Мәулен Әшімбаев Сенат спикері болып сайланды. Бұл туралы ақпаратты ҚР Президентінің баспасөз хатшысы Берік Уәли «Facebook» парақшасында бөлісті. 

Бүгін Сенатта төраға таңдауы өткен. Депутаттар Мәулен Әшімбаевтың кандидатурасын бірауыздан қолдап, дауыс берген.

Айта кетейік, бүгін Мәулен Әшімбаев Мемлекет басшысының Жарлығымен Сенат депутаты болып тағайындалған.

«Мемлекет Басшысының Жарлығымен Мәулен Сағатханұлы Әшімбаев Қазақстан Республикасы Парламенті Сенатының депутаты болып тағайындалды»,- делінген Ақорда сайтында.

Сондай-ақ, ол ҚР Президентінің Әкімшілігі Басшысының бірінші орынбасары қызметінен босатылған.

Бүгін, сонымен қатар, Орталық сайлау комиссиясының отырысы өтті. Онда Сенатор Дариға Нұрсұлтанқызының өкілеттігін тоқтату мәселесі қаралған. Сөйтіп, ОСК шешім шығарып, Назарбаева ханымның өкілеттігі тоқтатылды.

Abai.kz