«Съезді дамыту тұжырымдамасының аясында ұсынылып отырған маңызды бастаманың бірі – жас дін көшбасшыларының форумын өткізу. Конфессияаралық және мәдениеттер арасындағы диалогқа жастарды белсендірек жұмылдыру қажет екені айдан анық. Съез жұмысына жас көшбасшылардың қатысуы өркениеттер арасындағы, діндер арасындағы диалогта дәстүр мен сабақтастықты сақтауға мүмкіндік береді», - деді ол.

Сенат спикері аталған ұсыныс биылғы жиын аясында іске асып жатқанын атап өтті.

«Ертең түрлі конфессиялардың, халықаралық қоғамдық ұйымдардың жас өкілдері, келешегінен зор үміт күттіретін ғалымдар мен саясаткерлер Астанада жиналып, жас көшбасшылардың заманауи әлемнің үндестікпен дамуындағы рөлін талқылайды. Осы және өзге де қадамдар біздің съездің ары қарай дамуына және ықпалының арта түсуіне, сондай-ақ рухани дипломатияны ілгерілетуге, жаһандық деңгейдегі дінаралық, мәдениетаралық диалогтың орнауына септігін тигізетінінен сенімдімін», - деді Мәулен Әшімбаев.