Бүгін Шымкент қаласының әкімі ауысты. Ақорда сайты қала әкімін ауыстырғаны жөніндегі Қазақстан Президентінің Жарлығын жариялады. Шымкенттің жаңа әкімі болып Мұрат Әйтенов тағайындалды.

Естеріңізде болса, 2018 жылдың 19 маусымында сол кездегі президент Нұрсұлтан Назарбаев «ҚР Әкімшілік-аумақтық құрылыс туралы» заңның 9 бабына сәйкес Шымкент қаласына «Республикалық маңызы бар қала» мәртебесін беру туралы Жарлыққа қол қойды.

Шымкент – Республикалық қала, 17-ші өңір атанды. Бұрынғы Оңтүстік Қазақстан облысы таратылып, жаңа облыс – Түркістан облысы болып бекітілді.

1. Ғабидолла Әбдірахымов. 45 жас (23 қаңтарда толады)

2018 жылдың 20 маусымы су жаңа статусқа ие болған Шымкентке әкім болып Ғабидолла Әбдірахымов тағайындалды. Ғабидолла Әбдірахымов осыған дейін 2015-2017 жылдар аралығында Шымкентте әкім болған.

Екі дипломы бар. «Болашақ» бағдарламасымен Германияда оқып келген. Экономист-бухгалтер және әкімшілік басқару ісінің маманы. Қазақ, орыс, неміс және ағылшын тілдерін меңгерген.

Ол әкім болып тұрғанда, оның сөз арасында айтқандары ел-халықтың қызу талқысына көп түсетін.

2016 жылы ол алғашқылардың бірі болып қалалық велосипедтің жылдық абонементін сатып алды. Сөйтіп, Шымкент жұртын шайтаншаққа отырғызған әкім болып ел есінде сақталды.

Бір сұхбатында Ғабекең күнде жұмысқа велосипедпен баратынын айтып қалған.

Веложарыстан Олимпиада чемпионы Александр Винокуров Ғабекеңе вилосипед сыйлаған.

Кейін Ғабекеңнің өзі де Назима дейтін әншіге шайтаншақтың біреуін сыйға берген.

Сосын қыз-келіншектерге велосипед үшін биік өкшелі аяқ-киім кимеуге кеңес берді.

Ғабекеңнің әкімдігі тұсында елдің есінде қалған оқиғалардың бірі - бюджеттің 80 миллион теңгесін қайырымдылыққа жұмсау туралы шешім болды. Бұл сома әуелде жаңа жылға қарсы қаланы безендіруге деп жоспарланған екен. Кейін әкім Әбдірахымов жетімдер мен аз қамтылған отбасыларға жәрдем беруге жұмсау туралы шешімге келген. Ақырында 5500 балаға қыстық киім алып таратқан.

Әкімдік қызметкерлеріне қызметтік көлік қолдануға бір айға тыйым салды. Қоғамдық көлікпен жүруге кеңес берді.

Тіпті арасында автобусқа үлгере алмай қалған кездері де болған көрінеді.

Өзі де қаладағы автобустардың бірін тізгіндеп көрген.

Айтпақшы, Ғабекең қала күнін тойлау кезінде, гала-кәнсертте «Шымкент – зың қала» деп мәлімдеген. Ғабекеңнің дәл осы сөзі хит болып тарады. Қазір Оның ел ішіндегі лақап аты - Зың әкім.

Ең ақырында Лондоннан сәлем жолдап, ағаларына алғыс айтқан еді. Соны себеп қылған «ағалары» 2019 жылдың шілдесінде Ғабекеңді әкімдіктен алып тастады. Аз уақыт жұмыссыз жүріп, кейін астана жаққа ауысты.

2. Ерлан Айтаханов. 49 жаста.

2019 жылдың 30 шілдесі күні Ғабекеңнің орнына Шымкентті басқаруға Ерлан Қуанышұлы Айтаханов тағайындалды.

Оның әкесі Қуаныш Айтаханов біраз жыл оңтүстікте әкім болған. ОҚО атынан Сенатта депутат болған. Әкімнің баласы әкім болды, деп шулаған біраз жұрт. Ерлан Қуанышұлы да қала тұрғындарына жақын жүруге тырысты.

Жылусыз қалған үйлерді де,

жабайы базарларды да,

денсаулық сақтау нысандарын да,

үй-үйлерді де аралап шықты.

Қарттарға да құрмет көрсетті.

Арыстағы ағайынға да барды.

Қалада да болды,

далада да болды. Алайда, бүгін Ерекең де қызметімен қоштасты.

3. Мұрат Әйтенов. 39 жаста.

2020 жылдың 21 қаңтарында Шымкент әкімі болып Мұрат Әйтенов тағайындалды.

Қызық болғанда, Мәкең былтыр ғана, 2019 жылдың желтоқсанында Шымкент қаласы әкімінің бірінші орынбасары болып тағайындалған екен. Енді міне, арада ай өтерде бірінші орынбасар қызметінен бірінші әкім қызметіне бір-ақ секірді.

Шымкент қаласы Республикалық статусқа ие болғалы  үш әкім ауысыпты. Ғабидолла Әбдірахымов - 1 жыл, 1 ай, 10 күн әкім болды. Онан кейін қызмет алған Ерлан Айтаханов - 5 ай 21 күн әкім болды. Бүгін тағайындалған Мұрат Әйтеновтің әлі қаншаға жетерін уақыт көрсетер. Әзірге су жаңа әкімге сәттілік тілейік...

Abai.kz