ماۋلەن اشىمباەۆ سەنات سپيكەرى بولىپ سايلاندى. بۇل تۋرالى اقپاراتتى قر پرەزيدەنتىنىڭ ءباسپاسوز حاتشىسى بەرىك ءۋالي «Facebook» پاراقشاسىندا ءبولىستى. 

بۇگىن سەناتتا توراعا تاڭداۋى وتكەن. دەپۋتاتتار ماۋلەن اشىمباەۆتىڭ كانديداتۋراسىن ءبىراۋىزدان قولداپ، داۋىس بەرگەن.

ايتا كەتەيىك، بۇگىن ماۋلەن اشىمباەۆ مەملەكەت باسشىسىنىڭ جارلىعىمەن سەنات دەپۋتاتى بولىپ تاعايىندالعان.

«مەملەكەت باسشىسىنىڭ جارلىعىمەن ماۋلەن ساعاتحانۇلى اشىمباەۆ قازاقستان رەسپۋبليكاسى پارلامەنتى سەناتىنىڭ دەپۋتاتى بولىپ تاعايىندالدى»،- دەلىنگەن اقوردا سايتىندا.

سونداي-اق، ول قر پرەزيدەنتىنىڭ اكىمشىلىگى باسشىسىنىڭ ءبىرىنشى ورىنباسارى قىزمەتىنەن بوساتىلعان.

بۇگىن، سونىمەن قاتار، ورتالىق سايلاۋ كوميسسياسىنىڭ وتىرىسى ءوتتى. وندا سەناتور داريعا نۇرسۇلتانقىزىنىڭ وكىلەتتىگىن توقتاتۋ ماسەلەسى قارالعان. ءسويتىپ، وسك شەشىم شىعارىپ، نازارباەۆا حانىمنىڭ وكىلەتتىگى توقتاتىلدى.

Abai.kz