بۇگىن قىتايدا COVID-19 قۇرباندارىن ەسكە الدى، - دەپ حابارلايدى 24.kz.

4-ءساۋىر – قىتايدا جالپىۇلتتىق ازا تۇتۋ كۇنى. وسىعان وراي، جەرگىلىكتى ۋاقىت بويىنشا تاڭعى ساعات 10-دا حالىق كوروناۆيرۋستان قازا تاپقاندار مەن ىندەتكە قارسى كۇرەستە جان تاپسىرعان ادامداردىڭ قۇرمەتىنە ەلدىڭ تۋى تومەن ءتۇسىپ، 3 مينۋت ۇنسىزدىك جاريالادى.

بەيجىڭدەگى قازاقستان ەلشىلىگى مەن وزگە ديپلوماتيالىق مەكەمەلەر دە قايعىعا ورتاقتاسىپ، تۋلارىن تومەن ءتۇسىردى.

جەرگىلىكتى بيلىك تۇرعىندارعا ءالى دە بولسا قالا سىرتىنا شىعىپ، زيراتقا بارۋعا تىيىم سالىپ وتىر. ەرەجەنى بۇزعاندار 14 كۇن كارانتينگە جابىلادى. ال زيرات باسىنداعى ارنايى راسىمدەر ونلاين نەمەسە ارنايى ماماندارعا تاپسىرىس بەرۋ ارقىلى ۇيىمداستىرىلماق.

ايتا كەتەيىك، قىتايدا وسى ۋاقىتقا دەيىن COVID-19 دەرتىنەن 3 مىڭ 300-دەن استام ادام كوز جۇمدى.

ال، سوڭعى مالىمەت بويىنشا، تاعى 19 ادام كوروناۆيرۋس جۇقتىرعان.ولاردىڭ 18-ءى – شەت ەلدەن كەلگەندەر.

تاعى ءبىر ايتا كەتەرلىگى، بۇل ەلدە وسى دەرتكە شالدىققانداردىڭ 94 پايىزى ساۋىعىپ شىققان. بۇگىندە 1500 ادام اۋرۋحانادا ەم-دوم قابىلداپ جاتىر.

Abai.kz