Jwma, 15 Qaraşa 2019
844 4 pikir 18 Qazan, 2019 sağat 11:58

Aqtöbede jwmısşılar talabınan soñ Qıtay kompaniyası jalaqı ösirgenin habarladı

Aqtöbedegi "Vostok neft' i servisnoe obslujivanie"kompaniyası jalaqınıñ azdığına narazı bolıp, keniştegi jwmıstı toqtatıp tastağan qazaqstandıqtarmen mämilege keldi. Bwl turalı 16 qazanda Azattıqqa Qıtay kompaniyasında bwrğılauşınıñ kömekşisi bolıp jwmıs isteytin Jaswlan Qanbaliev habarladı.

Jaswlan Qanbalievtiñ sözinşe, bwrğılauşı kömekşileriniñ jalaqısı narazılıq akciyalarınan keyin 50 payızğa köbeygen.

- Bwrın qolıma 120 mıñ teñge (308 dollar) alıp jürdim. Key kezde ay 28-30 künnen bitken kezde jalaqım tipti azayıp qalatın. Qazan ayınan bastap jalaqıma 50 payız qosılatın bolsa, qolıma ay sayın 200 mıñ teñge (514 dollar) tiyui kerek. Ärine, qımbatşılıq qıspaqqa alıp twrğan kezde 200 mıñ teñge de asa köp aqşa emes. Degenmen bwğan da şükir, - deydi Jaswlan Qanbaliev.

Jwmısşılar narazılığınan keyin Qıtay kompaniyasınıñ jalaqını köbeytkenin Aqtöbe oblısınıñ äkimdigi de rastadı. Aqtöbe oblısı äkiminiñ orınbasarı Qayrat Bekenovtiñ aytuınşa, "Vostok neft' i servisnoe obslujivanie" kompaniyasında bwrğılauşınıñ kömekşisi bolıp eñbek etetin qazaqstandıqtar jıldar boyı eñ auır jwmıstı istep, eñ az jalaqı alıp kelgen.

- Eki ayğa sozılğan jwmısşılar narazılığı oblıs äkimdigin mediator retinde äreket etuge mäjbürledi. Negizi bwl äkimdik aralasatın şarua emes edi. Jalaqı kompaniyanıñ işki rezervi esebinen köteriletin boldı. Biraq barlıq jwmısşınıñ jalaqısı 50 payızğa ösken joq. Därejesine baylanıstı 316 adamnıñ jalaqısı 50 payızğa köbeydi, - deydi Qayrat Bekenov.

Jwmısşılar 11 qazanda kompaniyağa kelip, jalaqı ösirudi tağı da talap etken edi. Eki ayğa sozılğan jalaqı dauı Aqtöbedegi kompaniyağa Pekinnen arnayı delegaciya kelgennen keyin ğana şeşilgen. Qayrat Bekenov Pekinnen kelgen delegaciyamen wzaq äri kürdeli kelissöz jürgizilgenin aytadı.

"Vostok neft' i servisnoe obslujivanie" seriktestiginiñ bas direktorı Çjan Baoczyun' bwrğılauşı brigadalardağı jwmısşılardıñ jalaqısı injenerlik-tehnikalıq qwramğa qarağanda az bolğanın rastap otır. Çjan Baoczyan' "jwmısşılar talabı orındı" dep sanaydı.

- Bwrğılauşılardıñ kömekşileri men dänekerleuşilerdiñ jalaqısı qazan ayınan bastap 50 payızğa östi. Sol siyaqtı laborant-kollektorlardıñ jalaqısına 40 payızğa, bwrğılauşı qondırğınıñ maşinisiniñ aylığı 30 payız, bwrğılauşılardıñ eñbekaqısına 25 payız qosıldı. Jañajol, Keñqiyaq pen Severnaya truva kenişterindegi barlıq bwrğılauşı brigadalar qayta jwmısqa kiristi, -dedi Çjan Baoczyan'.

Aqtöbedegi "Vostok neft' i servisnoe obslujivanie" kompaniyasınıñ jwmısşıları eki aydan beri jalaqı ösirudi talap etip jürgen. Kompaniya narazılıqtan keyin jalaqını 20 payızğa ösiretinderin mälimdegen. Biraq jwmısşılar bwl şeşimmen kelispey, 50 payızğa ösirudi talap qılğan.

Aqtöbe oblısı äkimdiginiñ dereginşe, "Vostok neft' i servisnoe obslujivanie" - 100 payız akciyası Qıtaydıñ Xibu (Sibu) korporaciyasına tiesili kompaniya. "SNPS-Aqtöbemwnaygaz" kompaniyasınıñ tapsırısımen Aqtöbe oblısındağı mwnay kenişterin bwrğılaytın jwmıs isteydi. Äkimdiktiñ mälimetinşe, kompaniyadağı 1200 adamnıñ on payızı - Qıtaydan kelgen maman.

Jalaqınıñ azdığına şağınıp, narazılıq bildiruşiler arasında Qıtay jwmısşıları joq.

Abai.kz

4 pikir