Дүтбаев оппозициялық саясаткер Мұхтар Әблязовті 2002 жылдан бері білетінін, "дос ретінде араласқанын", "оның сұрауы бойынша ҰҚК Ержан Тәтішевтің телефонын тыңдағанын" айтты. Оның сөзінше, "Әблязов пен Тәтішев арасында мүлікті бөлісуге қатысты келіспеушілік болған.
Нартай Дүтбаев 2017 жылы "мемлекеттік құпияны жариялау" ісі бойынша жеті жылға сотталған. Ал 2018 жылы 1 ақпан күні Әскери сот Ақмола гарнизонының әскери соты Нартай Дүтбаевты "қаржы жымқыру және жылыстату" айыбы бойынша 12 жылға соттағанын хабарлаған. Дүтбаевқа шығарылған екі жаза жартылай біріктіріліп, соңғы шешім ретінде 12 жыл кесілген.
Ержан Тәтішев 2004 жылы аңшылықта жүргенде оқ тиіп өлген. Сол кезде мұны сот "жазатайым оқиға" деп танып, банкирдің жанында бірге болған кәсіпкер Мұратхан Тоқмәдиді бір жылға соттаған. Бірақ 2017 жылы іс қайта қаралып, Мұратхан Тоқмәди Тәтішевті "ТұранӘлем" банкін иеленуді көздеген "Мұхтар Әблязовтің тапсырысымен өлтірдім" деген. Сот оны 2018 жылы он жарым жылға соттады.
Қазақстан бас прокуратурасы 4 сәуірде Мұхтар Әблязовтің үстінен "банкир Ержан Тәтішевті өлтіруді ұйымдастырды" деген айыппен қылмыстық іс қозғаған.
Мұхтар Әблязов 2009 жылдан бері шетелде тұрады, өзіне қатысты барлық айыптаулардың саяси себебі бар деп санайды. Қазақстан соты Әблязовті "қылмыстық топ құрды" және "ақша жымқырды" деп, 2017 жылы сырттай 20 жылға соттаған.
Abai.kz
