Бүгін ұстаздар күні!

Қазіргі уақыт бой салыстыратын заман емес, ой салыстыратын уақыт. Яғни, қазіргі күні бәсекеге қабілетті болғың келсе, өмір бойы оқу керек! Біліміңді күн сайын жетілдіріп отыру керек! Өйтпесең көштен қаласың...

Дәл бүгінгідей тартысты заманда «өз дегеніңді болдырып, беделіңді сақтап қалу үшін» елге білімді ұрпақ қажет! Ал, ол ұрпақты тәрбиелейтін, мектеп қабырғасынан негізін қалайтын ең алдымен ұстаздар қауымы!

Батыр Бауыржан Момышұлы бүйдейді: «Ұстаздық - ұлы құрмет. Себебі, ұрпақтарды ұстаз тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісін де ұстаз өсіреді... Өмірге ұрпақ берген аналарды қандай ардақтасақ, сол ұрпақты тәрбиелейтін ұстаздарды да сондай ардақтауға міндеттіміз».

Осы сөздерден-ақ, мұғалімдер ең әуелі ұлтқа қызмет атқаратын ең маңызды тұлға екенін аңғаруға болар. Иә, ең мықты экономист, ең мықты саясаткер, ең мықты ғалым, ең мықты заңгер, ең мықты құрылысшы, ең мықты идеолог, ең мықты спортшы т.б. қатарлы ең мықты мамандық ол – ұстаз!

Қадірің артып, құрметің биіктей берсін, асыл ұстаздар!

Abai.kz