Бүгін елімізде бірқатар кадрлық тағайындаулар болуы мүмкін. Сенімді дереккөздерінің хабарлауынша, Қазақстан Республикасы Президенті Әкімшілігінің Басшысы Нұрлан Нығматулин пен Астана қаласының әкімі Әділбек Жақсыбеков жаңа қызметке ауысуы ықтимал деп хабарлайдф Ult.kz сайты.

Сондай-ақ, kapital.kz сайты Мәжіліс Төрағасы Бақтықожа Ізмұхамбетовтің де басқа қызметке алмасуы мүмкін екенін жазады.

Әділбек Жақсыбеков 2014 жылдың қазан айынан бері Астана қаласының әкімі қызметін атқарады. Сенімді дереккөздерге сүйенсек, енді ол ҚР Президенті Әкімшілігінің Басшысы қызметіне келеді.

Ал бұл қызметті атқарып жатқан Нұрлан Нығматулин Мәжіліс Төрағасы болып тағайындалмақ. Нұрлан Зайроллаұлы Мемлекет басшысының 2014 жылдың 3 сәуіріндегі Жарлығымен Қазақстан Республикасы Президенті Әкімшілігінің Басшысы қызметіне кіріскен болатын.

Мәжіліс Төрағасы Бақтықожа Ізмұхамбетов болса, депутаттық мандатын сақтап қалып, ардагерлер ұйымына жетекшілік етуі мүмкін.

Егер аталған ауыс-түйістер орын алса, Астана қаласы әкімі қызметіне енді кім келеді деген сұрақтың туындауы заңды. Бізге жеткен мәліметтерге сенсек, Бас қаламыздың мэрі болып Қызылорда облысының әкімі Қырымбек Көшербаев келуі мүмкін дейді Ult.kz.

Тағы бір жорамал  Нұрлан Нығматулин мен Әділбек Жақсыбековтің өзара орын алмасуы мүмкін екенін айтады.

Абай-ақпарат