Қазақстанның мемлекеттік шекарасын делимитациялау толығымен аяқталды, - деп хабарлайды Абай-ақпарат Қазақпарат сайтына сілтеме жасап.

Қазақстан Республикасы Парламенті Сенатының жалпы отырысында «Қазақстан, Түрікменстан және Өзбекстан Республикаларының арасындағы мемлекеттік шекаралардың түйісу нүктесі бойынша Шартты ратификациялау туралы» Заң қабылданды.

Келісімге сәйкес,  үш мемлекеттің мемлекеттік шекараларының түйісу нүктесі Үстірт қыратының аумағында орналасқан. Келісімнің шектік мерзімі жоқ және оны бұзуға болмайды.

“Бұл Заң - Қазақстанның мемлекеттік шекарасының орналасуы мен бағытын анықтау процесінің аяқталғанын білдіреді. Және, түйісу нүктесіндегі аумақтық даулардың туындауына себеп болатын алғышарттарды жойып, еліміздің ұлттық қауіпсіздігін нығайта түседі” - деді ҚР Сыртқы істер министрі Қайрат Әбдірахманов.

Министр бұл келісім Қазақстанның мемлекеттік шекарасын делимитациялауды толықтай аяқтаған соңғы құжат екенін атап өтті.

Abai.kz