Bek Air компаниясы ұшақ соғылған үйдің иесі Решет Қалибекті сотқа берді. Решет Қалибектің айтуынша, оған бір апта бұрын сотқа шақырту қағазы келген.

"Жақында Bek Air маған сотқа бергені туралы қағаз келді. Енді ойлап отырғаным, неге жерге рұқсат берген әрі сол жерге үй салуға рұқсат берген әкімдіктің үстінен емес, менің үстімнен арызданады? Енді мені кінәлі қылғысы келеді. 21 ақпанға сотқа шақыртып отыр. Мен бастапқыда Bek Air компаниясының үстінен арызданғанмын. Ал енді олар менің үстімнен арызданып отыр", - деп хабарлады Решет Қалибек.

Айта кетейік, Bek Air ұшағы былтыр 27 желтоқсанда таңғы уақытта апатқа ұшыраған. Лайнер Алматыдан Нұр-Сұлтанға ұшып шыққан бетте құлдилап, әуежай қоршауынан асып, үйге соғылған болатын. Ұшақ бортында 93 жолаушы мен экипаждың 5 мүшесі болған. Ресми дерек бойынша, апат салдарынан 12 адам қаза тапты.

Abai.kz