Seysenbi, 12 Qaraşa 2019
Sañlaq 3293 25 pikir 24 Qırküyek, 2019 sağat 15:40

«Qazsport» qazaqqa ne körsetip jür?

«Qazaqstan» RTRK» AQ qwramına kiretin Qazsport telearnası 2013 jılı 1 şildede aşıldı. Sodan beri eldegi sport janküyerleri osı arnanı tamaşalap keledi. Elimizde twñğış ret sporttıq arna aşıladı degende börkimizdi aspanğa atqan edik. Öz sportşılarımızdıñ jetistigin öz arnamızdan köremiz dep...

Qazsport-tiñ äueldegi maqsatı Qazaqstannıñ sporttağı jetistikterin däripteu bolatın. Sportşılarımız qatısqan bayraqtı bäsekelerdi körermen nazarına wsınıp, el sportınıñ damuına öz ülesin qosu mindeti jüktelgen. Sonımen qatar, sport arqılı jas jetkinşekterdi Otan süygiştikke bauluğa tiis edi. Alayda, atalğan arnanıñ soñğı jıldardağı jwmıs isteu bağıtı körermen köñilinen şığıp jürgen joq.

Bwlay deuimizge birinşi sebep, arna elimiz sportşıları qatısqan iri jarıstardı tikeley efirde körsete almay otır. Sportşılarımız jülde alğan qanşama halıqaralıq turnirler tikeley efirden tıs qaldı. Qazsport-tan qayır bolmağan soñ janküyer qauım amalısız şeteldiñ sporttıq arnaların satıp alıp, körip jür.

Elimiz sportşıları biıl jıl basınan beri köptegen iri jarıstarğa qatıstı. Mäselen, bokstan Tailandta ötken Aziya çempionatı, Qıtaydıñ Ninbo qalasında ötken auır atletikadan Aziya çempionatı, Qıtaydıñ Siyan' qalasında Küres türlerinen Aziya çempionatı, Dohada ötken jeñil atletikadan Aziya çempionatı, Taşkentte ötken Körkem gimnastikadan älem kubogı, Qıtaydıñ Ninbo qalasında ötken auır atletikadan Aziya çempionatı. Biraq, bizdiñ Qazsport osınıñ birde-birin körsetken joq.

Bwlar şetelde ötken jarıstar. Biıl säuir ayında Almatıda futzaldan UEFA Çempiondar ligasınıñ Törttik finalı ötti.Törttik final Europa futzalınıñ eñ şoqtığı biik turniri. Bwl jarısqa Europanıñ eñ mıqtı degen tört komandası ğana qatısadı. Biıl Almatı törinde qazaq futzalınıñ maqtanışı «Qayrattan» bölek, «Sporting» (Portugaliya), «Inter» (Ispaniya), «Barselona» (Ispaniya) komandaları öner körsetedi. Qazsport öz üyimizde ötip jatqan osı jarıstı da körermen nazarına wsınğan joq. Qayta «Habar» telearnası qazaq janküyerlerine ülken sıy jasap, osı turnirdi tikeley efirge şığardı.

«Qayrat»

Endi alısqa barmay, küni keşe orın alğan keleñsizdikti söz eteyik. Elordamızda 14-22 qırküyek aralığında küres türlerinen licenziyalıq älem çempionatı ötti. Öz salmağında üzdik şıqqan altı baluan 2020 jılı Tokioda ötetin Olimpiada oyındarına joldama almaq. Obalı neşik, Qazsport bwl jarıstı körsetti (öz jerimizde ötken älem çempionatın körsetpese bolmas).

Biraq 20 qırküyek küni jürisinen jañıldı. Ol küni boz kilemge erkin küres şeberleri şıqqan. Keşki sessiyada qazaq baluandarı üşin asa mañızdı kezdesuler ötti. Atap aytqanda, Nwrislam Sanaev (57 keli) qola medal'ge, Däulet Niyazbekov (65 keli) altın medal'ge talastı. Bwl eki kezdesu de jergilikti uaqıt 19:30-dan keyin ötti. 18:00-de bastalğan keşki sessiyanı körsetip otırğan Qazsport osınday jauaptı sätte (19:00-den bastap) hokkeyden «Barıs» - «Traktor» matçın körsetip ketti. Söytip, teledidarğa telmirgen qalıñ körermen Niyazbekov pen Sanaevtıñ soñğı beldesuin köre alğan joq.

Küres ğana emes 20 qırküyek küni bokstan älem çempionatınıñ da jartılay finaldıq kezdesuleri ötip jatqan. Sağat 20:00-de bastalğan keşki sessiyada üş boksşımız finalğa şığu üşin jan salıp jattı. Al Qazsport efirinde jaña mausımdı endi bastağan, mañızdılığı tömen «Barıstıñ» oyını.

Boks. Jartılay finaldıq kezdesuler, keşki sessiya (20:00):

69 keli: Abılayhan Jüsipov - Andrey Zamkovoy (Resey)
81 keli: Bekzat Nwrdäuletov - Hulio Sezar La Kruz (Kuba)
+91 keli: Qamşıbek Qoñqabaev -Djastis Huni (Avstraliya)

Älem çempionatınıñ finalında qos baluanımız beldesip jatsa; üş boksşımız älem çempionı atanu üşin barın salıp jatsa, eldegi jalğız sporttıq arna translyaciyanı orta joldan üzip, tük mañızı joq hokkeyge kezek berdi. Hokkey ayaqtalğan soñ, Qazsport küres pen bokstıñ qaytalauın körsetti. Soğan qarağanda, Qazsport basşıları üşin älem çempionatına qarağanda künde bolıp jatqan hokkey mañızdı sekildi.

