سارسەنبى, 13 قاراشا 2019
ساڭلاق 3297 25 پىكىر 24 قىركۇيەك, 2019 ساعات 15:40

«Qazsport» قازاققا نە كورسەتىپ ءجۇر؟

«قازاقستان» رترك» اق قۇرامىنا كىرەتىن Qazsport تەلەارناسى 2013 جىلى 1 شىلدەدە اشىلدى. سودان بەرى ەلدەگى سپورت جانكۇيەرلەرى وسى ارنانى تاماشالاپ كەلەدى. ەلىمىزدە تۇڭعىش رەت سپورتتىق ارنا اشىلادى دەگەندە بوركىمىزدى اسپانعا اتقان ەدىك. ءوز سپورتشىلارىمىزدىڭ جەتىستىگىن ءوز ارنامىزدان كورەمىز دەپ...

Qazsport-ءتىڭ اۋەلدەگى ماقساتى قازاقستاننىڭ سپورتتاعى جەتىستىكتەرىن دارىپتەۋ بولاتىن. سپورتشىلارىمىز قاتىسقان بايراقتى باسەكەلەردى كورەرمەن نازارىنا ۇسىنىپ، ەل سپورتىنىڭ دامۋىنا ءوز ۇلەسىن قوسۋ مىندەتى جۇكتەلگەن. سونىمەن قاتار، سپورت ارقىلى جاس جەتكىنشەكتەردى وتان سۇيگىشتىككە باۋلۋعا ءتيىس ەدى. الايدا، اتالعان ارنانىڭ سوڭعى جىلدارداعى جۇمىس ىستەۋ باعىتى كورەرمەن كوڭىلىنەن شىعىپ جۇرگەن جوق.

بۇلاي دەۋىمىزگە ءبىرىنشى سەبەپ، ارنا ەلىمىز سپورتشىلارى قاتىسقان ءىرى جارىستاردى تىكەلەي ەفيردە كورسەتە الماي وتىر. سپورتشىلارىمىز جۇلدە العان قانشاما حالىقارالىق تۋرنيرلەر تىكەلەي ەفيردەن تىس قالدى. Qazsport-تان قايىر بولماعان سوڭ جانكۇيەر قاۋىم امالىسىز شەتەلدىڭ سپورتتىق ارنالارىن ساتىپ الىپ، كورىپ ءجۇر.

ەلىمىز سپورتشىلارى بيىل جىل باسىنان بەرى كوپتەگەن ءىرى جارىستارعا قاتىستى. ماسەلەن، بوكستان تايلاندتا وتكەن ازيا چەمپيوناتى، قىتايدىڭ نينبو قالاسىندا وتكەن اۋىر اتلەتيكادان ازيا چەمپيوناتى، قىتايدىڭ سيان قالاسىندا كۇرەس تۇرلەرىنەن ازيا چەمپيوناتى، دوحادا وتكەن جەڭىل اتلەتيكادان ازيا چەمپيوناتى، تاشكەنتتە وتكەن كوركەم گيمناستيكادان الەم كۋبوگى، قىتايدىڭ نينبو قالاسىندا وتكەن اۋىر اتلەتيكادان ازيا چەمپيوناتى. بىراق، ءبىزدىڭ Qazsport وسىنىڭ بىردە-ءبىرىن كورسەتكەن جوق.

بۇلار شەتەلدە وتكەن جارىستار. بيىل ءساۋىر ايىندا الماتىدا فۋتزالدان ۋەفا چەمپيوندار ليگاسىنىڭ تورتتىك فينالى ءوتتى.تورتتىك فينال ەۋروپا فۋتزالىنىڭ ەڭ شوقتىعى بيىك ءتۋرنيرى. بۇل جارىسقا ەۋروپانىڭ ەڭ مىقتى دەگەن ءتورت كومانداسى عانا قاتىسادى. بيىل الماتى تورىندە قازاق فۋتزالىنىڭ ماقتانىشى «قايراتتان» بولەك، «سپورتينگ» (پورتۋگاليا), «ينتەر» (يسپانيا), «بارسەلونا» (يسپانيا) كوماندالارى ونەر كورسەتەدى. Qazsport ءوز ۇيىمىزدە ءوتىپ جاتقان وسى جارىستى دا كورەرمەن نازارىنا ۇسىنعان جوق. قايتا «حابار» تەلەارناسى قازاق جانكۇيەرلەرىنە ۇلكەن سىي جاساپ، وسى ءتۋرنيردى تىكەلەي ەفيرگە شىعاردى.

