بۇگىن وبلىستىق ىشكى ساياسات باسقارماسىنىڭ ۇيىمداستىرۋىمەن اۋداندىق باق وكىلدەرىنە ارنالعان «بۇقارالىق اقپارات قۇرالدارىنىڭ ساپاسىن ارتتىرۋ جانە دامۋ ەرەكشەلىكتەرى»  دەگەن تاقىرىپتا سەمينار ءوتتى.

نەگىزگى ماقسات - اۋدان، قالالىق جۋرناليستەرمەن تاجىريبە الماسۋ، بايلانىس ورناتۋ مەن كاسىبي دەڭگەيدە اقپارات الۋى مەن تاراتۋىنا جول اشۋ. سەمينار بارىسىندا «وڭتۇستىك قازاقستان وبلىسىنداعى باق-تىڭ باسەكەگە قابىلەتتىگىن ارتتىرۋ جانە ولاردى وڭتايلاندىرۋ ماسەلەلەرى» تاقىرىبىندا وبلىستىق ىشكى ساياسات باسقارماسىنىڭ باسشىسى بەرىك ءۋالي بايانداما جاسادى.

«الداعى ۋاقىتتا جۋرناليستەرگە ارنالعان سەمينار-ترەنينگتەر تۇراقتى وتكىزىلەتىن بولادى. وبلىستىق ىشكى ساياسات باسقارماسى بۇل باعىتتا ناقتى جۇمىستار جاساۋدا. مىسالى، ەرتەڭگى سەمينارعا بەلگىلى جۋرناليست، قر پرەزيدەنتى سىيلىعىنىڭ لاۋرەاتى، «الاش ايناسى» ينتەرنەت-گازەتىنىڭ باس رەداكتورى سەرىك جانبولات پەن «مىنبەر» جۋرناليستەردى قولداۋ قوعامدىق قورىنىڭ ديرەكتورى ەسەنگۇل كاپقىزىن ارنايى شاقىرىپ وتىرمىز. ايدىڭ سوڭىنا قاراي «ەگەمەن قازاقستان» گازەتىنىڭ باس رەداكتورى جانبولات اۋپباەۆ اعامىز دا ارنايى كەلىپ، وبلىسىمىزدىڭ جۋرناليستەرى الدىندا  تاجىريبەلەرىمەن بولىسەتىن بولادى »- دەدى، وبلىستىق ىشكى ساياسات باسقارماسىنىڭ باسشىسى بەرىك ءۋالي.

سونىمەن قاتار، باسقارما باسشىسى قازان ايىندا وبلىس اكىمدىگى جانىنداعى بۇقارالىق اقپارات قۇرالدارىمەن ءوزارا ءىس-قيمىل جونىندەگى كەڭەستىڭ كەزەكتى وتىرىسىن وتكىزىپ، ينتەرنەت مەديا-تەحنولوگيانى مەڭگەرۋ تاسىلدەرى (اقپاراتتىق پورتالدار جانە بلوگەرلەر اراسىندا وتكىزۋ), وبلىستاعى ەتنوسارالىق قاتىناستاردى نىعايتۋدىڭ مەحانيزمدەرىن جەتىلدىرۋ بويىنشا، «باق جانە مەملەكەتتىك مەكەمەلەر اراسىنداعى بايلانىس»  (ەكسترەميزم مەن تەرروريزمدى، ۇلتارالىق جانە ەتنوسارالىق كەلىسپەۋشىلىكتەردى الدىن الۋ) تاقىرىپتارىندا سەمينارلار وتكىزۋ جوسپارلانعانىن ايتتى.

سەميناردا «وڭتۇستىك قازاقستان» گازەتىنىڭ 90 جىلدىق مەرەيتويى جانە ۇلت قايراتكەرلەرى ت.رىسقۇلوۆ پەن س.قوجانوۆتىڭ تۋىلعاندارىنا 120 جىل تولۋىنا وراي وتكىزىلەتىن ءىس-شارالار بويىنشا «وڭتۇستىك قازاقستان» گازەتىنىڭ باس رەداكتورى ب.تايجان، «زاماناۋي باق-تىڭ دامۋ ەرەكشەلىكتەرى» بويىنشا «يۋجنىي كازاحستان» گازەتى باس رەداكتورىنىڭ ورىنباسارى ك.يسمايلوۆ بايانداما جاسادى.

سەميناردىڭ قورىتىندىسى بويىنشا قاتىسۋشىلارعا ارنايى سەرتيفيكاتتار تاپسىرىلدى.

اباي-اقپارات