بۇگىن شىمكەنت قالاسىنىڭ اكىمى اۋىستى. اقوردا سايتى قالا اكىمىن اۋىستىرعانى جونىندەگى قازاقستان پرەزيدەنتىنىڭ جارلىعىن جاريالادى. شىمكەنتتىڭ جاڭا اكىمى بولىپ مۇرات ايتەنوۆ تاعايىندالدى.

ەستەرىڭىزدە بولسا، 2018 جىلدىڭ 19 ماۋسىمىندا سول كەزدەگى پرەزيدەنت نۇرسۇلتان نازارباەۆ «قر اكىمشىلىك-اۋماقتىق قۇرىلىس تۋرالى» زاڭنىڭ 9 بابىنا سايكەس شىمكەنت قالاسىنا «رەسپۋبليكالىق ماڭىزى بار قالا» مارتەبەسىن بەرۋ تۋرالى جارلىققا قول قويدى.

شىمكەنت – رەسپۋبليكالىق قالا، 17-ءشى ءوڭىر اتاندى. بۇرىنعى وڭتۇستىك قازاقستان وبلىسى تاراتىلىپ، جاڭا وبلىس – تۇركىستان وبلىسى بولىپ بەكىتىلدى.

1. عابيدوللا ءابدىراحىموۆ. 45 جاس (23 قاڭتاردا تولادى)

2018 جىلدىڭ 20 ماۋسىمى سۋ جاڭا ستاتۋسقا يە بولعان شىمكەنتكە اكىم بولىپ عابيدوللا ءابدىراحىموۆ تاعايىندالدى. عابيدوللا ءابدىراحىموۆ وسىعان دەيىن 2015-2017 جىلدار ارالىعىندا شىمكەنتتە اكىم بولعان.

ەكى ديپلومى بار. «بولاشاق» باعدارلاماسىمەن گەرمانيادا وقىپ كەلگەن. ەكونوميست-بۋحگالتەر جانە اكىمشىلىك باسقارۋ ءىسىنىڭ مامانى. قازاق، ورىس، نەمىس جانە اعىلشىن تىلدەرىن مەڭگەرگەن.

ول اكىم بولىپ تۇرعاندا، ونىڭ ءسوز اراسىندا ايتقاندارى ەل-حالىقتىڭ قىزۋ تالقىسىنا كوپ تۇسەتىن.

2016 جىلى ول العاشقىلاردىڭ ءبىرى بولىپ قالالىق ۆەلوسيپەدتىڭ جىلدىق ابونەمەنتىن ساتىپ الدى. ءسويتىپ، شىمكەنت جۇرتىن شايتانشاققا وتىرعىزعان اكىم بولىپ ەل ەسىندە ساقتالدى.

ءبىر سۇحباتىندا عابەكەڭ كۇندە جۇمىسقا ۆەلوسيپەدپەن باراتىنىن ايتىپ قالعان.

ۆەلوجارىستان وليمپيادا چەمپيونى الەكساندر ۆينوكۋروۆ عابەكەڭە ۆيلوسيپەد سىيلاعان.

كەيىن عابەكەڭنىڭ ءوزى دە نازيما دەيتىن انشىگە شايتانشاقتىڭ بىرەۋىن سىيعا بەرگەن.

سوسىن قىز-كەلىنشەكتەرگە ۆەلوسيپەد ءۇشىن بيىك وكشەلى اياق-كيىم كيمەۋگە كەڭەس بەردى.

عابەكەڭنىڭ اكىمدىگى تۇسىندا ەلدىڭ ەسىندە قالعان وقيعالاردىڭ ءبىرى - بيۋدجەتتىڭ 80 ميلليون تەڭگەسىن قايىرىمدىلىققا جۇمساۋ تۋرالى شەشىم بولدى. بۇل سوما اۋەلدە جاڭا جىلعا قارسى قالانى بەزەندىرۋگە دەپ جوسپارلانعان ەكەن. كەيىن اكىم ءابدىراحىموۆ جەتىمدەر مەن از قامتىلعان وتباسىلارعا جاردەم بەرۋگە جۇمساۋ تۋرالى شەشىمگە كەلگەن. اقىرىندا 5500 بالاعا قىستىق كيىم الىپ تاراتقان.

