Қазақстанда заңсыз ау салынбаған көл, балығы ауланбаған өзен, архары атылмаған тау, киігі мүйізі қағылмаған дала, терісі сыпырылмаған аң қалмады-ау. Ақша үшін, құлқының қамы үшін тау мен тасты аралап қырып жатыр, қырып жатыр. Байы да, кедейі де атып жатыр, атып жатыр. Байлар қызық үшін, кедейлер ақша үшін Отан анасының тағы перзенттерін аяусыз аулауда.

Биік мінберден туған жерді сүюді, отанды құрметтеуді насихаттайтын кей дөкейлер демалыс күні құралайды атып, қасқырды қызық үшін соғып келетіні бар.
Құдаларының алдында туған жерінің табиғатын айтып мақтанатын қарапайым қазақтың кейбірі, қыста ұйықтап жатқан борсықты қазып алып, пана іздеген елікті жығып алатыны тағы бар.
Жануар төлдейтін кезеңде мылтық атып, құс балапан басар сәтте тұзақ құрып, балық уылдырық шашар сәтте ау салатын қаскөйлер жетерлік.