Jeksenbi, 25 Tamız 2019
46 - söz 2572 5 pikir 24 Şilde, 2019 sağat 11:22

Bilik qwldıraudıñ soñğı şegine jetti

Bayağıda bir rejisserdiñ kino tüsirilim alañına barğam. Kinoğa tüsip jatqan akterlerdiñ əjeptəuir tanımaldılığı bar. "Hayuan, hayuan" dep ayqaylap, akterlerdi qwl sekildi köredi. Bir akter söz qaytara almaydı. Olar qorğansız. Olar sol rejisserdiñ ğana emes, jüyeniñ qwrbanı. Eger söz qaytarsa, jwmıssız qaladı. Sebebi, ol rejisserdiñ bilikte krutoy dostarı bar. Jılpıldap, jağınıp solardı jağalap jüredi. Ol olardıñ tilin tabadı. "Bas röldegi qız jasandı oynaydı" dep edim, basım bəlege qaldı. Sözge kep qaldıq.
***
Qatemen jazatın bir jurnalisti bilem. "Ol redaktorğa soğım əkep beredi, sol üşin jwmıstan şığarmaydı" deytin biletinder. Ötirik-şının kim bilsin? Sol jurnalist köterilipti. Tañğalatın ne bar? Solardıñ zamanı ğoy. Bwl biliktiñ mañında qanşama sauatsız jür emes pe? Sol jurnalisti bəri qwttıqtap jatır. Olar da onıñ sauatsız ekenin biledi. Biraq eşkim "sen ol orınğa layıq emessiñ" dep aytpaydı. Eş bolmasa, qarsılığın qwttıqtamay körsetpeydi. Sebebi, olar bireudiñ jaqsılığın böliskennen bwrın "bir kömegi tiip qalar" dep oylaydı, ümittenedi.
***
Bilikke barğan tanıstarım bar. Körgen jerde səlemimiz tüzu. Jarıp bara jatqan bilimi, potencialı joq. Endi bwl bilikke janıp türğan jastar emes, orta deñgeyli adamdar kerek sekildi. Solar köp ötpey mwrnına esekqwrt kirip, adam tanımay qaladı. Oyboy, bayğwstar adammen kergip söylesedi ğoy. Intellektisi tömen olar halıqtıñ qamın qaydan oylasın? Olardıñ deñgeyi joğarı bolsa, özgerip şığa kelmes edi.
Qazir köp jer janıp twrğan jastardı jwmısqa alğısı kelmeydi. Qauiptenedi. Bağınbay ma dep qorqadı. Kemşiligimdi, qateligimdi, işken-jegenimdi aşa ma dep qorqadı. Jüye jağımpaz adamdardıñ sanın arttırdı. Jağımpaz adamdardıñ obrazın jasadı. Otandıq arnalarda ündiniñ tömen sorttı serialın qaptatıp, qazaqtıñ intellektisin öltiru jwmısımen aynalıstı. Qazaqtı qorqıtıp-ürkitip, qwldıq sana deñgeyine tüsirgisi keldi.
***
Adam qwndılığı... Keşiriñiz, bizdiñ qoğamda adam tım qwnsızdanıp ketti. Adamda qwn qalmadı. Onı atıp ketuge, basıp ketuge, janşıp ketuge boladı.
Jüye batpaqqa batqan. Sayasi elitanı twtas özgertpey, sayasi reformalar jasamay batpaqtan şığa almaydı-au jəne özderi de şıqqısı kelmeydi. Sebebi, üyrengen jerleri, batpaqta jata beru özderine wnaytın sekildi.
Men evolyuciyalıq jolmen damığandı qoldaymın. Biraq bilik halıqpen dialog jasamasa, onda revolyuciyadan basqa jol joq. Bilik qwldıraudıñ soñğı şegine jetti. Revolyuciyanı qalayıq, qalamayıq soğan özi kele jatırmız.

Ayagül Mantaydıñ facebook paraqşasınan

 Abai.kz

 

5 pikir