Бүгін Қытайда COVID-19 құрбандарын еске алды, - деп хабарлайды 24.kz.

4-сәуір – Қытайда жалпыұлттық аза тұту күні. Осыған орай, жергілікті уақыт бойынша таңғы сағат 10-да халық коронавирустан қаза тапқандар мен індетке қарсы күресте жан тапсырған адамдардың құрметіне елдің туы төмен түсіп, 3 минут үнсіздік жариялады.

Бейжіңдегі Қазақстан елшілігі мен өзге дипломатиялық мекемелер де қайғыға ортақтасып, туларын төмен түсірді.

Жергілікті билік тұрғындарға әлі де болса қала сыртына шығып, зиратқа баруға тыйым салып отыр. Ережені бұзғандар 14 күн карантинге жабылады. Ал зират басындағы арнайы рәсімдер онлайн немесе арнайы мамандарға тапсырыс беру арқылы ұйымдастырылмақ.

Айта кетейік, Қытайда осы уақытқа дейін COVID-19 дертінен 3 мың 300-ден астам адам көз жұмды.

Ал, соңғы мәлімет бойынша, тағы 19 адам коронавирус жұқтырған.Олардың 18-і – шет елден келгендер.

Тағы бір айта кетерлігі, бұл елде осы дертке шалдыққандардың 94 пайызы сауығып шыққан. Бүгінде 1500 адам ауруханада ем-дом қабылдап жатыр.

Abai.kz