دۇتباەۆ وپپوزيتسيالىق ساياساتكەر مۇحتار ءابليازوۆتى 2002 جىلدان بەرى بىلەتىنىن، "دوس رەتىندە ارالاسقانىن", "ونىڭ سۇراۋى بويىنشا ۇقك ەرجان تاتىشەۆتىڭ تەلەفونىن تىڭداعانىن" ايتتى. ونىڭ سوزىنشە، ء"ابليازوۆ پەن تاتىشەۆ اراسىندا مۇلىكتى بولىسۋگە قاتىستى كەلىسپەۋشىلىك بولعان.

نارتاي دۇتباەۆ 2017 جىلى "مەملەكەتتىك قۇپيانى جاريالاۋ" ءىسى بويىنشا جەتى جىلعا سوتتالعان. ال 2018 جىلى 1 اقپان كۇنى اسكەري سوت اقمولا گارنيزونىنىڭ اسكەري سوتى نارتاي دۇتباەۆتى "قارجى جىمقىرۋ جانە جىلىستاتۋ" ايىبى بويىنشا 12 جىلعا سوتتاعانىن حابارلاعان. دۇتباەۆقا شىعارىلعان ەكى جازا جارتىلاي بىرىكتىرىلىپ، سوڭعى شەشىم رەتىندە 12 جىل كەسىلگەن.

ەرجان تاتىشەۆ 2004 جىلى اڭشىلىقتا جۇرگەندە وق ءتيىپ ولگەن. سول كەزدە مۇنى سوت "جازاتايىم وقيعا" دەپ تانىپ، بانكيردىڭ جانىندا بىرگە بولعان كاسىپكەر مۇراتحان توقماديدى ءبىر جىلعا سوتتاعان. بىراق 2017 جىلى ءىس قايتا قارالىپ، مۇراتحان توقمادي تاتىشەۆتى "تۇرانالەم" بانكىن يەلەنۋدى كوزدەگەن "مۇحتار ءابليازوۆتىڭ تاپسىرىسىمەن ءولتىردىم" دەگەن. سوت ونى 2018 جىلى ون جارىم جىلعا سوتتادى.

قازاقستان باس پروكۋراتۋراسى 4 ساۋىردە مۇحتار ءابليازوۆتىڭ ۇستىنەن "بانكير ەرجان تاتىشەۆتى ءولتىرۋدى ۇيىمداستىردى" دەگەن ايىپپەن قىلمىستىق ءىس قوزعاعان.

مۇحتار ءابليازوۆ 2009 جىلدان بەرى شەتەلدە تۇرادى، وزىنە قاتىستى بارلىق ايىپتاۋلاردىڭ ساياسي سەبەبى بار دەپ سانايدى. قازاقستان سوتى ءابليازوۆتى "قىلمىستىق توپ قۇردى" جانە "اقشا جىمقىردى" دەپ، 2017 جىلى سىرتتاي 20 جىلعا سوتتاعان.

Abai.kz