Бүгін облыстық ішкі саясат басқармасының ұйымдастыруымен аудандық БАҚ өкілдеріне арналған «Бұқаралық ақпарат құралдарының сапасын арттыру және даму ерекшеліктері»  деген тақырыпта семинар өтті.

Негізгі мақсат - аудан, қалалық журналистермен тәжірибе алмасу, байланыс орнату мен кәсіби деңгейде ақпарат алуы мен таратуына жол ашу. Семинар барысында «Оңтүстік Қазақстан облысындағы БАҚ-тың бәсекеге қабілеттігін арттыру және оларды оңтайландыру мәселелері» тақырыбында облыстық ішкі саясат басқармасының басшысы Берік Уәли баяндама жасады.

«Алдағы уақытта журналистерге арналған семинар-тренингтер тұрақты өткізілетін болады. Облыстық ішкі саясат басқармасы бұл бағытта нақты жұмыстар жасауда. Мысалы, ертеңгі семинарға белгілі журналист, ҚР Президенті сыйлығының лауреаты, «Алаш айнасы» интернет-газетінің бас редакторы Серік Жанболат пен «Мінбер» журналистерді қолдау қоғамдық қорының директоры Есенгүл Кәпқызын арнайы шақырып отырмыз. Айдың соңына қарай «Егемен Қазақстан» газетінің бас редакторы Жанболат Аупбаев ағамыз да арнайы келіп, облысымыздың журналистері алдында  тәжірибелерімен бөлісетін болады »- деді, облыстық ішкі саясат басқармасының басшысы Берік Уәли.

Сонымен қатар, басқарма басшысы қазан айында облыс әкімдігі жанындағы бұқаралық ақпарат құралдарымен өзара іс-қимыл жөніндегі кеңестің кезекті отырысын өткізіп, интернет медиа-технологияны меңгеру тәсілдері (ақпараттық порталдар және блогерлер арасында өткізу), облыстағы этносаралық қатынастарды нығайтудың механизмдерін жетілдіру бойынша, «БАҚ және мемлекеттік мекемелер арасындағы байланыс»  (экстремизм мен терроризмді, ұлтаралық және этносаралық келіспеушіліктерді алдын алу) тақырыптарында семинарлар өткізу жоспарланғанын айтты.

Семинарда «Оңтүстік Қазақстан» газетінің 90 жылдық мерейтойы және ұлт қайраткерлері Т.Рысқұлов пен С.Қожановтың туылғандарына 120 жыл толуына орай өткізілетін іс-шаралар бойынша «Оңтүстік Қазақстан» газетінің бас редакторы Б.Тайжан, «Заманауи БАҚ-тың даму ерекшеліктері» бойынша «Южный Казахстан» газеті бас редакторының орынбасары К.Исмаилов баяндама жасады.

Семинардың қорытындысы бойынша қатысушыларға арнайы сертификаттар тапсырылды.

Абай-ақпарат