Bizdiñ bwl sözimizdi arna basşısı Pavel Cıbulinniñ özi rastaydı. Pavel Valer'eviç bir swhbatında bwnı qadap twrıp aytqan.

- QHL pley-off kezeñindegi «Barıs» matçtarınıñ translyaciyası mañızdı ekenin eskeru qajet. Hokkey tartıstarınıñ barlığı tikeley efirde taratıladı, bwl tipti, talqığa da salınbaydı. «Barıs» jäne onıñ janküyerleri üşin biz barlıq çempionattardı taratuğa dayınbız, - deydi Cıbulin.

Pavel Cıbulin

Mine osı wstanımına berik twrğan Cıbulin mırza älem çempionatına qatısıp jatqan baluandarımız ben boksşılarımızdı "laqtıra" saldı. Arna basşıları bilmese biz aytayıq, qazaq janküyerleri üşin eñ qızıqtı sport türleri boks, küres jäne auır atletika. Elimiz sportşılarınıñ oñ jambasına keletin sport türelri de osılar. Al hokkeydi telearna basışaları jaqsı köredi eken dep twtas körermenge tıqpalay almaymız...

Köñilge köleñke tüsirgen ekinşi bir mäsele, bwl arna äubasta wlttıq joba retinde jwmıs bastağanımen, qazirgi tañda qazaq qoğamınan alıstap baradı. Wlttıq sport türlerin körsetui mülde naşar ekeni ekibastan belgili. Bizge telearna ideologiyalıq jäne tildik twrğıdan öz jolın taba almay jürgendey körinedi. Mäselen, elordadağı küres türlerinen älem çempionatı memlekettik til men ağılşın tilinde ğana ötti. Wyımdastıruşılar osılay şeşipti. Biraq Qazsport tikeley efirde orıs tilinde de jürgizdi (taza memlekettik tilde ötken sporttıq şaralarda orıs tilin tıqpalağanı birinşi ret emes).

Onıñ üstine, otandıq jalğız sporttıq arnanıñ reseylik sportşılar men reseylik komandalarğa özge şetelmen salıstırğanda basımdılıq beretini de bayqalıp qaladı.

Mäselen, 2018 jılı köktemde (15 naurız) futboldan Europa ligasınıñ 1/8 finalı ayasındağı qarımta kezdesulerdi körsetu barısında ülken dau tuğanı esimizde. Europa ligasınıñ erejesine say, bwl kezeñdegi 8 matçtıñ barlığı bir künde ötedi. Al Qazsport telearnası sol küni üş birdey matçtı tikeley efirde körsetti. Bir qızığı, üşeui de reseylik komandalardıñ qatısuımen ötetin oyındar (Zenit, Lokomotiv, CSKA). Däl sol küni Angliyanıñ, Italiyanıñ, Germaniyanıñ alpauıt komandaları oynaytınına qaramastan, Reseydiñ komandaların tañdadı. Basqaşa aytqanda, qazaq janküyerlerine reseylik komandalardı küştep körsetti.

Ekinşi mısal, biıl naurız ayınan bastap Qazsport Europanıñ bes iri çempionatın körsetip jür. Är apta sayın Angliya, Ispaniya, Italiya, Franciya jäne Germaniya çempionattarınan bir oyın körsetemiz deydi.

Al endi mına qızıqqa qarañız, naurız ayınan beri Qazsport efirinde eñ köp körsetilgen komanda franciya çempionatında baq sınaytın «Monako» eken. Qazaqstandıq janküyerler «Monako» komandasınıñ qatısuımen 6 birdey oyındı tamaşalaptı. Calıstıru üşin aytsaq, Europanıñ alpauıttarı «Real» men «Barselonanıñ» özi Qazsport efirine tört retten ğana şıqqan eken.

«Anje» – «Monako» - 2 naurız
«Monako» – «Bordo» - 9 naurız
«Monako» – «Reyms» - 13 säuir
«Monako» – PSJ - 21 säuir
«Monako» – «Marsel'» - 15 qırküyek
«Reyms» – «Monako» - 21 qırküyek.

Qazsport süyiktisi «Monako» qanday komanda? «Monako» futbol klubınıñ iesi äri prezidenti reseylik Dmitriy Rıbolovlev degen adam. Klubtıñ 66,7%-ı osı kisige tiesili. Onıñ üstine bwl komandada Resey futbolınıñ qazirgi jarıq jwldızı Aleksandr Golovin dop tebedi. Mümkin bwl jay säykestik şığar. Eger bwl säykestik bolmay, äldekim qwrmında reseylik oyınşı oynağanı üşin «Monako» qazaqstandıq janküyerlerge ötimdi dep oylasa qattı qatelesip jür.

Aleksandr Golovin

Söz soñında aytarımız, telearna basşılığı "Qazsport" arnasın tek qazaqtar köretinin bilui kerek edi. Mıñ jerden reseylik komandanı jarnamalağanımızben elimizdegi özge wlt ökilderi qazaqstandıq telearnalarğa pısqırıp ta qaramaydı. Sebebi, elimizde habar taratatın reseylik arnalar özimizdikinen köp. Sol üşin otandıq telearnalar men baspasöz Resey jaylı ayta berudi toqtatqanı jön. Bizdiñ oyımızşa, keybir elimiz janküyerleriniñ reseylik sportşılardı özimsinip, solarğa janküyer boluına el biligi men baspasözimiz türtki bolıp otır.

Quanış Qappas

Abai.kz

25 pikir