Särsenbi, 16 Qazan 2019
46 - söz 1595 2 pikir 19 Qırküyek, 2019 sağat 11:43

Mädeniet ministrine hat

Qazaqstan Respublikasınıñ Mädeniet jäne sport ministri A.R. Rayımqwlova hanımğa!

Qwrmetti Aqtotı Rahmetollaqızı!

Men, kinodramatrurg S. Elubaev 2017-18 jıldarı Elbası N. Nazarbaevtıñ tapsırmasımen qazaqtıñ wlı hanı Qasım han turalı material jinap 1 seriyalıq prokattıq körkem fil'm scenariyin jazdım. Elbası biz jazğan scenariydi qattı wnatıp sol kezdegi ministr Arıstanbek Mwhamediwlına «Ertwğrıldı» tüsirgen türik rejisseri M. Gyunaydı şaqırudı tapsırdı. Gyunay biz jazğan scenariymen tanısıp wnattı. Bizben jäne ministrmen kezdesuinde bir seriyalı prokattıq fil'm jasauğa kelisti. Alayda Gyunaydıñ Prezidentpen kezdesui üstinde serial ideyası payda bolıptı. Biraq, serialğa bizdi şaqırmadı. Söytsek scenariydi Gyunaydıñ özi jazuğa kirisken. Qazaqstan tarapınan B. Şekerov şaqırıldı. Biz söytip bwl jobadan tıs qaldıq. Söytip, Elbası wnatqan biz jazğan «Qasım han» dalada qaldı. «Eñ bolmasa Elubaevtıñ bir jıldıq eñbegin töleyik!» degen bir adam bolmadı.

Käzir, rejisser Gyunay özi jazğan 75 seriyalıq scenariy boyınşa Oñtüstik Qazaqstanda serialdı tüsiruge kirisken deydi. Biz bir närsege tañ qalamız. Gyunay jazğan scenariy nege «Qazaqfil'mniñ» Eksperttik Keñesin aynalıp ötti? 11 milliard Qazaqtan aqşasına tüsirile bastağan qazaqtıñ wlı hanı turalı scenariy nege qoğamdıq pikirden tasada /keleyno/ şeşildi? Nege eş jerde talqılanbadı? Nemese, kimder talqıladı? Bäri qwpiya. Bäri astırtın. Bwl kino tarihında bolmağan praktika.

Sondıqtan men Qasım han tağdırına alañdap Sizge osı hattı jazdım. Scenarist, rejisser, akter şetelden şaqırılıp 30 million dollarğa tüsirilgen «Köşpendiler» tağdırı Qazaqstanğa tittey de bir sabaq bolmağan tärizdi. Rejisseri, scenaristi, t.b. türikter «Qasım han» tağdırı da sol «Köşpendiler» tağdırın qaytalamasına kim kepil? Qaşanğa deyin qazaqqa qazaq tarihın ekranda şeteldikter üyretip jüruge tiis?! Erteñ ekrannan qazaq emes basqa Qasım handı körip tügel Qazaqstan şulap ketpesine kim kepil? «Bwğan kim kinäli?» dep swramasına kim kepil?

Eñ qiını erteñ osı jobanıñ jamanatına Elbası men Siz qalmaularıñız üşin Gyunay jazğan «Qasım han» scenariyin dereu kinostudiyanıñ Ekspertter Keñesiniñ talqısına salu kerek dep bilemin!

Qwrmetpen Smağwl Elubaev

Smağwl Elubaydıñ facebook paraqşasınan

Abai.kz

2 pikir