«قايرات»

ەندى الىسقا بارماي، كۇنى كەشە ورىن العان كەلەڭسىزدىكتى ءسوز ەتەيىك. ەلوردامىزدا 14-22 قىركۇيەك ارالىعىندا كۇرەس تۇرلەرىنەن ليتسەنزيالىق الەم چەمپيوناتى ءوتتى. ءوز سالماعىندا ۇزدىك شىققان التى بالۋان 2020 جىلى توكيودا وتەتىن وليمپيادا ويىندارىنا جولداما الماق. وبالى نەشىك، Qazsport بۇل جارىستى كورسەتتى ء(وز جەرىمىزدە وتكەن الەم چەمپيوناتىن كورسەتپەسە بولماس).

بىراق 20 قىركۇيەك كۇنى جۇرىسىنەن جاڭىلدى. ول كۇنى بوز كىلەمگە ەركىن كۇرەس شەبەرلەرى شىققان. كەشكى سەسسيادا قازاق بالۋاندارى ءۇشىن اسا ماڭىزدى كەزدەسۋلەر ءوتتى. اتاپ ايتقاندا، نۇريسلام ساناەۆ (57 كەلى) قولا مەدالگە، داۋلەت نيازبەكوۆ (65 كەلى) التىن مەدالگە تالاستى. بۇل ەكى كەزدەسۋ دە جەرگىلىكتى ۋاقىت 19:30-دان كەيىن ءوتتى. 18:00-دە باستالعان كەشكى سەسسيانى كورسەتىپ وتىرعان Qazsport وسىنداي جاۋاپتى ساتتە (19:00-دەن باستاپ) حوككەيدەن «بارىس» - «تراكتور» ماتچىن كورسەتىپ كەتتى. ءسويتىپ، تەلەديدارعا تەلمىرگەن قالىڭ كورەرمەن نيازبەكوۆ پەن ساناەۆتىڭ سوڭعى بەلدەسۋىن كورە العان جوق.

كۇرەس عانا ەمەس 20 قىركۇيەك كۇنى بوكستان الەم چەمپيوناتىنىڭ دا جارتىلاي فينالدىق كەزدەسۋلەرى ءوتىپ جاتقان. ساعات 20:00-دە باستالعان كەشكى سەسسيادا ءۇش بوكسشىمىز فينالعا شىعۋ ءۇشىن جان سالىپ جاتتى. ال Qazsport ەفيرىندە جاڭا ماۋسىمدى ەندى باستاعان، ماڭىزدىلىعى تومەن «بارىستىڭ» ويىنى.

بوكس. جارتىلاي فينالدىق كەزدەسۋلەر، كەشكى سەسسيا (20:00):

69 كەلى: ابىلايحان ءجۇسىپوۆ - اندرەي زامكوۆوي (رەسەي)
81 كەلى: بەكزات نۇرداۋلەتوۆ - حۋليو سەزار لا كرۋز (كۋبا)
+91 كەلى: قامشىبەك قوڭقاباەۆ -دجاستيس حۋني (اۆستراليا)

الەم چەمپيوناتىنىڭ فينالىندا قوس بالۋانىمىز بەلدەسىپ جاتسا; ءۇش بوكسشىمىز الەم چەمپيونى اتانۋ ءۇشىن بارىن سالىپ جاتسا، ەلدەگى جالعىز سپورتتىق ارنا ترانسلياتسيانى ورتا جولدان ءۇزىپ، تۇك ماڭىزى جوق حوككەيگە كەزەك بەردى. حوككەي اياقتالعان سوڭ، Qazsport كۇرەس پەن بوكستىڭ قايتالاۋىن كورسەتتى. سوعان قاراعاندا، Qazsport باسشىلارى ءۇشىن الەم چەمپيوناتىنا قاراعاندا كۇندە بولىپ جاتقان حوككەي ماڭىزدى سەكىلدى.

