بۇگىن ەلىمىزدە بىرقاتار كادرلىق تاعايىنداۋلار بولۋى مۇمكىن. سەنىمدى دەرەككوزدەرىنىڭ حابارلاۋىنشا، قازاقستان رەسپۋبليكاسى پرەزيدەنتى اكىمشىلىگىنىڭ باسشىسى نۇرلان نىعماتۋلين پەن استانا قالاسىنىڭ اكىمى ادىلبەك جاقسىبەكوۆ جاڭا قىزمەتكە اۋىسۋى ىقتيمال دەپ حابارلايدف Ult.kz سايتى.

سونداي-اق، kapital.kz ءسايتى ماجىلىس توراعاسى باقتىقوجا ىزمۇحامبەتوۆتىڭ دە باسقا قىزمەتكە الماسۋى مۇمكىن ەكەنىن جازادى.

ادىلبەك جاقسىبەكوۆ 2014 جىلدىڭ قازان ايىنان بەرى استانا قالاسىنىڭ اكىمى قىزمەتىن اتقارادى. سەنىمدى دەرەككوزدەرگە سۇيەنسەك، ەندى ول قر پرەزيدەنتى اكىمشىلىگىنىڭ باسشىسى قىزمەتىنە كەلەدى.

ال بۇل قىزمەتتى اتقارىپ جاتقان نۇرلان نىعماتۋلين ءماجىلىس توراعاسى بولىپ تاعايىندالماق. نۇرلان زايروللاۇلى مەملەكەت باسشىسىنىڭ 2014 جىلدىڭ 3 ساۋىرىندەگى جارلىعىمەن قازاقستان رەسپۋبليكاسى پرەزيدەنتى اكىمشىلىگىنىڭ باسشىسى قىزمەتىنە كىرىسكەن بولاتىن.

ءماجىلىس توراعاسى باقتىقوجا ىزمۇحامبەتوۆ بولسا، دەپۋتاتتىق مانداتىن ساقتاپ قالىپ، ارداگەرلەر ۇيىمىنا جەتەكشىلىك ەتۋى مۇمكىن.

ەگەر اتالعان اۋىس-تۇيىستەر ورىن السا، استانا قالاسى اكىمى قىزمەتىنە ەندى كىم كەلەدى دەگەن سۇراقتىڭ تۋىنداۋى زاڭدى. بىزگە جەتكەن مالىمەتتەرگە سەنسەك، باس قالامىزدىڭ مەرى بولىپ قىزىلوردا وبلىسىنىڭ اكىمى قىرىمبەك كوشەرباەۆ كەلۋى مۇمكىن دەيدى Ult.kz.

تاعى ءبىر جورامال  نۇرلان نىعماتۋلين مەن ادىلبەك جاقسىبەكوۆتىڭ ءوزارا ورىن الماسۋى مۇمكىن ەكەنىن ايتادى.

اباي-اقپارات