eldiñ sayasi-mädeni ömirine mülde aralaspaytın, qoğam damuına eş paydası joq partiyanıñ el biliginen, zañ şığaruşı organnan alastatılatın uaqıtı jetti.

Söz soñında aytpağımız, eger biıl şınmen parlament tarap, jaña mäjilis saylauı öter bolsa, jañadan saylanar deputattardıñ jas erekşeligi men ideologiyasına män bergen jön. Eldegi negizgi zañ şığaruşı organğa zeynetkerlerdi qaptata bermey, jwmıs isteuge jigeri bar jastardı tartqannan eş wtılmaymız. Onıñ üstine biıl - "Jastar jılı". Sol üşin de jastarğa mümkindik berilip, olardıñ bilimi men küş-jigerin paydağa asıru kerek. Ekinşi mäsele, täuelsiz Qazaqstannıñ törine endi qızıl imperiyanıñ qaldığı käri kommunisterdi şığarudıñ qajeti qalmadı dep esepteymiz.

Quanış Qappas

Abai.kz 

19 pikir