اكىمدىك قىزمەتكەرلەرىنە قىزمەتتىك كولىك قولدانۋعا ءبىر ايعا تىيىم سالدى. قوعامدىق كولىكپەن جۇرۋگە كەڭەس بەردى.

ءتىپتى اراسىندا اۆتوبۋسقا ۇلگەرە الماي قالعان كەزدەرى دە بولعان كورىنەدى.

ءوزى دە قالاداعى اۆتوبۋستاردىڭ ءبىرىن تىزگىندەپ كورگەن.

ايتپاقشى، عابەكەڭ قالا كۇنىن تويلاۋ كەزىندە، گالا-كانسەرتتە «شىمكەنت – زىڭ قالا» دەپ مالىمدەگەن. عابەكەڭنىڭ ءدال وسى ءسوزى حيت بولىپ تارادى. قازىر ونىڭ ەل ىشىندەگى لاقاپ اتى - زىڭ اكىم.

ەڭ اقىرىندا لوندوننان سالەم جولداپ، اعالارىنا العىس ايتقان ەدى. سونى سەبەپ قىلعان «اعالارى» 2019 جىلدىڭ شىلدەسىندە عابەكەڭدى اكىمدىكتەن الىپ تاستادى. از ۋاقىت جۇمىسسىز ءجۇرىپ، كەيىن استانا جاققا اۋىستى.

2. ەرلان ايتاحانوۆ. 49 جاستا.

2019 جىلدىڭ 30 شىلدەسى كۇنى عابەكەڭنىڭ ورنىنا شىمكەنتتى باسقارۋعا ەرلان قۋانىشۇلى ايتاحانوۆ تاعايىندالدى.

ونىڭ اكەسى قۋانىش ايتاحانوۆ ءبىراز جىل وڭتۇستىكتە اكىم بولعان. وقو اتىنان سەناتتا دەپۋتات بولعان. اكىمنىڭ بالاسى اكىم بولدى، دەپ شۋلاعان ءبىراز جۇرت. ەرلان قۋانىشۇلى دا قالا تۇرعىندارىنا جاقىن جۇرۋگە تىرىستى.

جىلۋسىز قالعان ۇيلەردى دە،

جابايى بازارلاردى دا،

دەنساۋلىق ساقتاۋ نىساندارىن دا،

ءۇي-ۇيلەردى دە ارالاپ شىقتى.

قارتتارعا دا قۇرمەت كورسەتتى.

ارىستاعى اعايىنعا دا باردى.

قالادا دا بولدى،

دالادا دا بولدى. الايدا، بۇگىن ەرەكەڭ دە قىزمەتىمەن قوشتاستى.

3. مۇرات ايتەنوۆ. 39 جاستا.

2020 جىلدىڭ 21 قاڭتارىندا شىمكەنت اكىمى بولىپ مۇرات ايتەنوۆ تاعايىندالدى.

قىزىق بولعاندا، ماكەڭ بىلتىر عانا، 2019 جىلدىڭ جەلتوقسانىندا شىمكەنت قالاسى اكىمىنىڭ ءبىرىنشى ورىنباسارى بولىپ تاعايىندالعان ەكەن. ەندى مىنە، ارادا اي وتەردە ءبىرىنشى ورىنباسار قىزمەتىنەن ءبىرىنشى اكىم قىزمەتىنە ءبىر-اق سەكىردى.

شىمكەنت قالاسى رەسپۋبليكالىق ستاتۋسقا يە بولعالى  ءۇش اكىم اۋىسىپتى. عابيدوللا ءابدىراحىموۆ - 1 جىل، 1 اي، 10 كۇن اكىم بولدى. ونان كەيىن قىزمەت العان ەرلان ايتاحانوۆ - 5 اي 21 كۇن اكىم بولدى. بۇگىن تاعايىندالعان مۇرات ايتەنوۆتىڭ ءالى قانشاعا جەتەرىن ۋاقىت كورسەتەر. ازىرگە سۋ جاڭا اكىمگە ساتتىلىك تىلەيىك...

Abai.kz