Ақорданың баспасөз қызметiнiң хабарлауынша, Елбасы үш облыстың жиын-терiм науқанын өткiзуге байланысты дайындығын пысықтап, ауыл шаруашылығын дамыту бағытында бiрқатар тапсырмалар жүктедi.

Ең алдымен бес институционалдық реформадағы аграрлық сектордың маңыздылығына тоқталды. Елдегi ауыл шаруашылығы кооперативтерiн әлемдiк тәжiрибеге сай дамытудың, сондай-ақ, бұл бағыттағы жұмыстарды ширата түсуi үшiн ұлттық заңнамаға өзгерiстер енгiзудiң маңыздылығына назар аударды.

– Мұндағы басты мақсат – ауыл шаруашылығының тиiмдiлiгiн арттыру және оны өңдеушi сектор арқылы экспортқа шығару. Ол үшiн ауыл шаруашылығы елдiң экономикалық өсiмiнiң қозғаушы күшiне айналуы тиiс. Өңдеумен айналысатын инвесторлардың келуiне жағдай жасау, жаңа инновацияларды енгiзу жұмыстарын жеделдетуiмiз қажет, – дедi Н.Назарбаев.

Бүгiнде ауыл шаруашылығын дамытуға мемлекет зор көңiл бөлiп отыр. Алайда, аграрлық сектор әлi де экономиканы әртараптандырудың негiзгi тiрегiне айнала қойған жоқ. Бұл еңбек өнiмдiлiгiн арттыру, ауыл шаруашылығы өндiрiсiн кеңейту, салаға сыртқы инвестицияларды тарту жұмыстарындағы сылбырлықты аңғартады. Кеңесте үш облыстың бес жылдағы субсидия көрсеткiштерiне тоқталған Елбасы ауыл шаруашылығын субсидиялау мәселелерiне мұқият назар аудару қажеттiгiн ортаға салды. Президент сонымен бiрге ауыл шаруашылығы жерлерiн пайдалану тиiмдiлiгiн арттырудың маңызы айрықша екендiгiн айтты. Бұл ретте ауыл жұртының еңбекке деген ыждағатты көзқарасы мен тиiмдi меншiк иесiн қалыптастырудың, сондай-ақ жерге қатысты мәмiлелердi жеңiлдетудiң мәнiн атап өттi.

Елбасы кеңес соңында елiмiздiң ауыл шаруашылығы саласындағы қол жеткiзген табыстарды атап, қиындықтардың уақытша екенiне, оларды еңсерiп, даму жолымен iлгерiлеуге елдегi жүзеге асырылып жатқан бағдарламалардың септiгi тиерiне сенiм бiлдiрдi.

Абай-ақпарат