Бүгін Президентіміз Қасым-Жомарт Тоқаев «Nur Otan» партиясының кезектен тыс XX Съезінде Қазақстан қазіргі ахуалға қарамастан стратегиялық даму мақсаттарын дәйекті түрде іске асырады, деді.

Сондай-ақ мемлекет басшысы Елбасы саясатының сабақтастығын қамтамасыз ету негізгі міндеттің бірі. Партияның қоғамдағы жетекші рөлін ескере отырып, биылғы Жолдауда айтылған реформаларды «Nur Otan» партиясының зор әлеуетіне сүйене отырып жүзеге асырылатынын атап өтті.

Мемлекет басшысы бүгінгі сөзінде алдағы бес жылда басымдылық берілетін негізгі мәселелерді де атап өтті.

«Біздің бағдарламамызда негізгі 4 басымдық бар. Бірінші - әр азаматқа өз әлеуетін жүзеге асыру үшін тең мүмкіндік беру. Біз әлеуметтік-экономикалық саясатта нарық тәсілдерін басшылыққа аламыз. Қаржыны және жәрдемақыны негізсіз, оңды-солды таратуды доғару қажет. Мемлекет атаулы көмекті шын мәнінде мұқтаж адамдарға беру керек. Ең бастысы - әлеуметтік әділдік», - деді ҚР Президенті.

Алдағы 5 жыл ішінде әлеуметтік төлемдерді жыл сайын индекстеу үшін 3 трлн теңгеден астам қаражат бөлінбек.

«Nur Otan» партиясының съезінде кандидаттардың қатары жаңа есімдермен толыққаны белгілі болды. Олардың арасында елге танымал тұлғалар бар. Сонымен қатар бұл жолы кандидаттар ішінде жастар мен әйелдердің көбейгендігін аңғаруға болады.

Асхат Садырбай

Abai.kz