ءبىزدىڭ بۇل ءسوزىمىزدى ارنا باسشىسى پاۆەل ءتسىبۋليننىڭ ءوزى راستايدى. پاۆەل ۆالەرەۆيچ ءبىر سۇحباتىندا بۇنى قاداپ تۇرىپ ايتقان.

- قحل پلەي-وفف كەزەڭىندەگى «بارىس» ماتچتارىنىڭ ترانسلياتسياسى ماڭىزدى ەكەنىن ەسكەرۋ قاجەت. حوككەي تارتىستارىنىڭ بارلىعى تىكەلەي ەفيردە تاراتىلادى، بۇل ءتىپتى، تالقىعا دا سالىنبايدى. «بارىس» جانە ونىڭ جانكۇيەرلەرى ءۇشىن ءبىز بارلىق چەمپيوناتتاردى تاراتۋعا دايىنبىز، - دەيدى تسىبۋلين.

پاۆەل تسىبۋلين

مىنە وسى ۇستانىمىنا بەرىك تۇرعان تسىبۋلين مىرزا الەم چەمپيوناتىنا قاتىسىپ جاتقان بالۋاندارىمىز بەن بوكسشىلارىمىزدى "لاقتىرا" سالدى. ارنا باسشىلارى بىلمەسە ءبىز ايتايىق، قازاق جانكۇيەرلەرى ءۇشىن ەڭ قىزىقتى سپورت تۇرلەرى بوكس، كۇرەس جانە اۋىر اتلەتيكا. ەلىمىز سپورتشىلارىنىڭ وڭ جامباسىنا كەلەتىن سپورت تۇرەلرى دە وسىلار. ال حوككەيدى تەلەارنا باسىشالارى جاقسى كورەدى ەكەن دەپ تۇتاس كورەرمەنگە تىقپالاي المايمىز...

كوڭىلگە كولەڭكە تۇسىرگەن ەكىنشى ءبىر ماسەلە، بۇل ارنا ءاۋباستا ۇلتتىق جوبا رەتىندە جۇمىس باستاعانىمەن، قازىرگى تاڭدا قازاق قوعامىنان الىستاپ بارادى. ۇلتتىق سپورت تۇرلەرىن كورسەتۋى مۇلدە ناشار ەكەنى ەكىباستان بەلگىلى. بىزگە تەلەارنا يدەولوگيالىق جانە تىلدىك تۇرعىدان ءوز جولىن تابا الماي جۇرگەندەي كورىنەدى. ماسەلەن، ەلورداداعى كۇرەس تۇرلەرىنەن الەم چەمپيوناتى مەملەكەتتىك ءتىل مەن اعىلشىن تىلىندە عانا ءوتتى. ۇيىمداستىرۋشىلار وسىلاي شەشىپتى. بىراق Qazsport تىكەلەي ەفيردە ورىس تىلىندە دە جۇرگىزدى (تازا مەملەكەتتىك تىلدە وتكەن سپورتتىق شارالاردا ورىس ءتىلىن تىقپالاعانى ءبىرىنشى رەت ەمەس).

ونىڭ ۇستىنە، وتاندىق جالعىز سپورتتىق ارنانىڭ رەسەيلىك سپورتشىلار مەن رەسەيلىك كوماندالارعا وزگە شەتەلمەن سالىستىرعاندا باسىمدىلىق بەرەتىنى دە بايقالىپ قالادى.

ماسەلەن، 2018 جىلى كوكتەمدە (15 ناۋرىز) فۋتبولدان ەۋروپا ليگاسىنىڭ 1/8 فينالى اياسىنداعى قارىمتا كەزدەسۋلەردى كورسەتۋ بارىسىندا ۇلكەن داۋ تۋعانى ەسىمىزدە. ەۋروپا ليگاسىنىڭ ەرەجەسىنە ساي، بۇل كەزەڭدەگى 8 ماتچتىڭ بارلىعى ءبىر كۇندە وتەدى. ال Qazsport تەلەارناسى سول كۇنى ءۇش بىردەي ماتچتى تىكەلەي ەفيردە كورسەتتى. ءبىر قىزىعى، ۇشەۋى دە رەسەيلىك كوماندالاردىڭ قاتىسۋىمەن وتەتىن ويىندار (زەنيت، لوكوموتيۆ، تسسكا). ءدال سول كۇنى انگليانىڭ، يتاليانىڭ، گەرمانيانىڭ الپاۋىت كوماندالارى وينايتىنىنا قاراماستان، رەسەيدىڭ كوماندالارىن تاڭدادى. باسقاشا ايتقاندا، قازاق جانكۇيەرلەرىنە رەسەيلىك كوماندالاردى كۇشتەپ كورسەتتى.

