Ақ үйдің әкімшілік-бюджеттік басқармасы АҚШ Мемлекеттік департаментіне бүкіл әлем бойынша әскери қылмыстарды тергейтін жиырмаға жуық бағдарламаны қаржыландыруды тоқтатуды ұсынды, деп хабарлайды Reuters дереккөздер мен ішкі құжаттарға сілтеме жасай отырып.

Әңгіме Украинадағы ресейлік әскери қылмыстарды тергеу жөніндегі жобалар туралы да болып отыр. Агенттік сұхбаттасушыларының айтуынша, тоқтатуға ұсынылатын бағдарламалардың арасында - Украинаның Бас прокуратурасы үшін Мемлекеттік департаменттің 18 миллион долларлық гранты, сондай-ақ бүкіл Украина бойынша зорлық-зомбылық пен азаптауларды қоса алғанда, адамзатқа қарсы қылмыстардың дәлелдемелерін жинауға көмектесетін жоба бар.

Reuters хабарлағандай, Ақ үйдің ұсынысы - бұл бағдарламаларды алып тастау жөніндегі түпкілікті шешім емес. Мемлекеттік департамент оның күшінде қалмауын даулай алады. Алайда, мемлекеттік хатшы Марко Рубионың көптеген бағдарламаларды сақтап қалуы мүмкін емес. Мемлекеттік департамент басшысы аса маңызды бастамаларды ғана қолдап күшінде қалдыра алады.

Дональд Трамптың әкімшілігі 2025 жылдың қаңтарында жұмысын бастағаннан бері шетелге беріліп келген көмектің миллиардтаған долларын тоқтатып, қысқартқан еді. Осындай көмекке жетекшілік еткен АҚШ-тың халықаралық даму жөніндегі агенттігі (USAID) қайта ұйымдастыру туралы шешім қабылдады. Оның функцияларының бір бөлігі Мемлекеттік департаментке ауысты.

Reuters агенттігі ақпанда хабарлағандай, шетелдік көмектің тоқтатылуы Киевке әскери қылмыстарды тергеуде көмек көрсететін жобаларды қаржыландырудың күрт төмендеуіне алып келді. Бұл жобалардың ондаған қызметкерлері қысқартуға ұшырады.

Abai.kz