12 қарашада Түркияның Ыстамбұл қаласында Түркі кеңесіне мүше мемлекеттер басшыларының VIII саммиті өтеді.

«Цифрлық дәуірдегі жасыл технологиялар және ақылды қалалар» тақырыбындағы саммитке Түркия, Қазақстан, Әзірбайжан, Қырғызстан, Өзбекстан және Түркіменстан президенттері, сондай-ақ Венгрия Премьер-Министрі мен Бас хатшы қатысады деп жоспарлануда. Мемлекет басшылары ұйымның орта және ұзақ мерзімді перспективаларына қатысты бірқатар маңызды мәселелерді талқылайды. Күн тәртібінен бөлек, ел басшылары ағымдағы өңірлік және халықаралық саяси-экономикалық оқиғалар туралы пікір алмасады.

Төрағалық Әзірбайжаннан Түркияға өтетін саммитте мемлекет басшылары Түркі кеңесі VIII Саммитінің қорытынды құжаты болатын Ыстамбұл декларациясына қол қояды, сондай-ақ басқа да бірқатар келісімдерді қабылдайды. Саммит түркі елдерінің дамуына жаңа серпін береді және ынтымақтастықта маңызды бетбұрыс жасайды деп күтілуде.

Abai.kz