ەكىنشى مىسال، بيىل ناۋرىز ايىنان باستاپ Qazsport ەۋروپانىڭ بەس ءىرى چەمپيوناتىن كورسەتىپ ءجۇر. ءار اپتا سايىن انگليا، يسپانيا، يتاليا، فرانتسيا جانە گەرمانيا چەمپيوناتتارىنان ءبىر ويىن كورسەتەمىز دەيدى.

ال ەندى مىنا قىزىققا قاراڭىز، ناۋرىز ايىنان بەرى Qazsport ەفيرىندە ەڭ كوپ كورسەتىلگەن كوماندا فرانتسيا چەمپيوناتىندا باق سىنايتىن «موناكو» ەكەن. قازاقستاندىق جانكۇيەرلەر «موناكو» كومانداسىنىڭ قاتىسۋىمەن 6 بىردەي ويىندى تاماشالاپتى. Cالىستىرۋ ءۇشىن ايتساق، ەۋروپانىڭ الپاۋىتتارى «رەال» مەن «بارسەلونانىڭ» ءوزى Qazsport ەفيرىنە ءتورت رەتتەن عانا شىققان ەكەن.

«انجە» – «موناكو» - 2 ناۋرىز
«موناكو» – «بوردو» - 9 ناۋرىز
«موناكو» – «رەيمس» - 13 ءساۋىر
«موناكو» – پسج - 21 ءساۋىر
«موناكو» – «مارسەل» - 15 قىركۇيەك
«رەيمس» – «موناكو» - 21 قىركۇيەك.

Qazsport سۇيىكتىسى «موناكو» قانداي كوماندا؟ «موناكو» فۋتبول كلۋبىنىڭ يەسى ءارى پرەزيدەنتى رەسەيلىك دميتري رىبولوۆلەۆ دەگەن ادام. كلۋبتىڭ 66,7%-ى وسى كىسىگە تيەسىلى. ونىڭ ۇستىنە بۇل كوماندادا رەسەي فۋتبولىنىڭ قازىرگى جارىق جۇلدىزى الەكساندر گولوۆين دوپ تەبەدى. مۇمكىن بۇل جاي سايكەستىك شىعار. ەگەر بۇل سايكەستىك بولماي، الدەكىم قۇرمىندا رەسەيلىك ويىنشى ويناعانى ءۇشىن «موناكو» قازاقستاندىق جانكۇيەرلەرگە ءوتىمدى دەپ ويلاسا قاتتى قاتەلەسىپ ءجۇر.

الەكساندر گولوۆين

ءسوز سوڭىندا ايتارىمىز، تەلەارنا باسشىلىعى "Qazsport" ارناسىن تەك قازاقتار كورەتىنىن ءبىلۋى كەرەك ەدى. مىڭ جەردەن رەسەيلىك كوماندانى جارنامالاعانىمىزبەن ەلىمىزدەگى وزگە ۇلت وكىلدەرى قازاقستاندىق تەلەارنالارعا پىسقىرىپ تا قارامايدى. سەبەبى، ەلىمىزدە حابار تاراتاتىن رەسەيلىك ارنالار وزىمىزدىكىنەن كوپ. سول ءۇشىن وتاندىق تەلەارنالار مەن ءباسپاسوز رەسەي جايلى ايتا بەرۋدى توقتاتقانى ءجون. ءبىزدىڭ ويىمىزشا، كەيبىر ەلىمىز جانكۇيەرلەرىنىڭ رەسەيلىك سپورتشىلاردى ءوزىمسىنىپ، سولارعا جانكۇيەر بولۋىنا ەل بيلىگى مەن ءباسپاسوزىمىز تۇرتكى بولىپ وتىر.

قۋانىش قاپپاس

Abai.kz

25 پىكىر