Төменгі палата депутаты Кенжеғұл Сейітжан 14 мамырда өткен жалпы отырыста 1 маусым – Балаларды қорғау күнін мемлекеттік мереке және сәйкесінше, демалыс күні етіп белгілеуді ұсынды.

Еңбек және халықты әлеуметтік қорғау министрлігі Мәжіліс депутаты Кенжеғұл Сейітжанның Балаларды қорғау күні туралы ұсынысына қатысты өз ұстанымын білдірді, деп хабарлайды inbusiness.kz сайты.

"Балалардың өздері үшін 1 маусым демалыстың басталуымен, демалуға, көңіл көтеруге және қызықты нәрселермен айналысуға мүмкіндік берумен байланысты. Дәстүр бойынша бұл күні ата-аналар балаларын ойын-сауық саябақтарына, ойын орталықтарына серуендетіп, жалпы мерекелік көңіл-күй қалыптастырады", – деді министр.

Оның айтуынша, бұл мереке ата-аналар мен балаларға бірге уақыт өткізуге, мәдени-танымдық және қоғамдық шараларға қатысуға мүмкіндік береді. Бұл, Светлана Жақыпова атап өткендей, баланың психоэмоционалдық жағдайына оң әсер етеді және оның отбасының жанында өзін толық қауіпсіз сезінуге мүмкіндік береді.

"Жоғарыда айтылғандарды негізге ала отырып, сондай-ақ елімізде отбасы және отбасылық құндылықтар институтын нығайту мақсатында 1 маусымды ұлттық мереке – Балаларды қорғау күні ретінде белгілеуді мүмкін деп санаймыз", – деп қорытындылады Еңбек министрлігінің басшысы.

Abai.kz