Жуырда қазақстандық қоғамдық саяси институт елдегі билік партиясына («Нұр Отанға») деген халық сенімі қаншалық екенін анықтап, сауалнама жүргізіпті. 

Қоғамдық саясат институтының қазан айындағы сауалнамасының нәтижелеріне сәйкес партияны қолдау деңгейі 76,8%-ды құраған. Сонымен қатар, респонденттердің 70,7%-ы партияның саяси салада бәсекелестері жоқ деген пікірде, ал 69,2%-ы елдің одан әрі дамуын тек «Nur Otan» партиясымен байланыстырады екен.

Партияны қолдаудың жоғары деңгейі, бұл пандемия кезеңінде халықты қолдау жұмыстарының күшеюінің, кері байланыстың онлайн-арналары мен қоғамдық қабылдаулардың нығаюының, Елбасы мен Мемлекет басшысының тапсырмаларының орындалуын бақылау жөніндегі мақсатты жұмыстарының нәтижесі.

Сондай-ақ, партия рейтингтерінің артуына қоғамда сұранысқа ие бола білген праймеризді өткізу ықпал етті. Праймеризде партия мүшелерінің 82,4%-ы дауыс берді, 10 мыңнан астам кандидат тіркелді, олардың 55%-дан астамы қалалық және аудандық мәслихаттар тізіміне өтті. Қазақстандықтардың 65,3%-ы партиялық сайлау туралы естіген, олардың 62%-ы праймеризді «жақсы тәжірибе» деп санаған.

Abai.kz